बसस्थानकच आले रस्त्यावर! तीन महिने प्रवाशांचे हाल, सिटीलिंकच्या केवळ एका बसला जागा
कुंभमेळ्यात येणाऱ्या भाविकांची आणि प्रवाशांची होणारी गर्दी लक्षात घेता महामंडळाने बस स्थानकाच्या पुनर्बाधणीचा निर्णय घेतला आहे. नाशिकहून पुणे, शिर्डी आणि अहिल्यानगरच्या दिशेने जाणाऱ्या एसटी बसेस आता उड्डाणपुलाखालील तात्पुरत्या प्रवासी निवाऱ्यातून आणि नियंत्रण कक्षातून चालवल्या जातील. इतर विभागांतून नाशिकरोड स्थानकात येणाऱ्या बसचालक व वाहकांना या बदलाबद्दल सूचना देण्यात आल्या असून, वाहतूक नियंत्रण कक्ष व कर्मचारी तात्पुरत्या ठिकाणी स्थलांतरित झाले आहेत.
एसटी बसेसचा नवीन थांबा थेट रस्त्यावर आणि नाशिकरोड पोलीस ठाण्यासमोर आल्याने मोठी वाहतूक कोंडी होण्याची शक्यता आहे. बिटको पॉईंट ते सिन्नर फाटा या उड्डाणपुलाखालील रस्त्यावर नेहमीच वाहनांची गर्दी असते. त्यातच पुढील तीन महिन्यांत गणेशोत्सव, नवरात्रोत्सव आणि दीपावली असे मोठे सण पार पडणार आहेत. या सण-उत्सवांच्या काळात रस्त्यावरच बसथांबा असल्याने वाहतुकीची कोंडी अटळ मानली जात असून, प्रवाशांची मोठी तारांबळ उडणार आहे. या गोंधळाचा फायदा घेऊन परजिल्ह्यातून आणि राज्यातून येणाऱ्या भाविकांची रिक्षाचालकांकडून भरमसाठ लूट होण्याचीही शक्यता व्यक्त केली जात आहे.
रेल्वे प्रवाशांच्या सुविधेसाठी सिटीलिंक प्रशासनाने बस स्थानकाच्या एका कोपऱ्यात दर पाच मिनिटांना एक बस उपलब्ध असेल अशी व्यवस्था आहे. उभी असलेली बस भरून निघाल्यानंतर दुसरी बस तत्काळ तेथे पाठवण्यात येणार आहे.मात्र, प्रवाशांची मोठी गर्दी लक्षात घेता ही यंत्रणा कितपत यशस्वी ठरते, हे पाहणे औत्सुक्याचे ठरेल. बस थांबा बनवण्यात आलेल्या ठिकाणी मोठ्या प्रमाणात वाहतुकीची कोंडी होत असते. आता येथेच बसस्थानक करण्यात आल्याने त्यात भर पडणार आहे. परिसरात आर्मीच्या वाहनांचीही मोठ्या प्रमाणात ये-जा सुरू असते. आता या वाहनांनाही मोठा त्रास सहन करावा लागणार आहे.
उड्डाणपुलाखाली २४-२५ वर्षांपासून शेकडो फेरीवाले व्यवसाय करत असून, एसटी बसेसमुळे त्यांचा रोजगार हिरावला जाईल. प्रशासनाने मनपा शाळा क्रमांक १२५ जवळील एसटीच्या पडीक भूखंडाचा पर्यायी जागा म्हणून वापर करावा, जेणेकरून फेरीवाल्यांचा रोजगार टिकेल, अन्यथा, लोकशाही व सनदशीर मार्गाने तीव्र जनआंदोलन छेडले जाईल, असा इशारा ‘श्रमशक्ती हॉकर्स सेल’चे डॉ. वसंत ठाकूर व दस्तगीर शेख यांनी मनपा आयुक्तांना दिलेल्या निवेदनातून दिला आहे.
परिवहन महामंडळाच्या बसेसला पोलिस ठाण्यासमोरच थांबा देण्यात आला आहे, हे काम पुढील तीन महिन्यात पूर्ण होणार आहे. रेल्वे प्रवाशांच्या सुविधेसाठी बस स्थानकाजवळच एक सिटीलिंक बस उभी करण्यात येणार असून, वाहतूक नियंत्रणासाठी पोलिसांची नियुक्ती करण्यात आली आहे.पोलिस निरीक्षक (वाहतूक शाखा) बडेसाहेब नाईकवाडे यांनी माहिती दिली.
.png "Videos"){kind=small}
