मायमर रुग्णालयात शिक्षिकेसह नवजात बाळाचा मृत्यू; उपचारातील हलगर्जीपणाच्या आरोपांनी खळबळ

मावळ तालुक्यातील तळेगाव दाभाडे येथील मायमर रुग्णालयात प्रसूतीदरम्यान एका ३८ वर्षीय शिक्षिकेचा मृत्यू झाल्यानंतर तिच्या नवजात बाळाचाही मृत्यू झाल्याने परिसरात खळबळ उडाली आहे.

वडगाव मावळ : मावळ तालुक्यातील तळेगाव दाभाडे येथील मायमर रुग्णालयात प्रसूतीदरम्यान एका ३८ वर्षीय शिक्षिकेचा मृत्यू झाल्यानंतर तिच्या नवजात बाळाचाही मृत्यू झाल्याने परिसरात खळबळ उडाली आहे. उपचारादरम्यान शिकाऊ डॉक्टरांकडून उपचार करण्यात आले, तसेच गंभीर परिस्थितीत आवश्यक वैद्यकीय सुविधा वेळेत उपलब्ध करून देण्यात आल्या नाहीत, असा आरोप मृत महिलेच्या नातेवाइकांनी केला आहे. या प्रकरणाची सखोल चौकशी करून दोषींवर कारवाई करण्याची मागणी नातेवाइकांनी केली आहे.

रूपाली सोमनाथ इंदलकर (वय ३८, रा. कुसगाव, ता. मावळ) असे मृत शिक्षिकेचे नाव आहे. तळेगाव दाभाडे पोलिसांकडून मिळालेल्या माहितीनुसार, रूपाली यांना मंगळवारी (दि. १८) दुपारी त्रास जाणवू लागल्याने मायमर रुग्णालयात आणण्यात आले. प्राथमिक तपासणीनंतर त्यांना सायंकाळी सुमारे पाच वाजता रुग्णालयात दाखल करण्यात आले. त्यानंतर त्यांचा रक्तदाब वाढल्याने त्यांना अतिदक्षता विभागात दाखल करण्यात आले. प्रकृती गंभीर असल्याने डॉक्टरांनी तातडीने प्रसूती करण्याचा निर्णय घेतला. सायंकाळी सुमारे सहा वाजता प्रसूती करण्यात आली. मात्र, याचदरम्यान रूपाली इंदलकर यांचा मृत्यू झाला. त्यानंतर नवजात बाळाची प्रकृतीही गंभीर असल्याने त्याला पुढील उपचारांसाठी ससून रुग्णालयात हलविण्यात आले. रात्री सुमारे नऊ वाजता बाळाला ससून रुग्णालयात दाखल करण्यात आले. मात्र, तेथील डॉक्टरांनी बाळाला मृत घोषित केले.

या घटनेनंतर मृत महिलेच्या नातेवाइकांनी रुग्णालय प्रशासनाच्या कार्यपद्धतीवर प्रश्न उपस्थित केले आहेत. गंभीर परिस्थिती असताना आवश्यक तज्ज्ञ डॉक्टरांची तत्काळ उपलब्धता होती का, उपचारांची प्रक्रिया योग्य पद्धतीने करण्यात आली का, तसेच रुग्णाला वेळेत आवश्यक सुविधा मिळाल्या का, याची चौकशी करण्याची मागणी त्यांनी केली आहे.

कार्डियाक रुग्णवाहिकेऐवजी साध्या रुग्णवाहिकेचा वापर

नवजात बाळाला ससून रुग्णालयात हलविताना कार्डियाक सुविधायुक्त रुग्णवाहिकेऐवजी साध्या रुग्णवाहिकेचा वापर करण्यात आल्याचा आरोपही नातेवाइकांनी केला आहे. गंभीर रुग्णाच्या स्थलांतरासाठी आवश्यक वैद्यकीय उपकरणे, प्रशिक्षित कर्मचारी आणि इतर सुविधा रुग्णवाहिकेत उपलब्ध होत्या का, याचीही चौकशी व्हावी, अशी मागणी करण्यात आली आहे. गंभीर परिस्थितीत उपचार सुरू असताना शिकाऊ डॉक्टरांकडून उपचार करण्यात आल्याचा आरोपही नातेवाइकांनी केला आहे. आवश्यक तज्ज्ञ डॉक्टर वेळेत उपलब्ध होते का, यासह उपचाराच्या संपूर्ण प्रक्रियेची वैद्यकीयदृष्ट्या तपासणी करण्याची मागणी करण्यात आली आहे.

हे सुद्धा वाचा : कान्हे येथे 105 ग्रॅम गांजा जप्त, 55 वर्षीय व्यक्तीविरुद्ध गुन्हा दाखल; वडगाव मावळ पोलिसांची कारवाई 

आमदार शेळके यांची रुग्णालयास भेट

मावळचे आमदार सुनील शेळके यांनी बुधवारी मायमर रुग्णालयास भेट देऊन घटनेची माहिती घेतली. यापूर्वीही रुग्णालयात अशा स्वरूपाच्या चार ते पाच घटना घडल्याचा दावा करत या प्रकरणी आरोग्यमंत्र्यांकडे एसआयटी स्थापन करण्याची मागणी करणार असल्याचे त्यांनी सांगितले. तसेच पोलिसांना या घटनेचा तपास करण्याच्या सूचना दिल्या. दरम्यान, उपचारातील नेमकी त्रुटी आणि मृत्यूचे कारण काय, हे शवविच्छेदन व वैद्यकीय तपासणीनंतरच स्पष्ट होणार आहे. नातेवाइकांनी केलेल्या आरोपांची स्वतंत्र चौकशी झाल्यानंतरच या प्रकरणातील वस्तुस्थिती समोर येणार आहे.