शुक्रवार, 16 ऑक्टोबर 2026
सौजन्य - नवराष्ट्र टीम
पुणे : हवेली क्रमांक ७ दुय्यम निबंधक कार्यालयातील दस्तनोंदणीच्या तपासणीत २१ दस्तांवर विविध आक्षेप नोंदविण्यात आले आहेत. नोंदणी व मुद्रांक शुल्क विभागाच्या तपासणी पथकाने केलेल्या पाहणीत १२ दस्तांमध्ये मुंबई धारण जमिनीचे तुकडे पाडण्यास प्रतिबंध व त्याचे एकत्रीकरण अधिनियम, १९४७ मधील तरतुदींचे पालन झाले नसल्याचे नमूद करण्यात आले आहे. तसेच चार दस्तांमध्ये एकूण ५ लाख १७ हजार ६०९ रुपयांचे मुद्रांक शुल्क कमी भरल्याचे आणि नोंदणी शुल्कात ४६ हजार ९४० रुपयांची तफावत आढळल्याचे अहवालात नमूद आहे. सह जिल्हा निबंधक वर्ग-१ तथा मुद्रांक जिल्हाधिकारी, पुणे शहर यांच्या आदेशानुसार १७ ते २१ ऑगस्ट २०२६ या कालावधीत हवेली-७ कार्यालयातील दस्तांची तपासणी करण्यात आली. तपासणी पथकाने सादर केलेल्या अहवालात एकूण २१ दस्तांबाबत आक्षेप नोंदविण्यात आले आहेत.
अहवालातील निष्कर्षतपासणीतील १२ दस्तांमध्ये मुंबई धारण जमिनीचे तुकडे पाडण्यास प्रतिबंध व त्याचे एकत्रीकरण अधिनियम, १९४७ मधील कलम ८ आणि ३१नुसार आवश्यक सक्षम प्राधिकाऱ्याची परवानगी किंवा नाहरकत प्रमाणपत्र घेण्यात आले नसल्याचे अहवालात नमूद आहे. महाराष्ट्र नोंदणी नियम, १९६१ मधील नियम ४४(१)चे पालन झाले नसल्याचेही तपासणी पथकाने म्हटले आहे. काही दस्तांमध्ये रेरा प्रमाणपत्र जोडले नसल्याचेही तपासणीत आढळले. नऊ दस्तांमध्ये गुंठेवारी नियमितीकरण दाखल्याची आवश्यक पडताळणी झाल्याचे दिसून आले नसल्याचे अहवालात नमूद करण्यात आले आहे. त्यामुळे संबंधित दस्तांच्या नोंदणी प्रक्रियेबाबतही आक्षेप नोंदविण्यात आला आहे.
तपासणीदरम्यान चार दस्तांमध्ये मुद्रांक शुल्क कमी भरल्याचे आढळले. विकास कराराच्या एका दस्तासाठी ४ लाख ३१ हजार ८०३ रुपये मुद्रांक शुल्क अपेक्षित असताना १ लाख १५ हजार ३०० रुपये भरले गेले. त्यामुळे ३ लाख १६ हजार ५०३ रुपयांची तफावत आहे. वाटणीपत्राच्या दस्तात ९२ हजार ५०० रुपये मुद्रांक शुल्क अपेक्षित असताना ३४ हजार ५०० रुपये भरले गेले. त्यामुळे ५८ हजार रुपयांची तफावत असून, नोंदणी शुल्कात १८ हजार ३०० रुपये कमी भरले आहेत. खरेदीखताच्या एका दस्तात १ लाख ३३ हजार ४२० रुपये अपेक्षित असताना १ लाख १२ हजार ३०० रुपये भरले गेले. त्यामुळे २१ हजार १२० रुपयांचे मुद्रांक शुल्क आणि ४ हजार २४० रुपयांचे नोंदणी शुल्क कमी भरले गेले.अदलाबदलीच्या दस्तात १ लाख २२ हजार ४८६ रुपये मुद्रांक शुल्क अपेक्षित असताना केवळ ५०० रुपये भरले गेले. त्यामुळे १ लाख २१ हजार ९८६ रुपयांची मुद्रांक शुल्काची तफावत असून, नोंदणी शुल्कात २४ हजार ४०० रुपये कमी भरले आहेत. तपासणी पथकाने नोंदविलेल्या आक्षेपांवर हवेली-७ दुय्यम निबंधक कार्यालयाकडून अनुपालन अहवाल सादर करण्यात आला आहे. संबंधित कागदपत्रांसह हा अहवाल सह जिल्हा निबंधक कार्यालयाकडे पाठविण्यात आला आहे.
“गेल्या काही महिन्यांपासून अधिकारी मनमानी पद्धतीने दस्तनोंदणी करत होते. ही बाब वरिष्ठ अधिकाऱ्यांच्या निदर्शनास आणून दिल्यानंतर त्यांनी चौकशी समिती नेमण्याच्या सूचना दिल्या. या समितीच्या अहवालात नियमभंग झाल्याचे स्पष्ट झाले आहे. त्यामुळे नोंदणी महानिरीक्षकांनी संबंधित अधिकाऱ्यांवर तातडीने कारवाई करावी.” — रोहन सुरवसे-पाटील, नेते, राष्ट्रवादी काँग्रेस.
हे सुद्धा वाचा : कचरा गोळा करणारी घंटागाडीच मद्यधुंद चालकाच्या ताब्यात; पुण्यात गुन्हा दाखल
