Rohit Pawar MPSC Protest, Vivek Bhimanwar Resignation, Devendra Fadnavis
पुण्यातील MPSC विद्यार्थ्यांच्या आंदोलनाला आज आणखी एक वळण मिळालं आहे. एस. एम. जोशी पुलाजवळ आंदोलन करणाऱ्या विद्यार्थ्यांच्या दिशेने वाहतूक वळवली जात असल्याचा दावा आमदार रोहित पवार यांनी केला. यामुळे विद्यार्थ्यांना त्रास होत असून एखादं वाहन विद्यार्थ्यांच्या पायावर गेल्यास परिस्थिती गंभीर होऊ शकते, अशी चिंता त्यांनी व्यक्त केली.
याच मुद्द्यावरून रोहित पवार पोलिसांवर चांगलेच आक्रमक झाले. त्यांनी पोलिसांना पुढील 10 ते 15 मिनिटांत योग्य निर्णय घेण्याचा इशारा दिला. हा इशारा दिल्यानंतर आंदोलनस्थळी विद्यार्थीही आक्रमक झाल्याचं पाहायला मिळालं.
रोहित पवारांनी पोलिसांना थेट इशारा देताना म्हटलं की, “पोलिसांनी पुढील 15 मिनिटात योग्य निर्णय नाही घेतला तर आम्ही अलका टॉकीज चौकात जाऊन बसावे लागेल.”
तसंच, “कृपा करुन इकडे वाहने डायव्हर्ट केल्याने त्यांना त्रास होतोय. तुम्हाला फोटो, व्हिडीओ काढून त्याचा वापर कोर्टात करायचा असेल तर मग आम्ही आमची ताकद दाखवू,” असंही त्यांनी म्हटलं.
गेल्या सात दिवसांपासून वाहतूक वळवण्यात आली होती; मात्र कालपासून आंदोलनाच्या दिशेने वाहने पाठवली जात असल्याचा दावा त्यांनी केला. “गाडी विद्यार्थ्यांच्या पायावर वगैरे गेली तर मग अवघड आहे,” असंही पवार म्हणाले.
यानंतर रोहित पवारांनी पोलिसांना आणखी 10 ते 15 मिनिटांचा वेळ देण्याचं सांगितलं. अलका चौकात जाऊन बसल्यास तिथून उठणार नसल्याची भूमिका त्यांनी मांडली.
दरम्यान, रोहित पवारांच्या या भूमिकेनंतर एस. एम. जोशी पुलावरील वाहतूक बंद करण्यात आल्याची माहिती समोर आली आहे. पोलिसांनी आंदोलनस्थळाबाबत नोटिसा दिल्या असल्या तरी विद्यार्थी मागे हटणार नाहीत, असा इशाराही पवारांनी दिला.
MPSC आंदोलनाचा आज आठवा दिवस असून पुणे पोलिसांनी आंदोलक विद्यार्थ्यांना आंदोलनस्थळ रिकामं करण्याच्या सूचना दिल्या आहेत. सार्वजनिक वाहतूक आणि कायदा-सुव्यवस्थेचा प्रश्न निर्माण होऊ नये, यासाठी ही कारवाई केली जात असल्याचं पोलिसांकडून सांगण्यात आलं आहे. पोलिसांच्या व्हॅनमधूनही आंदोलकांना शांततेने आंदोलन थांबवण्याचं आवाहन करण्यात आलं आहे.
दरम्यान, या आंदोलनाच्या पार्श्वभूमीवर मुंबई उच्च न्यायालयानेही सामान्य पुणेकरांना त्रास होणार नाही याची काळजी घेण्याचे निर्देश दिले आहेत. सरकारने या प्रकरणी प्रतिज्ञापत्र दाखल करण्याचे निर्देशही न्यायालयाने दिले आहेत.
गेल्या काही दिवसांपासून रोहित पवारांच्या नेतृत्वाखाली पुण्यात MPSC विद्यार्थ्यांचं आंदोलन सुरू आहे. आंदोलनात MPSC अध्यक्ष विवेक भीमनवार यांच्या राजीनाम्यासह विविध मागण्या मांडल्या जात आहेत. आंदोलनाची व्याप्ती वाढत असताना विविध राजकीय नेते आणि सामाजिक कार्यकर्ते आंदोलनस्थळी जाऊन विद्यार्थ्यांशी संवाद साधत आहेत.
पुण्यातील आंदोलन मुंबईच्या दिशेने हलवण्याबाबतही चर्चा सुरू असल्याचं समोर आलं आहे. त्यामुळे आता प्रशासन आणि आंदोलकांमध्ये पुढील काही तासांत काय भूमिका घेतली जाते, याकडे लक्ष लागलं आहे.
.png "Videos"){kind=small}
