Ganeshotsav 2026: ७५७ गावांत रंगणार ‘एक गाव, एक गणपती’; सामाजिक एकोप्यासाठी जिल्हा पोलिसांचा विशेष उपक्रम

Ganeshotsav 2026: गणेशोत्सवाच्या माध्यमातून सामाजिक सलोखा आणि गावातील एकोपा अधिक दृढ करण्यासाठी जिल्हा पोलिसांनी राबवलेल्या ‘एक गाव, एक गणपती’ उपक्रमाला उत्स्फूर्त प्रतिसाद मिळाला आहे. यंदा जिल्ह्यातील तब्बल ७५७ गावांमध्ये ‘एक गाव, एक गणपती’ संकल्पनेनुसार गणेशोत्सव साजरा केला जाणार आहे.

• ‘एक गाव, एक गणपती’ला उत्स्फूर्त प्रतिसाद!
• जिल्ह्यातील ७५७ गावांचा सहभाग
• पोलिसांच्या प्रबोधनाला यश

नाशिक: शहरी भागात शेकडो गणेश मंडळांकडून धुमधडाक्यात गणेशोत्सव साजरा करण्यासाठी धडपड सुरू असताना, नाशिकच्या ग्रामीण भागात मात्र उत्सव आणि परंपरेचे मूळ स्वरूप जपण्याचा स्तुत्य उपक्रम पाहायला मिळत आहे. जिल्ह्यातील सामाजिक एकोपा आणि सलोखा अधिक दृढ करण्यासाठी ग्रामीण पोलिसांच्या प्रबोधनातून यंदा तब्बल निम्म्या जिल्ह्यात म्हणजे १ हजार ९३५ पैकी ७५७गावांमध्ये ‘एक गाव, एक गणपती’ ही संकल्पना राबवण्यात येत आहे. (Ganeshotsav 2026)

जिल्ह्यात २ हजारांहून अधिक मंडळांनी दाखल केले अर्ज

ग्रामीण भागात एकीकडे ‘एक गाव, एक गणपती’चे चित्र असताना, दुसरीकडे मोठ्या गावांमध्ये आणि तालुक्यांच्या ठिकाणी उत्सवाची तयारी अंतिम टप्प्यात आहे. जिल्ह्यातील ४० पोलीस ठाण्यांच्या हद्दीत सुमारे २ हजारांपेक्षा जास्त सार्वजनिक गणेश मंडळांनी परवानग्यांसाठी अर्ज दाखल केले आहेत.

Mumbai News: गणपती उत्सवासाठी मुंबई पोलिस दल झाले सज्ज! २५ हजारांहून अधिक अधिकारी-कर्मचारी बंदोबस्तासाठी राहणार तैनात

सामाजिक सलोखा आणि संभाव्य वादांना मिळाला पूर्णविराम

जिल्ह्यात गेल्या पाच-सहा वर्षांपासून ‘एक गाव, एक गणपती’ ही संकल्पना यशस्वीरीत्या राबवली जात आहे. त्यामुळे गावागावांतील लहान-मोठे तंटे, स्पर्धा आणि गटबाजी दूर होऊन सर्व धर्मीय व सर्व धडे एकत्र येऊन गणेशोत्सव साजरा करतात, सन २०१७ मध्ये जिल्ह्यातील तब्बल १,०२६ गावांनी हा उपक्रम राबवला होता, कोरोना काळानंतर काही ठिकाणी बदल झाले. असले तरी, २०२३ मध्ये ७३४ तर २०२५ मध्ये ८०४ गावांत ही परंपरा जपली गेली. यंदा २०२६ मध्ये ७५७ गावांनी या उपक्रमात सहभाग नोंदवला आहे. पोलिस अधीक्षक डॉ. डी. एस. स्वामी, अपर अधीक्षक विमला एम. आणि सूरज गुंजाळ यांनी गावपातळीवर प्रत्यक्ष बैठका घेऊन या उपक्रमाला विशेष प्रोत्साहन दिले आहे.

संवेदनशील भागात कडेकोट बंदोबस्त

गणेशोत्सव निर्विघ्नपणे पार पडावा यासाठी ग्रामीण पोलिसांनी कंबर कसली आहे. सर्व ४० पोलीस ठाण्याच्या हद्दीत शांतता समितीच्या बैठका घेण्यात आल्या, मालेगाव, मनमाड, येवला शहर आणि सटाणा या संवेदनशील भागांमध्ये अतिरिक्त पोलीस बल तैनात केले आहे. तसेच बॉम्बशोधक व नाशक पथक, दहशतवादविरोधी पथक आणि जलद प्रतिसाद पथक सतर्क ठेवण्यात आले आहे. गुडमॉर्निंग पथके, गस्ती पथके आणि बीट मार्शलच्या माध्यमातून प्रत्येक हालचालीवर नजर ठेवली जाणार असून, विसर्जन मिरवणुकीच्या वेळी दर दोन तासांनी पोलीस नियंत्रण कक्षात प्रत्येक घडामोडीची नोंद घेतली जाईल. पोलिसांच्या या नियोजनबद्ध प्रयत्नांमुळे यंदाचा गणेशोत्सव ग्रामीण भागात पुन्हा एकदा सौहार्द आणि उत्साहाचे प्रतीक ठरणार आहे.

शिवडीच्या राजाच्या अमृतमहोत्सवी वर्षात अनोखा देखावा; मुंबईत साकारली ‘पाण्याखालची द्वारका’