जागरूक मतदारांनो, SIR बाबत महत्त्वाची अपडेट, निवडणूक आयोगानं घेतलाय मोठा निर्णय
भारत निवडणूक आयोगा (Indian Election Commision) च्या शनिवारी पार पडलेल्या बैठकीत महाराष्ट्रात सुरू असलेल्या मतदार याद्यांच्या विशेष सखोल पुनरीक्षण (SIR – Special Intensive Revision) प्रक्रियेला मुदतवाढ देण्यासह मतदारांच्या सुलभतेसाठी महत्त्वपूर्ण निर्णय घेण्यात आले आहेत. मुख्य निवडणूक अधिकारी कार्यालयाच्या विनंतीची दखल घेत आयोगानं ही मुदतवाढ मंजूर केली आहे.
महाराष्ट्रात विशेष सखोल पुनरीक्षण म्हणजेच SIR प्रक्रियेअंतर्गत दावे आणि हरकती दाखल करण्याची मुदत १२ ऑक्टोबर २०२६ पर्यंत वाढवण्यात आली आहे. तसंच प्राप्त झालेल्या नोटिसा, दावे आणि हरकती निकाली काढण्यासाठी १० नोव्हेंबर २०२६ पर्यंतची मुदत देण्यात आली आहे. या प्रक्रियेनंतर महाराष्ट्रातील अंतिम मतदार यादी १६ नोव्हेंबर २०२६ रोजी प्रसिद्ध केली जाईल.
पुनरीक्षण प्रक्रियेदरम्यान ‘जुळणी न झालेले मतदार’ (Unmapped) किंवा ‘तार्किक विसंगती’ (Logical Discrepancies) या कारणास्तव ज्या नागरिकांना नोटिसा बजावण्यात आल्या आहेत, अशा मतदारांच्या घरी मतदान केंद्रस्तरीय अधिकारी (BLO) स्वतः जाऊन आवश्यक दस्तऐवज संकलित करणार आहेत.
दस्तऐवज घरूनच संकलित केले जाणार असल्यानं अशा मतदारांना प्रत्यक्ष सुनावणीसाठी मतदार नोंदणी अधिकारी (ERO) किंवा सहाय्यक मतदार नोंदणी अधिकाऱ्यांच्या (AERO) कार्यालयात जाण्याची आवश्यकता असणार नाही. केवळ अपवादात्मक परिस्थितीतच ऑनलाइन पद्धतीनं सुनावणी घेतली जाईल. या सुनावणीला मतदाराच्या वतीनं कुटुंबातील कोणताही प्रौढ सदस्य उपस्थित राहू शकेल.
राज्यातील बेघर नागरिक, मजूर, गरीब आणि रात्र निवाऱ्यांमध्ये (Night Shelters) राहणाऱ्या नागरिकांना मतदार नोंदणी आणि दुरुस्तीत सुलभता यावी, यासाठी जिल्हा निवडणूक अधिकाऱ्यांना (DEO) गरजेनुसार विशेष मदत कक्ष (Help Desks) आणि विशेष शिबिरांचे आयोजन करण्याचे स्पष्ट निर्देश देण्यात आले आहेत.
.png "Videos"){kind=small}
