पुरंदर तालुक्यात गॅस वितरण व्यवस्थेचा बोजवारा, वशिलेबाजांना प्राधान्य; सामान्य नागरिक मात्र रांगेत उभा

पुरंदर तालुक्यात सिलिंडर गॅस वितरणाचा पूर्ण बोजवारा उडाला आहे. गावोगावचे छोटे वितरक आणि ग्राहकांमध्ये वाद होत आहेत.

• पुरंदर तालुक्यात गॅस वितरण व्यवस्थेचा बोजवारा
• वशिलेबाजांना प्राधान्य
• सामान्य नागरिक मात्र रांगेत उभा

सासवड/संभाजी महामुनी : पुरंदर तालुक्यात सिलिंडर गॅस वितरणाचा पूर्ण बोजवारा उडाला आहे. नियमाप्रमाणे बुकिंग केल्यानंतर निर्धारित वेळेत सिलेंडर टाकी मिळणे अपेक्षित आहे. मात्र, सासवडमधून ग्रामीण भागातील वितरकांकडे होणारा पुरवठा पूर्णपणे बंद केल्याने नागरिकांना सासवडच्या केंद्रावर नाईलाजास्तव उन्हात तासनतास उभे राहावे लागत आहे. वशिलेबाजांना प्राधान्य दिले जात आहे. सामान्य नागरिक मात्र रांगेत उभा आहेत, असं नागरिकांनी सांगितलं आहे.

 

युद्धजन्य परिस्थितीत केंद्र आणि राज्य शासनाने नागरिकांना घरगुती आणि व्यावसायिक सिलिंडर गॅस वापरावर मोठ्या प्रमाणात निर्बंध आणले आहेत. त्यामुळे वर्षानुवर्षे सिलिंडरवरती अवलंबून असलेल्या कुटुंबियांच्या मोठ्या प्रमाणात अडचणी वाढल्या आहेत. सासवडमधील प्रविण गॅस एजन्सी हे पुरंदर तालुक्याचे गॅस वितरणाचे मुख्य केंद्र आहे. येथूनच तालुक्याच्या ग्रामीण भागात सिलिंडर टाक्यांचा पुरवठा करण्यात येतो. युद्धजन्य परिस्थितीत वितरण व्यवस्थेवर मोठा परिणाम झाला आहे. परिणामी सासवडमधून ग्रामीण भागातील पुरवठा पूर्णपणे बंद केला आहे. त्यामुळे गावोगावचे छोटे वितरक आणि ग्राहकांमध्ये वाद होण्यास सुरुवात झाली.

हे सुद्धा वाचा : सिलेक्टिव्ह व्हिडिओ लिक करण्यामागे गृहविभागाचा कुटील डाव; खरात प्रकरणावरुन काँग्रेसचा आरोप

वितरण निरीक्षक नामधारी आणि कुचकामी

पुरंदर तालुक्यातील नागरिकांना सिलिंडर टाक्यांचा पुरवठा सुरळीत व्हावा, नागरिकांना त्रास होवू नये यासाठी तहसील कार्यालयाकडून गोपाळ ठाकरे हे पुरवठा आणि वितरण निरीक्षक म्हणून कामकाज पाहत आहेत. मात्र, सासवडच्या वितरण केंद्रावर ग्राहकांची शेकडोंच्या संख्येने गर्दी होत आहे. तरीही वितरक आणि ग्राहक यांच्यात अक्षरशः हाणामारीच्या घटना घडत आहेत, पोलिसांना बोलावून परिस्थिती शांत करण्याचा प्रयत्न केला जात आहे. पण, पुरवठा निरीक्षक गोपाळ ठाकरे हे कुठेही दिसून येत नाहीत. पुरवठा निरीक्षक केवळ नामधारी आणि कुचकामी ठरले आहेत.