Jay Pawar : जय पवार यांचे पुरुषोत्तम जगतापांवर कारवाईचे संकेत, ‘हे’ आहे कारण…

Jay Pawar : मंगळवारी जय पवार यांच्या हस्ते सोमेश्वर सहकारी साखर कारखान्याच्या निवडणुकीसाठीच्या जाहीरनाम्याचे प्रकाशन करण्यात आले. यावेळी त्यांनी साखर कारखान्याच्या अध्यक्षांवर कारवाईचे संकेत दिले.

• लोकनेते अजितदादा पवार पॅनलचा जाहीरनामा प्रकाशित
• कारखाना अध्यक्षांवर कारवाईचे संकेत
• पॅनलला शेतकऱ्यांचा भरघोष पाठींबा

 

सोमेश्वर सहकारी साखर कारखान्याच्या निवडणुकीमध्ये एक महत्त्वाची घडामोडी ठरली आहे. राष्ट्रवादीचे (अजीत पवार गट) युवा नेते जय पवार (Jay Pawar) यांनी कारखान्याचे अध्यक्ष पुरुषोत्तम जगताप यांच्यावर कारवाई करणार असल्याचे संकेत दिले आहेत.

सोमेश्वर सहकारी साखर कारखान्याच्या निवडणुकीमध्ये कारखान्याचे अध्यक्ष पुरुषोत्तम जगताप हे अजितदादांच्या आवाजाचा व्हिडिओ तसेच उपमुख्यमंत्री सुनेत्रा पवार यांच्या व्हिडिओचा वापर प्रचारामध्ये करत असल्याचे निदर्शनास आले आहे. याप्रकरणी जगताप यांच्यावर कारवाई करणार असल्याची माहिती जय पवार यांनी पत्रकार परिषदेत बोलताना दिली.

पॅनलचा जाहीरनामा प्रकाशित

बारामती येथील सहयोग या निवासस्थानी आयोजित पत्रकार परिषदेत श्री सोमेश्वर सहकारी साखर कारखान्याच्या निवडणुकीमधील राष्ट्रवादी काँग्रेस पुरुस्कृत लोकनेते अजितदादा पवार पॅनलचा जाहीरनामा जय पवार यांच्या हस्ते प्रकाशित करण्यात आला. यावेळी जय पवार यांनी प्रसारमाध्यमांशी संवाद साधताना विविध विषयांवर भाष्य केले. यावेळी राष्ट्रवादीचे जिल्हाध्यक्ष राजेंद्र कोरेकर, माजी नगरसेवक किरण गुजर, राष्ट्रवादीचे तालुकाध्यक्ष संदीप बांदल, पंचायत समितीचे सभापती किरण तावरे उपस्थित होते.

जगतापांवर कारवाई करणार

यावेळी जय पवार म्हणाले, पुरुषोत्तम जगताप यांनी बंड केल्यानंतर त्यांनी अजितदादांच्या नावाचा व फोटोचा वापर आपल्या प्रचारामध्ये करण्याचा प्रयत्न केला. त्यावेळी निवडणूक निर्णय अधिकाऱ्यांकडे तक्रार करून अजितदादांचे फोटो न वापरण्याचे आदेश त्यांना निवडणूक निर्णय अधिकाऱ्यांनी दिले. त्यांच्या भूमिकेबद्दल आम्ही कोणतीही कारवाई करणार नव्हतो. मात्र त्यांनी आपल्या प्रचारामध्ये उपमुख्यमंत्री सुनेत्रा पवार यांच्या व्हिडिओचा वापर त्यांच्या प्रचारामध्ये केल्याचे आढळले आहे.
दादांच्या आवाजाचा ऑडिओ देखील त्यांनी वापरला असल्याचे दिसून आले. या पार्श्वभूमीवर आम्ही त्यांच्यावर कारवाई करणार आहोत. याबाबत कारवाई बाबतचा विचार सुरू आहे. अजितदादांनी पुरुषोत्तम जगताप यांच्यावर गेल्या अनेक वर्ष मनापासून प्रेम करून त्यांना 13 वर्ष सोमेश्वर कारखान्याचे अध्यक्ष केले, मात्र त्यांनी अशी भूमिका घ्यायला नको होती.

Ulhasnagar Traffic Jam : वाहतूक कोंडीने गाठली परिसीमा! रुग्णालय गाठण्याआधीच रिक्षेत महिलेची प्रसूती

जगताप यांच्यावर कारवाई करण्यासंदर्भात पक्षाच्या पदाधिकाऱ्यांशी चर्चा करून याबाबतचा निर्णय माध्यमांना कळवला जाईल. राष्ट्रवादीतील विविध संस्थांचे काही पदाधिकारी जगताप यांच्याबरोबर प्रचारात असल्याच्या प्रश्नाबाबत जय पवार म्हणाले, आम्ही सुरुवातीला पुरुषोत्तम जगताप यांच्यावर कारवाई करू, त्यानंतर संबंधित पदाधिकाऱ्यांवर कोणता निर्णय घ्यायचा, याचा देखील निर्णय घेऊ.

तसेच सोमेश्वर सहकारी साखर कारखाना, अजितदादांच्या विचारानुसार सभासदांच्या हितासाठी व्यवस्थितपणे चालवला जाईल. याची जाणीव सर्व सभासदांना आहे, त्यामुळेच उत्स्फूर्तपणे शेतकऱ्यांचा प्रतिसाद आम्हाला मिळत असल्याचे जय पवार यांनी यावेळी सांगितले.