खडकवासला धरणसाखळीत 88 टक्के पाणीसाठा; गेल्यावर्षी याच कालावधीत धरणसाठा होता 99.74 टक्के

जलसंपदा विभागाने जाहीर केलेल्या भीमा खोरे पूरनियंत्रण अहवालातून ही माहिती समोर आली आहे. खडकवासला प्रकल्पाच्या एकूण साठ्याची क्षमता ८७७.७० दशलक्ष घनमीटर असून, सध्या जलाशयात ७८१.५२ दशलक्ष घनमीटर पाणी आहे.

पुणे : पुणे शहराला पाणीपुरवठा करणाऱ्या धरणसाखळीतील पाणीसाठ्यात गतवर्षीच्या तुलनेत घट झाली आहे. जलसंपदा विभागाच्या १५ ऑक्टोबर रोजी सायंकाळी पाच वाजताच्या अहवालानुसार, खडकवासला प्रकल्पातील एकूण उपयुक्त पाणीसाठा ७२७.३४ दशलक्ष घनमीटर (८.०९ टीएमसी) असून, तो ८८.०९ टक्के आहे. गेल्यावर्षी याच कालावधीत हा साठा ९९.७४ टक्के होता. त्यामुळे यंदा पाणीसाठ्यात लक्षणीय घट झाल्याचे स्पष्ट झाले आहे.

जलसंपदा विभागाने जाहीर केलेल्या भीमा खोरे पूरनियंत्रण अहवालातून ही माहिती समोर आली आहे. खडकवासला प्रकल्पाच्या एकूण साठ्याची क्षमता ८७७.७० दशलक्ष घनमीटर असून, सध्या जलाशयात ७८१.५२ दशलक्ष घनमीटर पाणी आहे. त्यापैकी उपयुक्त पाणीसाठा ७२७.३४ दशलक्ष घनमीटर आहे. गतवर्षी याच दिवशी उपयुक्त पाणीसाठा ८२३.५२ दशलक्ष घनमीटर होता. पुणे शहराची पाण्याची गरज भागविण्यासाठी खडकवासला, पानशेत, वरसगाव आणि टेमघर या धरणांमधील पाणीसाठ्याला महत्त्व आहे.

यंदाच्या पाणीसाठ्यात गतवर्षीच्या तुलनेत घट झाल्याने आगामी काळातील पाण्याचे नियोजन महत्त्वाचे ठरणार आहे. उपलब्ध साठा, शहराची वाढती पाण्याची मागणी आणि सिंचनासाठी आवश्यक असलेले पाणी यांचा विचार करून जलसंपदा विभागाला पाणीवाटपाचे नियोजन करावे लागणार आहे. दरम्यान, भीमा खोऱ्यातील विविध धरणे आणि नद्यांच्या पातळीवरही जलसंपदा विभाग लक्ष ठेवून आहे.

केंद्रांवरील पाण्याची पातळी गेजपट्टीच्या खाली

पूरनियंत्रण अहवालात मुंढवा केटी वेअर, दौंड येथील भीमा नदी, नीरा नरसिंहपूर आणि पंढरपूर येथील विसर्ग मापन केंद्रांची माहिती नोंदविण्यात आली आहे. अहवालानुसार, या केंद्रांवरील पाण्याची पातळी गेजपट्टीच्या खाली असल्याची नोंद आहे.

दुष्काळाचा घाव, शेतकऱ्यांच्या पदरी नुकसान

पावसाने ओढ दिल्याने खरीप हंगामातील पिके संकटात सापडली असतानाच वाढत्या तापमानामुळे शेतकऱ्यांची चिंता आणखी वाढली आहे. शेतातील पिकांची आजची स्थिती पाहून नुकसान निश्चित करण्याऐवजी, आगामी काळात होणारे संभाव्य नुकसानही विचारात घेण्याची भूमिका कृषी विभागाने घेतली आहे. विशेषतः गाळपाच्या प्रतीक्षेत असलेल्या उसाचे भवितव्य आणि ऑक्टोबर हीटचा पिकांवर होणारा परिणाम लक्षात घेऊन पंचनामे केले जात आहेत. पुणे जिल्ह्यातील आठ तालुक्यांमध्ये आतापर्यंत सुमारे एक लाख ३९ हजार हेक्टर क्षेत्रावरील पंचनामे पूर्ण झाले असून, दोन लाख ३७ हजार ३८२ खातेदारांच्या नुकसानीची नोंद करण्यात आली आहे.

12 सवलतींच्या अंमलबजावणीचा आढावा

जिल्ह्यात दुष्काळ जाहीर करण्यात आलेल्या दहा तालुक्यांमध्ये शासनाकडून देण्यात येणाऱ्या १२ प्रकारच्या सवलती आणि उपाययोजनांच्या अंमलबजावणीचा निवासी उपजिल्हाधिकारी ज्योती कदम यांनी गुरुवारी दूरदृश्य प्रणालीद्वारे घेतलेल्या बैठकीत आढावा घेतला. दुष्काळग्रस्त भागातील शेतकरी, शेतमजूर, विद्यार्थी आणि पशुधनाला दिलासा देण्यासाठी शासनाकडून विविध सवलती आणि उपाययोजना राबविण्यात येत आहेत. दुष्काळी परिस्थिती लक्षात घेऊन आवश्यक उपाययोजनांचे प्रभावी नियोजन करावे, असे निर्देश निवासी उपजिल्हाधिकारी ज्योती कदम यांनी संबंधित अधिकाऱ्यांना दिले.

Crime News : ‘पोलिस अधिकारी आहे’ म्हणत धमकी; ऑनलाइन गेममधील मैत्रीचा इंजिनिअरला बसला फटका