सोमवार, 21 सप्टेंबर 2026
शेतकऱ्यांसमोर नवे संकट..! प्रतिकूल हवामानाचा भात पिकाला फटका, भाताचा उत्पादन खर्च वाढला; तांदळाच्या दरवाढीची शक्यता
कोपर्डे हवेली परिसरातील भाताला राज्यभर मागणी आहे, दर्जेदार तांदळाची बाजारपेठेत स्वतंत्र ओळख निर्माण झाली आहे. मात्र, यंदा भात लागवडीपासूनच उत्पादन खर्चात वाढ झाली आहे. मजुरी, खते, औषधे, रोपांची लागवड, चिखलणी, मशागत, पाणी व्यवस्थापनासाठी मोठा खर्च करावा लागत आहे. त्यात आता किडी व रोगांच्या नियंत्रणासाठी फवारणीचा अतिरिक्त खर्च वाढला आहे.
Maharashtra Drought Declaration: शेतकऱ्यांसाठी मोठी बातमी! राज्यात १०० टक्के दुष्काळ जाहीर होणार
पानावरील अळी पानांच्या पाठीमागील बाजूस अंडी घालते. अळीचा प्रादुर्भाव वाढल्यास पानांचे नुकसान होऊन पिकाच्या वाढीवर परिणाम होण्याची शक्यता आहे. कडा करपा रोगामुळे पानांच्या कडांपासून तपकिरी डाग पडून पाने करपण्यास सुरुवात होते. वेळेत नियंत्रण न केल्यास उत्पादनावर परिणाम होऊ शकतो.
प्रतिकूल हवामानामुळे काही ठिकाणी भात पिकाच्या वाढीवर परिणाम होण्याची शक्यता शेतकऱ्यांकडून व्यक्त होत आहे. त्यामुळे चांगले उत्पादन घेण्यासाठी शेतकरी पिकाची नियमित पाहणी करून आवश्यक फवारणी करत आहेत. उत्पादन खर्च वाढल्याने आगामी काळात भात व तांदळाच्या दरात वाढ होण्याची शक्यता आहे. शेतकऱ्यांना योग्य बाजारभाव मिळणे आवश्यक असल्याचे मत व्यक्त होत आहे.
पावसाच्या अनिश्चिततेचा भातशेतीला फटका बसत असून पावसाअभावी भातपीक रोगाला बळी पडण्याची शक्यता वाढली आहे. पानांवर कडाकरपा आळी दिसून येत आहे. शिवारात किटक नाशक, बुरशीनाशक फवारण्या सुरू आहेत, अशी माहिती भात उत्पादक शेतकरी विक्रम चव्हाण यांनी दिली.
लागवडी, फवारणी बरोबर मजुरांचे वाढलेले दर जेरीस आणत आहेत. त्यातच उन पावसाच्या खेळामुळे भाताची वाढ खुंटली आहे. यंदा खर्च जास्त आणि उत्पादन कमी अशी परिस्थिती आहे. भाताची वाढ खुंटली असून फुटवा देखील निघाला नाही. उत्पादन खर्च वाढल्यामुळे तांदूळ देखील महागणार, अशी माहिती भात उत्पादक शेतकरी महादेव चव्हाण यांनी दिली.
