Nagpur News :स्टार एअरकडून नागपूरच्या प्रवाशांना मोठा धक्का ;१२ विमानसेवांवर शहराचा भार

Nagpur News : स्टार एअरच्या १२ विमानसेवांशी संबंधित निर्णयामुळे नागपूरच्या हवाई वाहतुकीवर परिणाम होण्याची शक्यता असून, प्रवाशांच्या प्रवासाचे नियोजन आणि कनेक्टिव्हिटीचा प्रश्न ऐरणीवर आला आहे.

• या शहरांशी आहे कनेक्टिव्हिटी
• जीएमआरचेही बळ दिसत नाही
• कतर एअरवेजची सेवासुद्धा काहीदिवसांसाठी बंद

Nagpur News:नागपूर हे सेंटर असूनही नवीन विमानसेवा सुरू होत नसताना आधीपासून सुरू असलेल्या विमानसेवाही एकापाठोपाठ बंद होत आहेत. आता नागपूर-किशनगड (अजमेर) दरम्यान सुरू असलेली स्टार एअरची विमानसेवाही बंद झाली आहे. किशनगड विमानतळाच्या माध्यमातून अजमेर आणि आसपासच्या भागात पोहोचणाऱ्या नागपूरच्या प्रवाशांसाठी हा मोठा धक्का मानला जात आहे.

ही विमानसेवा बंद झाल्याने अजमेरला जाण्यासाठी प्रवाशांसमोर थेट हवाई पर्याय मर्यादित झाले आहेत. अशाप्रकारे सुरू असलेल्या विमानसेवांवर विराम मिळत असल्याने आता उपराजधानी केवळ १२ विमानसेवांवर येऊन ठेपली आहे.
मिळालेल्या माहितीनुसार, स्टार एअरने किशनगडसाठीची थेट विमानसेवा बंद करून आता नागपूर-पुणे-किशनगड विमानसेवा सुरू करण्याचा निर्णय घेतला आहे. त्यामुळे आता नागपूरच्या प्रवाशांना किशनगडला जाण्यासाठी पुण्याला जाऊन तेथून पुढील विमान पकडावे लागणार आहे.

ही गंतव्यस्थाने झाली बंदः नागपूरहून हवाई सेवा देणाऱ्या स्टार एअरकडून विविध शहरांसाठी विमानसेवा सुरू करण्यात आली होती. मात्र, कालांतराने यातील अनेक सेवा बंद झाल्या. येथून चेन्नई, बेळगावी, औरंगाबाद, नाशिक आणि लखनऊनंतर आता किशनगडची सेवाही बंद झाली आहे.

प्रवाशांचे म्हणणे आहे की, एखाद्या नवीन शहरासाठी विमानसेवा सुरू झाल्याने नागपूरची कनेक्टिव्हिटी मजबूत होण्याची अपेक्षा निर्माण होते. मात्र, काही काळानंतर सेवा बंद झाल्याने प्रवाशांच्या नियोजनावर परिणाम होतो.

Nagpur News : १५ ऑक्टोबरपासून कापूस खरेदीला सुरुवात; उत्पादन घटल्याने दर कडाडण्याची शक्यता

या शहरांशी आहे कनेक्टिव्हिटी

नागपूर विमानतळावर सध्या सुमारे १० देशांतर्गत आणि २ आंतरराष्ट्रीय विमानसेवांचे संचालन सुरू आहे. १० देशांतर्गत विमानसेवांमध्ये दिल्ली, मुंबई, पुणे, बंगळुरू, हैदराबाद, इंदूर, कोलकाता, अहमदाबाद, नांदेड आणि गोवा यांचा समावेश आहे. तर २ आंतरराष्ट्रीय विमानसेवांमध्ये दोहा आणि शारजाह यांचा समावेश आहे. अन्य शहरांमध्ये तसेच परदेशात जाण्यासाठी दिल्ली आणि मुंबई येथून कनेक्टिंग फ्लाइटचा आधार घ्यावा लागतो.

Nagpur Police : डेटाच्या आधारे ठरणार पोलिसांचे संख्याबळ; मुंबईच्या धर्तीवर ‘अर्बन पोलिसिंग’

जीएमआरचेही बळ दिसत नाही

नागपूर विमानतळाच्या संचालनाची जबाबदारी जीएमआर समूहाकडे आल्यानंतर विमानतळाच्या सुविधांसोबतच विमानसेवा आणि गंतव्यस्थळांची संख्याही वाढेल, अशी प्रवाशांना अपेक्षा होती. मात्र, नवीन विमानसेवा आणि विविध शहरांसाठी थेट कनेक्टिव्हिटीच्या बाबतीत प्रवाशांच्या अपेक्षा अद्याप पूर्ण झालेल्या नाहीत. मुख्यमंत्री देवेंद्र फडणवीस यांनी विमानतळाबाबत निश्चित केलेली डेडलाइनही कुठे हवेतच विरून जाणार नाही ना, अशी चर्चा सुरू झाली आहे.

कतर एअरवेजची सेवासुद्धा काहीदिवसांसाठी बंद

देशांतर्गत मार्गासोबतच नागपूरच्या आंतरराष्ट्रीय हवाई सेवेलाही मोठा धक्का बसला आहे, कतार एअरवेजने २२ ऑक्टोबर ते २९ मार्च २०२७ या कालावधीत आपली नागपूर-दोहा-नागपूर विमानसेवा तात्पुरती बंद ठेवण्याची घोषणा केली आहे.