शुक्रवार, 6 नोव्हेंबर 2026
गणेशोत्सवात आवाजाची मर्यादा ओलांडल्यास कारवाई (फोटो- ai gemini)
गणेशोत्सवाच्या पार्श्वभूमीवर पुणे शहरात सोमवारपासून ( ता.१४) ध्वनी पातळी मोजण्यास सुरुवात झाली आहे. पुढील दहा दिवस दररोज सायंकाळी सहा ते मध्यरात्री १२ या वेळेत विविध ठिकाणी ध्वनी पातळीची नोंद घेतली जाणार आहे. विसर्जन मिरवणुकीदरम्यानही या मोहिमेअंतर्गत ध्वनी पातळीवर लक्ष ठेवण्यात येणार आहे.
ध्वनिप्रदूषण नियंत्रणाबाबत राष्ट्रीय हरित लवादाने (एनजीटी) दिलेल्या निर्देशांच्या पार्श्वभूमीवर एमपीसीबीकडून ही कार्यवाही करण्यात येत आहे. शहरातील २०० केंद्रांवर प्रत्यक्ष मोजणी करण्यासाठी बाह्य पर्यावरण संस्थांची मदत घेण्यात आली आहे. ‘अश्वमेध’ आणि ‘महाबळ एन्व्हायरनमेंट’ या संस्थांच्या माध्यमातून महाविद्यालयांतील सुमारे ३०० विद्यार्थ्यांची स्वयंसेवक म्हणून नियुक्ती करण्यात आली आहे. हे स्वयंसेवक निर्धारित ठिकाणी ध्वनी पातळीची नोंद घेऊन त्याची माहिती संबंधित यंत्रणेकडे देणार आहेत. त्यामुळे उत्सवातील गर्दीची ठिकाणे, मंडळांचे परिसर तसेच मिरवणूक मार्गांवरील ध्वनी पातळीवर यंदा अधिक बारकाईने लक्ष ठेवले जाणार आहे.
गणेशोत्सवादरम्यान पुणे शहरातील २०० ठिकाणी ध्वनी पातळीचे मॉनिटरिंग सुरू करण्यात आले आहे. पुढील दहा दिवस दररोज सायंकाळी सहा ते मध्यरात्री १२ या वेळेत नोंद घेतली जाणार आहे. यासाठी स्वयंसेवकांची मदत घेतली जात आहे.’
– कार्तिकेय लंगोटे, उपप्रादेशिक अधिकारी, महाराष्ट्र प्रदूषण नियंत्रण मंडळ
कर्णकर्कश डीजे आणि ध्वनीप्रदूषणाविरोधात पुणेकर रविवारी रस्त्यावर उतरले. सकाळी बालगंधर्व चौक येथून जंगली महाराज रस्त्याने पुणे महानगरपालिकेपर्यंत निषेध मोर्चा काढण्यात आला. ‘डीजे बंदी झालीच पाहिजे’ अशा घोषणा देत नागरिकांनी ध्वनीप्रदूषणाविरोधात तीव्र संताप व्यक्त केला. ‘लाऊडस्पीकरविरोधी पुणेकर मंचा’च्या वतीने हा मोर्चा काढण्यात आला. मोठ्या प्रमाणात पुणेकर यात सहभागी झाले होते.
