gunratna sadavarte
गेल्या 12 दिवसांपासून पुण्यात MPSC विद्यार्थ्यांचं आंदोलन सुरु असून एस एम जोशी मार्गावर आमदार रोहित पवार यांच्या नेतृत्वाखाली विद्यार्थी आंदोलक ठिय्या मांडून बसले आहेत. एमपीएससी अध्यक्ष विवेक भीमनवार यांच्या राजीनाम्याच्या मागणीसाठी विद्यार्थी आंदोलक अडून बसले आहेत. याबाबत सदावर्ते यांनी माध्यमांशी संवाद साधत मोठे विधान केले आहे.
गुणरत्न सदावर्ते म्हणाले की, विद्यार्थ्यांच्या परीक्षेबाबत ज्या भावना आहेत, त्याच माझ्याही आहेत. परीक्षेवरील विश्वास कायम राहिला पाहिजे. ‘विद्यार्थी गुरेढोरे नाहीत की कोणाच्याही मागे जातील,’ असं म्हणत त्यांनी आंदोलनातील विद्यार्थ्यांवर कोणत्याही राजकीय पक्षाने किंवा नेत्याने मालकी हक्क दाखवू नये, असं सुनावलं.
आयोगाच्या कामकाजाबाबत ज्यांना माहिती आहे, त्यांनीच त्यावर बोलावं, असंही सदावर्ते यांनी म्हटलं. काही लोकांना विषयाची माहिती नसतानाही ते बोलत असल्याची टीका त्यांनी केली.
MPSC विद्यार्थ्यांच्या प्रश्नावरून राजकीय आरोप-प्रत्यारोप करण्याऐवजी मूळ प्रश्नावर चर्चा व्हावी, अशी भूमिका सदावर्तेंनी मांडली. ‘महाराष्ट्रातील MPSC विद्यार्थ्यांवर मालकी हक्क दाखवू नका. तुमचं दळभद्री राजकारण करू नका,’ असा थेट इशाराही त्यांनी दिला. विद्यार्थ्यांचं शिष्टमंडळ मुख्यमंत्र्यांकडे गेलं होतं, चर्चा झाली होती आणि काही मुद्द्यांवर एकमत झाल्याचा दावाही त्यांनी केला.
सदावर्ते यांनी आंदोलनकर्त्या विद्यार्थ्यांना उद्देशून परीक्षेच्या तयारीवर आणि भविष्यातील ध्येयावर लक्ष केंद्रित करण्याचं आवाहन केलं. ‘आपण इथे जेवायला आलेलो नाही, तर अधिकारी व्हायला आलो आहोत,’ असं त्यांनी म्हटलं.
त्याचवेळी परीक्षा वेळेवर होण्यासाठी नेमकी जबाबदारी कोणाची आहे, सरकारला या प्रक्रियेत किती अधिकार आहेत आणि आयोगाच्या कार्यपद्धतीवर चर्चा का होत नाही, असे सवालही त्यांनी उपस्थित केले.
आयोगातील व्यक्तींना हटवण्याच्या मागण्यांपेक्षा आयोगाच्या परीक्षा पद्धती, कार्यपद्धती आणि विद्यार्थ्यांचा परीक्षेवरील विश्वास या मुद्द्यांवर चर्चा होणं गरजेचं असल्याचं सदावर्ते म्हणाले. त्यामुळे पुण्यातील MPSC आंदोलनाला आता राजकीय पाठिंब्यासोबतच विविध भूमिका आणि आरोप-प्रत्यारोपांचं वळण मिळालं आहे.
.png "Videos"){kind=small}
