Mumbai Mayor Bomb Threat : ‘१५ ऑगस्टपूर्वी मेट्रो, शाळा, शेअर बाजार बॉम्बने उडवणार…’, मुंबईच्या महापौरांना पुन्हा बॉम्बची धमकी

Mumbai Mayor Bomb Threat: मुंबईच्या महापौर रितू तावडे यांच्या अधिकृत ई-मेल आयडीवर पुन्हा एकदा बॉम्बस्फोटाची धमकी देणारा मेल आला आहे. महापौर कार्यालयासह मुंबई मेट्रो, शाळा आणि शेअर बाजाराला लक्ष्य करण्याचा दावा या मेलमध्ये करण्यात आला असून 15 ऑगस्टपूर्वी हल्ला करण्याची धमकी देण्यात आली आहे.

• मुंबईच्या महापौर रितू तावडे यांना पुन्हा बॉम्बची धमकी
• 15 ऑगस्टपूर्वी हल्ल्याचा ई-मेल
• मुंबई पोलिसांचा तपास सुरू

Mumbai Mayor Bomb Threat News In Marathi: मुंबईच्या महापौर रितू तावडे यांना पुन्हा एकदा बॉम्बस्फोटाची धमकी देणारा ई-मेल आल्याने मुंबईत खळबळ उडाली आहे. महापौरांच्या अधिकृत ई-मेल खात्यावर आलेल्या या धमकीच्या मेलमध्ये त्यांच्या कार्यालयासह मुंबई मेट्रो, शाळा आणि शेअर बाजार उडवून देण्याची धमकी देण्यात आली आहे. तसेच 15 ऑगस्टपूर्वी हल्ला केला जाईल, असा दावाही मेलमध्ये करण्यात आला आहे.

मेट्रोने प्रवास करू नका…

या धमकीच्या ई-मेलमध्ये काही खलिस्तान समर्थक घोषणा तसेच काही व्यक्तींची नावे नमूद करण्यात आल्याचे समोर आले आहे. त्यामुळे या धमकीचे गांभीर्य अधिक वाढले आहे. ई-मेलमध्ये नागरिकांना मुलांना शाळेत पाठवू नये तसेच मेट्रोने प्रवास करू देऊ नये, असा इशाराही देण्यात आला आहे. यापूर्वीही महापौर रितू तावडे यांना दोन वेळा अशाच प्रकारचे धमकीचे ई-मेल प्राप्त झाले होते. त्यामुळे पुन्हा आलेल्या या मेलनंतर मुंबई पोलीस प्रशासन सतर्क झाले असून संबंधित सर्व यंत्रणांना आवश्यक सूचना देण्यात आल्या आहेत.

Aditya Thackeray: ‘महापौरांना मुंबईची नाही, तर…’, आदित्य ठाकरेंचा सरकारवर घणाघाती प्रहार; ‘या’ मुद्द्यावरूनही घेरले

पोलिसांकडून तपास सुरू

या प्रकरणाचा तपास मुंबई पोलीस आणि सायबर पोलिसांकडून सुरू असून ई-मेल कोणत्या IP Address वरून पाठवण्यात आला, त्याचा मूळ स्रोत काय आहे आणि तो नेमका कोणी पाठवला, याचा शोध घेतला जात आहे. स्वातंत्र्यदिनाच्या पार्श्वभूमीवर शहरातील महत्त्वाच्या ठिकाणी सुरक्षा व्यवस्था अधिक कडक करण्यात येण्याची शक्यता असून तपास यंत्रणा प्रत्येक बाबीची सखोल चौकशी करत आहेत.

तसेच मुंबईच्या महापौर रितू तावडे यांनी महापौर बंगल्याच्या दुरुस्ती खर्चाबाबत सुरू असलेल्या वादावर स्पष्टीकरण देत विरोधकांवर फेक नरेटिव्ह पसरवल्याचा आरोप केला आहे. महापौर बंगल्यासाठी कोट्यवधी रुपयांचा खर्च केला जात असल्याचा दावा चुकीचा असून, संबंधित निविदेचा महापौर बंगल्याशी कोणताही संबंध नसल्याचे त्यांनी स्पष्ट केले.

रितू तावडे म्हणाल्या, “हे संपूर्ण काम राणीच्या बागेचे आहे. मात्र त्याचा महापौर बंगल्याशी संबंध जोडून दिशाभूल केली जात आहे. महापौर नाव जोडले की काहींना राजकीय मायलेज मिळते, म्हणून हा फेक नरेटिव्ह तयार करण्यात आला आहे.”

त्यांनी पुढे सांगितले की, महापौर बंगला हा हेरिटेज (वारसा) इमारतीच्या श्रेणीत येतो. त्यामुळे त्या इमारतीसंदर्भातील कोणतीही निविदा प्रक्रिया वेगळी असते. सध्या चर्चेत असलेला 2 कोटी 89 लाख रुपयांचा टेंडर हा राणी बाग (वीरमाता जिजाबाई भोसले उद्यान व प्राणीसंग्रहालय) येथील उद्यान विभागाने काढलेला असून, त्याचा महापौर बंगल्याशी कोणताही संबंध नाही, असे त्यांनी स्पष्ट केले.

रितू तावडे या घाटकोपरमधील प्रभाग क्रमांक 132 मधून सलग दुसऱ्यांदा नगरसेविका म्हणून निवडून आल्या आहेत. महापालिकेतील अभ्यासू आणि आक्रमक नगरसेविका अशी त्यांची ओळख असून, सध्या त्या मुंबईच्या महापौरपदाची जबाबदारी सांभाळत आहेत.

मुंबईचे प्रवेशद्वार हिरवळीने फुलणार! वाशी, ऐरोली नाक्यावर होणार हरित विकास; महापौर रितू तावडेंकडून स्थळपाहणी