७० ट्रॅक्टर, तीन हार्वेस्टरचा अनोखा पोळा, देगावच्या घाडगे वस्तीवर ‘लोखंडी साथीदारां’चा सन्मान; फुलांनी सजवून काढली गावातून मिरवणूक

Pandharpur Degav Pola Festival News: पंढरपूर तालुक्यातील देगाव येथील घाडगे वस्तीवर पोळ्यानिमित्त शेतकऱ्यांच्या आधुनिक साथीदारांचा अनोखा सन्मान करण्यात आला. तब्बल ७० ट्रॅक्टर आणि तीन हार्वेस्टर मशिन धुवून, फुलांनी सजवून त्यांची गावातून मिरवणूक काढण्यात आली.

• ७० ट्रॅक्टर, तीन हार्वेस्टरचा अनोखा पोळा
• देगावच्या घाडगे वस्तीवर ‘लोखंडी साथीदारां’चा सन्मान
• फुलांनी सजवून काढली गावातून मिरवणूक

पंढरपूर: शेतकऱ्याच्या आयुष्याचा अविभाज्य भाग असलेल्या बैलांचा सन्मान करण्याची पोळ्याची परंपरा आजही कायम आहे. मात्र, बदलत्या काळानुसार शेतीचे स्वरूपही बदलले असून बैलांच्या जोडीला ट्रॅक्टरने महत्त्वाची भूमिका घेतली आहे. वर्षभर शेतकऱ्याच्या सेवेत राबणाऱ्या याच आधुनिक साथीदारांप्रती कृतज्ञता व्यक्त करण्यासाठी पंढरपूर तालुक्यातील देगाव येथील घाडगे वस्तीवर तब्बल ७० ट्रॅक्टर आणि तीन हार्वेस्टर मशिनचा अनोखा पोळा साजरा करण्यात आला.

राज्यातील शेतकऱ्यांची अवस्था अत्यंत बिकट, तातडीने दुष्काळ जाहीर करा, हेक्टरी ५० हजार रुपये द्या- हर्षवर्धन सपकाळ

देगावचे माजी उपसरपंच धर्माआबा घाडगे यांच्या सख्ख्या व चुलत बंधूंच्या कुटुंबांकडे एकूण ७० ट्रॅक्टर आणि तीन हार्वेस्टर मशीन आहेत. शेतीला जोडव्यवसाय म्हणून घाडगे कुटुंबीयांकडून ऊस वाहतुकीचा व्यवसाय केला जातो. अनेक वर्षांपासून हे ट्रॅक्टर ऊस वाहतुकीच्या माध्यमातून शेतकरी आणि साखर कारखान्यांच्या सेवेत धावत आहेत. पोळ्याच्या निमित्ताने या ‘लोखंडी साथीदारांचा’ सन्मान करण्यासाठी सर्व ट्रॅक्टर व हार्वेस्टर प्रथम वॉशिंग सेंटरवर नेऊन स्वच्छ धुवून घेण्यात आले. त्यानंतर प्रत्येक ट्रॅक्टरला रंगीबेरंगी फुलांच्या आकर्षक माळांनी सजविण्यात आले. फुलांनी सजलेले ७० ट्रॅक्टर आणि तीन हार्वेस्टर एकाच ठिकाणी पाहण्याचा अनोखा अनुभव ग्रामस्थ व परिसरातील नागरिकांना मिळाला.सजविलेल्या ट्रॅक्टरची गावातून मिरवणूक काढण्यात आली.

परंपरेचा सन्मान आणि आधुनिक शेतीचा स्वीकार

पारंपरिक पोळ्याला आधुनिक शेतीची जोड देणाऱ्या या मिरवणुकीने परिसराचे लक्ष वेधून घेतले. घाडगे वस्तीवरील महिला भगिनींसह कुटुंबातील सदस्यांनीही उत्स्फूर्त सहभाग घेतला. संतोष शिंदे, तानाजी घाडगे, राजेंद्र घाडगे, शहाजी घाडगे, भीमराव घाडगे यांच्यासह घाडगे वस्तीवरील महिला व कुटुंबीय मोठ्या संख्येने सहभागी झाले. परंपरेचा सन्मान आणि आधुनिक शेतीचा स्वीकार यांचा संगम घडविणारा हा ‘ट्रॅक्टर पोळा’ देगाव परिसरात चर्चेचा व आकर्षणाचा विषय ठरला. पूर्वी बैलांना सजवून त्यांची पूजा केली जात होती; आज त्याच कृतज्ञतेच्या भावनेतून ट्रॅक्टरला सजवून त्याचा सन्मान केला जात असल्याचे यावेळी दिसून आले.

देगावचे माजी उपसरपंच, धर्माआबा घाडगे म्हणाले की, आमच्या घाडगे कुटुंबाकडे एकूण ७० ट्रॅक्टर आणि तीन हार्वेस्टर मशीन आहेत. सर्वांना सोबत घेऊन आम्ही ऊस वाहतुकीचा व्यवसाय करतो. त्यातून उदरनिर्वाहाबरोबरच कुटुंबाची प्रगतीही साधता आली. शेतकऱ्याचा बैल जसा त्याचा साथीदार मानला जातो, त्याचप्रमाणे आज ट्रॅक्टरही शेतकऱ्याचा साथीदार झाला आहे. वर्षभर त्याच्याकडून काम करून घेतो, त्यामुळे पोळ्याच्या दिवशी त्यालाही सजवून त्याचा सन्मान केला पाहिजे. याच भावनेतून हा आनंदोत्सव साजरा केला.

अत्यंत दिलासादायक! Pune Mhada चा मोठा निर्णय; ‘या’ तारखेपर्यंत देण्यात आली मुदतवाढ