Crime News: सुरुवातीला अपघाती मृत्यूची नोंद; काडतूस सापडताच हत्येचा उलगडा, सीसीटीव्हीत दोन हल्लेखोर कैद

कारेगावात पाण्याचा प्लँट सुरू करण्यासाठी आलेल्या ३९ वर्षीय कामगाराची दुचाकीवरून आलेल्या दोघांनी डोक्यात गोळी झाडून हत्या केली. घटनास्थळी काडतूस सापडल्यानंतर अपघाती मृत्यूचे गूढ उकलले.

• प्लँट सुरू करताना कामगाराच्या डोक्यात गोळी
• काडतूस सापडल्याने अपघाती मृत्यूचा संशय दूर
• सीसीटीव्हीत दोन हल्लेखोर कैद; पोलिसांचा तपास सुरू

 

शिरूर : पुणे जिल्ह्यातील शिरूर तालुक्यात कारेगाव परिसरात मंगळवारी पहाटे ३९ वर्षीय कामगाराची गोळी झाडून हत्या करण्यात आली. हामजा उस्मान शेख (वय ३९, मूळ रा. परभणी, सध्या रा. कारेगाव) हे साईनगर परिसरातील ‘समू एंटरप्रायजेस ॲक्वा रिच’ या पाण्याच्या प्रकल्पावर काम करत होते. पहाटे सव्वासहाच्या सुमारास ते नेहमीप्रमाणे प्लँट सुरू करण्यासाठी आले असताना दुचाकीवरून दोन अज्ञात व्यक्ती तेथे आल्या. मागे बसलेल्या व्यक्तीने दुचाकीवरून उतरून प्लँटच्या दारात जात हामजा यांच्या डोक्याच्या मागील बाजूस गोळी झाडली. गोळी डोक्यातून आरपार गेल्याने ते जागीच रक्ताच्या थारोळ्यात कोसळले. गोळीबाराचा आवाज परिसरातील नागरिकांना फटाक्यासारखा ऐकू आला.

हेही वाचा: केतन हत्या प्रकरणात ५५०० पानी आरोपपत्र; सियाच्या जुन्या प्रेमप्रकरणापासून कोट्यवधींच्या लग्नाच्या तयारीपर्यंत धक्कादायक माहिती

काडतूस सापडले अन् अपघाती मृत्यूचा संशय दूर

गोळीबारानंतर शेजारील एका महिलेने हामजा यांच्या पत्नीला ते रक्तबंबाळ अवस्थेत पडल्याची माहिती दिली. कुटुंबीयांनी त्यांना तातडीने रुग्णालयात नेले; मात्र डॉक्टरांनी त्यांना मृत घोषित केले. सुरुवातीला हामजा घसरून पडल्याने डोक्याला दुखापत झाली असावी, असा अंदाज व्यक्त झाल्याने रांजणगाव एमआयडीसी पोलिसांनी अकस्मात मृत्यूची नोंद केली होती. मात्र, घटनास्थळी पंचनामा करताना पोलिसांना बंदुकीच्या गोळीचे रिकामे काडतूस आढळले. त्यामुळे संशय बळावला. त्यानंतर मृतदेहाची बारकाईने तपासणी केली असता डोक्याला गोळी लागल्याचे स्पष्ट झाले आणि हा अपघात नसून हत्या असल्याचे समोर आले.

हेही वाचा:Mumbai News: सचिन वाझेंच्या जामिनावर कोर्टाचा निर्णय; अँटिलिया प्रकरणातील साडेपाच वर्षांचा कारावास

सीसीटीव्हीत दोन हल्लेखोर कैद; हत्येचे कारण अद्याप अस्पष्ट

पोलिसांनी तपासाची दिशा बदलत परिसरातील सीसीटीव्ही फुटेज तपासले. त्यामध्ये दुचाकीवरून आलेल्या दोन अज्ञात हल्लेखोरांनी हामजा यांच्यावर गोळीबार केल्याचे दिसून आले. या प्रकरणी मृताची पत्नी अबिदाबी यांच्या फिर्यादीवरून रांजणगाव एमआयडीसी पोलिस ठाण्यात अज्ञात आरोपींविरुद्ध खुनाचा गुन्हा दाखल करण्यात आला आहे. हामजा यांची हत्या नेमक्या कोणत्या कारणातून करण्यात आली, याचा तपास पोलिसांकडून सुरू असून हल्लेखोरांचा शोध घेण्यासाठी पोलिसांनी सीसीटीव्ही फुटेज आणि अन्य पुराव्यांच्या आधारे तपास सुरू केला आहे.