Weather Update : पहाटे दाट धुके तर दुपारी कडक उन्ह अन् रात्री पुन्हा थंडी; राज्यात संमिश्र हवामान (File Photo)
पुणे : सध्या नोव्हेंबर महिना सुरु आहे. तरीही अपेक्षित असा गारठा अद्याप अनुभवायला मिळत नाही. राज्यात सध्या हवामानाचे संमिश्र स्वरूप पाहायला मिळत आहे. पहाटेच्या वेळी गुलाबी थंडीचा अनुभव येत असतानाच दुपारच्या सत्रात उन्हाचा चटका जाणवत आहे. त्यात भारतीय हवामान विभागाने राज्यातील हवामानाबाबत अंदाज वर्तवला आहे. या अंदाजानुसार, कोकणापासून विदर्भापर्यंत राज्याच्या बहुतांश भागांत हवामान कोरडे राहण्याची शक्यता आहे.
हवामान विभागाच्या अंदाजानुसार, पहाटे अनेक ठिकाणी धुके आणि गारवा जाणवेल, तर दुपारी तापमानात वाढ होऊन उष्णता कायम राहण्याचा अंदाज आहे. राज्यातील अनेक जिल्ह्यांचा यात समावेश करण्यात आला आहे. पुणे, सोलापूर, कोल्हापूर, सातारा आणि सांगली जिल्ह्यांत हवामान कोरडे राहण्याची शक्यता आहे. पहाटे गारवा, तर दुपारी उन्हाचा चटका जाणवेल. काही ठिकाणी दुपारनंतर किंवा संध्याकाळी आकाश अंशतः ढगाळ होऊ शकते. पुण्यात किमान तापमान 14 अंश सेल्सिअस, तर कमाल तापमान 31 अंश सेल्सिअसच्या आसपास राहण्याचा अंदाज आहे. असे जरी असले तरी मुंबई, ठाणे, पालघर, रायगड, रत्नागिरी आणि सिंधुदुर्ग या जिल्ह्यांमध्ये हवामानाचा कोणताही विशेष इशारा देण्यात आलेला नाही.
याशिवाय, मुंबईसह परिसरात सकाळच्या वेळी धुके किंवा धूसर वातावरण राहण्याची शक्यता आहे. त्यानंतर दिवसभर आकाश मुख्यतः निरभ्र राहील. त्यामुळे कोकणात पावसाची शक्यता नसून कोरडे हवामान राहण्याचा अंदाज आहे. नाशिकमध्ये किमान तापमान 12 अंश, तर कमाल तापमान 32 अंश सेल्सिअसच्या आसपास राहण्याचा अंदाज आहे. या विभागातही हवामान विभागाने कोणताही विशेष इशारा दिलेला नाही.
उबदार कपड्यांचा वापर करा
राज्यात सध्या पावसापासून दिलासा कायम असून पहाटे थंडी आणि दुपारी उन्हाचा अनुभव नागरिकांना येणार आहे. त्यामुळे सकाळी घराबाहेर पडताना उबदार कपड्यांचा वापर करावा, तसेच दुपारच्या उन्हापासून बचाव करण्याची काळजी घ्यावी.
FAQ
1. नोव्हेंबर महिन्यातही राज्यात अपेक्षित थंडी का जाणवत नाही?
राज्यात सध्या तापमानात चढ-उतार होत असून पहाटे गारवा आणि दुपारी उन्हाचा चटका जाणवत आहे.
2. राज्यातील हवामान कसे राहणार आहे?
कोकणापासून विदर्भापर्यंत बहुतांश भागांत हवामान कोरडे राहण्याची शक्यता आहे.
3. पहाटेच्या वेळी हवामान कसे असेल?
पहाटे अनेक ठिकाणी धुके आणि गुलाबी थंडी जाणवण्याचा अंदाज आहे.






