Nagpur News :नासुप्र मुख्यालयात मनमानी पार्किंग ; पावती शिवाय आकारले जाते शुल्क

Nagpur News : नासुप्र मुख्यालय परिसरातील पार्किंग व्यवस्थेवर प्रश्नचिन्ह निर्माण झाले आहे. वाहनचालकांकडून पार्किंगसाठी पावती न देता शुल्क आकारले जात असल्याचा आरोप आहे. मनमानी पद्धतीने पार्किंग शुल्क वसूल होत असल्याने नागरिकांमध्ये नाराजी आहे .

• चालक करतात समस्यांचा सामना
• वाहने काढायला कर्मचारी येत नाही
• अध्यक्ष विश्वस्त बसतात तिथेच मनमानी

Nagpur News : नागपूर सुधार प्रन्यासच्या मुख्यालयातील पार्किंगचे कंत्राट खाजगी कंपनीला दिले आहे. येथील स्थिती गंभीर आहे. चालकांकडून पार्किंगसाठी निर्धारित शुल्क आकारले जात आहे. परंतु, त्यांना पावती किंवा पार्किंग स्लिप दिली जात नाही. जेव्हा चालक पावतीची मागणी करतात तेव्हा पार्किंग कर्मचारी उद्धटपणे वागतात आणि त्यांना पुढे जाण्यास सांगतात, असा आरोप आहे.

चालक करतात समस्यांचा सामना

अनेक दिवसांपासून अशा तक्रारी करूनही व्यवस्थेत कोणतीही सुधारणा झालेली नाही. सर्वांत मोठा प्रश्न हा आहे की, जर पार्किंग शुल्क आकारले जात असेल तर त्यांना वैध पावती किंवा पार्किंग स्लिप का दिली जात नाही? या शुल्काची नोंद कशी केली जाते आणि कंत्राटदार कोणत्या आधारावर हे हिशोब नासुप्रला देत आहेत ?

पार्किंग शुल्काच्या पावत्यांचा अभाव स्वाभाविकपणे व्यवस्थेच्या पारदर्शकतेवर प्रश्नचिन्ह निर्माण करतो. नासुप्र प्रशासनाने पार्किंग कंत्राटदाराला शुल्क आकारण्यासाठी कोणत्या अटी ठेवल्या आहेत आणि चालकांना पावत्या देणे बंधनकारक आहे का, हे स्पष्ट केले
पाहिजे.

Nagpur News : २६ वर्षांचा वनवास; रिंगरोडसाठी घेतलेल्या जमिनीची भरपाई कधी?

वाहने काढायला कर्मचारी येत नाही

पार्किंग व्यवस्थेतील आणखी एक मोठी समस्या म्हणजे स्टँडवरील कर्मचारी अनेकदा वाहने पार्किंग लॉटच्या मध्यभागी उभी करून ठेवतात, जेव्हा वाहन मालक वाहने काढायला येतात तेव्हा ती काढण्यासाठी किवा मार्ग उपलब्ध करून देण्यासाठी पार्किंगचा कोणताही कर्मचारी उपस्थित नसतो.

यामुळे वाहनचालकांना मोठी गैरसोय होते, असाही प्रश्न निर्माण होतो की जेव्हा पार्किंगसाठी निश्चित शुल्क आकारले जात आहे, तेव्हा योग्य पार्किंगची खात्री करण्याची आणि वाहने काढण्यासाठी मदत करण्याची जबाबदारी कोणाची आहे?

Nagpur Crime : गुन्हे नियंत्रणात नागपुर ग्रामीण पोलीस धुरंधर ; गुन्ह्यांच्या टक्क्यात घसरण

अध्यक्ष विश्वस्त बसतात तिथेच मनमानी

सर्वांत गंभीर बाब म्हणजे, हे कोणतेही सामान्य किंवा दूरचे पार्किंगचे ठिकाण नसून नासुप्रचे मुख्यालय आहे. नासुप्रचे अध्यक्ष, विश्वस्त आणि वरिष्ठ अधिकारी याच संकुलात बसतात. असे असूनही मुख्यालयाच्या प्रवेशद्वारावरील पार्किंग व्यवस्थेतील कथित मनमानी आणि अव्यवस्था प्रशासनाच्या कामकाजावर प्रश्नचिन्ह निर्माण करते. तथापि, अधिकारी आणि विश्वस्त मागच्या दाराने बाहेर पडतात. त्यामुळे सामान्य वाहनचालकांना भेडसावणाऱ्या समस्या त्यांच्या लक्षात येत नसाव्यात.