Ashok Kharat Case : अरे हा माणूस आहे की शैतान! नवऱ्याला खोलीबाहेर ठेवून भोंदू बाबा खरातचा गरोदरबाईवर अत्याचार, गुन्हा दाखल

तथाकथित आध्यात्मिक गुरू आणि स्वतःला 'बाबा' म्हणवून घेणाऱ्या अशोक खरातचे काळे कारनामे आता एकामागून एक चव्हाट्यावर येऊ लागले आहेत. खरातविरोधात आता लैंगिक अत्याचाराचा आणखी एक अत्यंत गंभीर गुन्हा दाखल करण्यात आला आहे.

• अशोक खरातचे काळे कारनामे आता एकामागून एक चव्हाट्यावर
• पीडित महिला गर्भवती असताना असहायतेचा फायदा घेऊन अघोरी कृत्य
• संपूर्ण कुटुंबाला संपवून टाकण्याची धमकी

Ashok Kharat Case : नाशिकमध्ये सध्या खळबळ माजली आहे. तंत्र-मंत्र व अघोरी विद्येचा धाक दाखवून महिलांवर बलात्कार करणाऱ्या कॅप्टन अशोक खरात यांचं प्रकरण बरंच तापलं आहे.  तथाकथित आध्यात्मिक गुरू आणि स्वतःला ‘बाबा’ म्हणवून घेणाऱ्या अशोक खरातचे काळे कारनामे आता एकामागून एक चव्हाट्यावर येऊ लागले आहेत. नाशिकच्या सरकारवाडा पोलीस ठाण्यात खरातविरोधात आता लैंगिक अत्याचाराचा आणखी एक अत्यंत गंभीर गुन्हा दाखल करण्यात आला आहे. विशेष म्हणजे, पीडित महिला गर्भवती असताना तिच्या असहायतेचा फायदा घेऊन या नराधमाने अघोरी कृत्य केल्याचा खळबळजनक प्रकार समोर आला आहे.

Ashok Kharat : अशोक खरात प्रकरण पेटलं! तृप्ती देसाई आणि चाकणकरांमध्ये ‘कोट्यवधींची डील’?; रूपाली ठोंबरेंचा थेट आरोप

अघोरी कृत्ये आणि अमानवीय अत्याचार

तक्रारीनुसार, पीडित महिला जेव्हा गर्भवती होती, तेव्हा तिला ‘दोष निवारण’ आणि ‘पूजा विधी’च्या नावाखाली अशोक खरातकडे नेण्यात आले होते. यावेळी खरातने पीडितेच्या पतीला खोलीबाहेर बसवून आतमध्ये तिच्यावर लैंगिक अत्याचार केले असल्याचं समोर आलं आहे. इतकेच नव्हे, तर तो लोकांना घाबरवण्यासाठी नकली साप आणि नकली वाघाच्या कातड्याचा वापर करायचा. या वस्तू दाखवून तो ‘अघोरी शक्ती’ असल्याचे भासवायचा आणि लोकांच्या मनात भीती निर्माण करायचा असे प्रकार समोर येत आहे.

कुटुंबियांना जीवे मारण्याची धमकी

या नराधमाची दहशत इतकी होती की, त्याने पीडितेने कोणाकडे तोंड उघडल्यास तिला आणि तिच्या संपूर्ण कुटुंबाला संपवून टाकण्याची धमकी दिली होती. अघोरी कृत्यांच्या जोरावर तो पीडितेच्या मनात सतत भीती निर्माण करत असे. मात्र, खरातचे खरे रूप समोर येऊ लागल्यानंतर पीडितेने धीर एकवटून सरकारवाडा पोलिसांत धाव घेतली आणि आपल्यावर झालेल्या अन्यायाबाबत पोलिसांकडे तक्रार केली.

कडक कलमांखाली गुन्हा दाखल

अशोक खरातच्या या कृत्यांची दखल घेत पोलिसांनी त्याच्यावर केवळ लैंगिक अत्याचाराचेच नाही, तर महाराष्ट्र नरबळी आणि इतर अमानवीय अनिष्ट व अघोरी प्रथा आणि जादूटोणा प्रतिबंधक कायद्यांतर्गत (Anti-Superstition and Black Magic Act) विविध कलमान्वये गुन्हा दाखल केला आहे. नाशिकमध्ये धर्माच्या आणि अध्यात्माच्या नावाखाली महिलांचे शोषण करणाऱ्या या भोंदू बाबाच्या अटकेनंतर आता आणखी किती पीडिता समोर येतात, याकडे सर्वांचे लक्ष लागले आहे. अशा कोणत्याही भोंदूगिरीला बळी पडू नका आणि अन्याय झाला असल्यास न घाबरता पुढे येऊन तक्रार दाखल करा असं आवाहन पोलिसांनी नागरिकांना केलं आहे.

Nashik News : मंदिराच्या आडून कुकर्माचा आरोप; बाबा खरातला फाशी द्या, मिरगावात संताप