रविवार, 8 नोव्हेंबर 2026
फोटो सौजन्य सोशल मीडिया
विशेष रेल्वेगाड्या सुरू केल्याचे रेल्वे प्रशासनाकडून सांगितले जात असले, तरी प्रत्यक्षात प्रवाशांच्या गैरसोयी कमी झालेल्या नाहीत. फलाटांवरील गर्दी, डब्यात चढण्यासाठी होणारी धक्काबुक्की आणि सुरक्षारक्षकांची अपुरी उपस्थिती यामुळे प्रवाशांना मोठ्या त्रासाला सामोरे जावे लागत आहे.
दिवाळीनिमित्त गोरखपूर, दिल्ली, लखनऊ आणि पाटणा या शहरांकडे जाणाऱ्या रेल्वेगाड्यांमध्ये प्रवाशांची प्रचंड गर्दी होत आहे. विशेषतः जनरल आणि स्लीपर डब्यांची अवस्था अत्यंत बिकट झाली आहे. फलाटावर गाडी येताच डब्यात प्रवेश मिळवण्यासाठी प्रवाशांची एकच धावपळ सुरू होते.
हातातील सामान आणि मोठ्या बॅगा सांभाळत प्रवाशांना दरवाजातून आत जाण्यासाठी संघर्ष करावा लागत आहे. डब्यांमध्ये आधीच क्षमतेपेक्षा अधिक प्रवासी असल्याने उभे राहण्यासाठीही जागा मिळत नाही. विशेष गाड्यांच्या घोषणांनंतरही परिस्थितीत फारसा बदल झालेला नसल्याने रेल्वेच्या नियोजनावर प्रश्नचिन्ह निर्माण झाले आहे.
रेल्वे स्थानकावर प्रवाशांची एवढी मोठी गर्दी असताना सुरक्षेची जबाबदारी असलेल्या कर्मचाऱ्यांची उपस्थिती प्रभावीपणे जाणवत नसल्याचे चित्र आहे. उत्तर भारताकडे जाणाऱ्या गाड्यांजवळ गर्दी नियंत्रित करण्यासाठी पुरेसे सुरक्षारक्षक दिसत नसल्याने प्रवाशांच्या सुरक्षिततेचा प्रश्न ऐरणीवर आला आहे.
गाडीत चढताना होणारी धक्काबुक्की आणि दरवाजाजवळील गर्दी पाहता अपघाताची शक्यता नाकारता येत नाही. अशा वेळी एखादी दुर्घटना घडल्यास जबाबदारी कोणाची, असा सवाल उपस्थित होत आहे. गर्दीच्या काळात फलाटांवर अतिरिक्त सुरक्षारक्षक तैनात करणे आणि प्रवाशांना शिस्तबद्ध पद्धतीने डब्यात प्रवेश देणे आवश्यक असताना त्याकडे दुर्लक्ष होत असल्याची भावना प्रवाशांमध्ये आहे.
अनेक दिवस आधी आरक्षित तिकीट काढूनही प्रवाशांना आपल्या बर्थपर्यंत पोहोचण्यासाठी मोठी कसरत करावी लागत आहे. स्लीपर डब्यांमध्ये अनारक्षित प्रवाशांची गर्दी झाल्याने आरक्षित प्रवाशांनाही अडचणींचा सामना करावा लागत आहे. वातानुकूलित डब्यांमध्येही परिस्थिती फारशी वेगळी नाही. काही प्रवाशांना शौचालयाजवळील जागेत जमिनीवर बसून प्रवास करावा लागत आहे.
डब्यांमधील मार्गिका आणि शौचालयांकडे जाणारे रस्तेही प्रवाशांनी व्यापले आहेत. याचा सर्वाधिक त्रास महिला, लहान मुले आणि ज्येष्ठ नागरिकांना होत आहे. गर्दीमुळे महिलांच्या सुरक्षिततेचा आणि वैयक्तिक गोपनीयतेचाही प्रश्न निर्माण झाला आहे. घर गाठण्याच्या आनंदाने निघालेल्या प्रवाशांचा प्रवास मात्र गैरसोयी, अस्वस्थता आणि धक्काबुक्कीमुळे त्रासदायक ठरत आहे.
