हिंजवडी ‘IT पार्क’ घेणार मोकळा श्वास! वाढते अपघात रोखण्यासाठी PMRDA ने घेतला ‘हा’ मोठा निर्णय

अपघातांच्या मालिकेनंतर प्रशासन सजग

अवजड वाहनांमुळे हिंजवडी व आसपासच्या भागात गेल्या काही महिन्यांत अनेक अपघात घडले असून, काहींना आपला जीव गमवावा लागला आहे. त्यामुळे आयटी कर्मचाऱ्यांनी काही दिवसांपूर्वी प्रशासनाकडे ठोस उपाययोजनांची मागणी करत मोर्चा काढला होता. या पार्श्वभूमीवर सोमवारी पीएमआरडीएच्या अधिकाऱ्यांची व बांधकाम व्यावसायिकांची बैठक झाली. या बैठकीत हिंजवडी, माण, म्हाळुंगे परिसरात पोलिसांनी निश्चित केलेल्या वेळेतच अवजड वाहनांना प्रवेश द्यावा, असा निर्णय घेण्यात आला. तसेच वाहनचालक नशेत नसल्याची खात्री, वैध परवाना आणि संबंधित वाहनांची संपूर्ण माहिती प्रकल्पाच्या संकेतस्थळावर अद्ययावत ठेवणे बंधनकारक करण्यात आले आहे.

Ajit Pawar: “कोणीही काय मी आडवा आलो तरी ३५३…”; अजित पवारांकडून भल्या पहाटे अधिकाऱ्यांची शाळा

वाहतूक कोंडी आणि सुरक्षेचे प्रश्न गंभीर

हिंजवडी–माण हा भाग शहरातील प्रमुख आयटी पट्टा असून, सकाळी आणि सायंकाळी हजारो आयटी कर्मचारी प्रवास करतात. या गर्दीच्या वेळेत अवजड वाहने धावत असल्याने वाहतूक कोंडी, अपघात आणि अडचणींचा सामना करावा लागत आहे.

सध्या परिसरात अनेक गृहप्रकल्प व व्यापारी प्रकल्पांची कामे सुरू आहेत. बांधकाम साहित्य – सिमेंट, लोखंड, गिट्टी इत्यादींच्या वाहतुकीसाठी अवजड वाहनांचा वापर आवश्यक असला, तरी त्यांची वेळ व मार्ग नियोजनाशिवाय हालचाल होत असल्याने नागरिकांच्या सुरक्षेला धोका निर्माण झाला आहे. या समस्येवर उपाययोजना करण्यासाठी पीएमआरडीएचे महानगर आयुक्त डॉ. योगेश म्हसे यांनी स्पष्ट निर्देश दिल्याचे सांगण्यात आले.

काम थांबविण्याचा इशारा

हिंजवडी परिसरात १० सप्टेंबर रोजी एका काँक्रीट मिक्सरखाली दुचाकीस्वार महिलेचा मृत्यू झाल्याची घटना घडली होती. या घटनेनंतर संबंधित वाहनचालकावर गुन्हा नोंदवण्यात आला. याआधारे सदर वाहन ज्या बांधकामासाठी कार्यरत होते, त्या प्रकल्पाची परवानगी स्थगित करण्याचा निर्णय पीएमआरडीएने घेतला आहे, अशी माहिती पीएमआरडीएचे जनसंपर्क अधिकारी डॉ. ज्ञानेश्वर भाले यांनी दिली.

प्रशासनाचा इशारा : “सुरक्षा नियमांचे काटेकोर पालन करा”

पीएमआरडीएने सर्व बांधकाम व्यावसायिकांना सूचना दिल्या आहेत की, पोलिसांनी आखून दिलेल्या वेळापत्रकानुसारच अवजड वाहने परिसरात आणावीत, चालक नशेत नसल्याची खात्री करून वाहतूक नियमांचे पालन करावे. संबंधित वाहनांची नोंद व परवाने अद्ययावत ठेवावेत. या नियमांचे उल्लंघन झाल्यास संबंधित बांधकाम प्रकल्पांवर थेट कारवाई केली जाईल, असे प्रशासनाने स्पष्ट केले आहे.