राष्ट्रीय महामार्गावर जड वाहनांसाठी Runaway/ Escape Ramp उभारा; रविंद्र साळेगावकर यांची गडकरींकडे मागणी 

राष्ट्रीय महामार्गावर जड वाहनांच्या वाढत्या वाहतुकीच्या पार्श्वभूमीवर अपघातांचे प्रमाण कमी करण्यासाठी महत्त्वाच्या व अपघातप्रवण ठिकाणी Runaway / Escape Ramp उभारण्यात यावेत, अशी मागणी रविंद्र साळेगावकर यांनी केली आहे. 

पुणे : राज्यासह देशभरात अपघाताच्या घटना वाढत असून, देशातील राष्ट्रीय महामार्गावर जड वाहनांच्या वाढत्या वाहतुकीच्या पार्श्वभूमीवर अपघातांचे प्रमाण कमी करण्यासाठी महत्त्वाच्या व अपघातप्रवण ठिकाणी Runaway / Escape Ramp उभारण्यात यावेत, अशी मागणी भाजप पुणे शहर सरचिटणीस व पुणे महानगरपालिका नगरसेवक रविंद्र साळेगावकर यांनी केंद्रीय रस्ते वाहतूक व महामार्ग मंत्री नितीन गडकरी यांच्याकडे केली आहे.

देशातील अनेक राष्ट्रीय महामार्गांवर मोठ्या प्रमाणात जड वाहनांची वाहतूक होते. अनेकदा वाहनांचे अचानक ब्रेक फेल होणे, तांत्रिक बिघाड होणे किंवा उताराच्या रस्त्यावर वाहनाचा वेग नियंत्रणाबाहेर जाणे यामुळे गंभीर अपघात घडतात. अशा परिस्थितीत चालकाला वाहन सुरक्षितपणे मुख्य मार्गापासून दूर घेऊन नियंत्रित पद्धतीने थांबविण्यासाठी Runaway /Escape Ramp अत्यंत उपयुक्त ठरू शकतो. विशेषतः पुणे परिसरातील काही अपघातप्रवण ठिकाणी ब्रेक फेल होणे, उतारावरून वेगाने येणारी जड वाहने आणि वाहतूक कोंडी यामुळे गंभीर अपघात घडत असल्याचे निदर्शनास येते. त्यामुळे नागरिकांच्या सुरक्षिततेच्या दृष्टीने अशा ठिकाणांची तांत्रिक पाहणी करून आवश्यक त्या ठिकाणी एस्केप रॅम्पची सुविधा उपलब्ध करून देणे गरजेचे आहे.

देशातील सर्व राष्ट्रीय महामार्गाचे सुरक्षा ऑडिट व तांत्रिक सर्वेक्षण करून अपघातप्रवण आणि तीव्र उताराच्या ठिकाणी आवश्यकतेनुसार Runaway / Escape Ramp उभारण्याबाबत केंद्र सरकारने तातडीने धोरणात्मक निर्णय घ्यावा, अशी मागणी साळेगावकर यांनी केली आहे. या सुविधेमुळे ब्रेक फेल किंवा तांत्रिक बिघाड झालेल्या जड वाहनांना सुरक्षितपणे थांबविण्यास मदत होऊन मोठ्या प्रमाणावर होणारे अपघात टाळता येतील. तसेच वाहनचालक, प्रवासी आणि इतर नागरिकांच्या जीविताचे संरक्षण होण्यास मदत होईल. “नागरिकांच्या जीविताची सुरक्षा ही सर्वोच्च प्राथमिकता असून, राष्ट्रीय महामार्गांवरील अपघात कमी करण्यासाठी आधुनिक आणि प्रभावी सुरक्षा उपाययोजना राबविणे आवश्यक आहे. Runaway / Escape Ramp ही त्यासाठी महत्त्वाची सुविधा ठरू शकते,” असे रविंद्र साळेगावकर यांनी सांगितले.

हे सुद्धा वाचा : वाहतूक पोलिसांचा आता पालिकेला ‘अलर्ट’; कारणे शोधून उपाययोजना करण्याचे पोलिस आयुक्तांचे निर्देश