Pune Water Shortage News: पुणेकरांवर पाणी कपातीचे मोठे संकट! दिवाळीनंतर शहरात ‘एक दिवस आड’ पाणीपुरवठा करण्याचा निर्णय!

Pune Water Shortage News: पुणेकरांच्या पाण्याचा प्रश्न ऐरणीवर आला आहे. कालवा समितीच्या बैठकीत झालेल्या निर्णयानुसार, अपुरा पाणी कोटा आणि अल निनोच्या संकटामुळे पुणे महापालिकेला मोठा निर्णय घ्यावा लागला आहे. दिवाळीनंतर शहरात एक दिवस आड पाणीपुरवठा होणार असून, पुणेकरांना पाणी कपातीचा सामना करावा लागणार आहे.

• दिवाळी संपताच पुण्यात ‘एक दिवस आड’ पाणीपुरवठा केला जाईल
• कोट्यातील ६.३५ टीएमसी पाणी वापरल्याने जूनपर्यंत फक्त ७.१५ टीएमसी पाणी
• अल निनोमुळे पाऊस कमी पडल्याने सरकारने पाणी कपातीचे निर्देश दिले

Pune Water Shortage News: सांस्कृतिक व आयटीची राजधानी असलेल्या पुणे शहरावर आगामी काळात गंभीर जलसंकटाचे सावट पसरले आहे. राज्याच्या उपमुख्यमंत्री व पुण्याच्या पालकमंत्री सुनेत्रा पवार यांच्या अध्यक्षतेखाली जलसंपदा मंत्री राधाकृष्ण विखे पाटील आणि कृषी मंत्री दत्तात्रय भरणे यांच्या उपस्थितीत कालवा सल्लागार समितीची बैठक पार पडली. या बैठकीत पुणे शहराच्या पाणी कोट्याचा आढावा घेण्यात आला असून, आगामी तीव्र टंचाई टाळण्यासाठी दिवाळीचा सण संपताच संपूर्ण शहरात ‘एक दिवस आड’ पाणीपुरवठा करण्याचा धोरणात्मक निर्णय महापालिका प्रशासनाने घेतला आहे.

हेही वाचा: Husband Murder News: “दारू पाजली अन् दोरीने गळा आवळला…” अपघाताचा बनाव रचणाऱ्या कातील पत्नीसह दोन्ही प्रियकरांना बेड्या!

मंजूर कोटा अन् पाण्याचा ताळेबंद

पुणे शहरासाठी वर्षाला १३.५ टीएमसी पाणी कोटा मंजूर करण्यात आलेला आहे. मात्र, महापालिकेच्या आकडेवारीनुसार, १ जुलैपासून ते आतापर्यंत तब्बल ६.३५ टीएमसी पाणी आधीच वापरले गेले आहे. त्यामुळे आगामी ३० जून २०२७ पर्यंत, म्हणजेच पुढील तब्बल आठ ते नऊ महिन्यांच्या दीर्घ कालावधीसाठी शहराकडे केवळ ७.१५ टीएमसी पाणी शिल्लक उरले आहे. वाढती लोकसंख्या आणि दैनंदिन गरज पाहता हा शिल्लक साठा अत्यंत अपुरा पडण्याची दाट शक्यता आहे.

अल निनोचा फटका आणि कपातीचे आदेश

यंदा राज्यात अल निनोच्या प्रभावामुळे पावसाने मोठी ओढ दिली. ऑगस्ट व सप्टेंबर या मुख्य महिन्यांत अपेक्षित पाऊस न झाल्याने ग्रामीण भागातील रब्बी पिकांसाठी आणि पिण्याच्या पाण्यासाठी धरणांतून पाण्याचा विसर्ग करावा लागला. या परिस्थितीचा गांभीर्याने विचार करून राज्य सरकारने २० टक्के पाणी कपातीचे निर्देश दिले आहेत. सध्या खडकवासला धरण साखळीत २४ टीएमसी पाणीसाठा उपलब्ध असला, तरी बाष्पीभवन, पाणी गळती आणि ग्रामीण भागाचे आवर्तन लक्षात घेता शहरासाठी पाणी मर्यादा पाळणे अनिवार्य ठरत आहे. ऐन सणासुदीच्या दिवसांत नागरिकांची गैरसोय होऊ नये म्हणून दिवाळीपर्यंत नियमित पुरवठा सुरू ठेवला जाईल; परंतु दिवाळी संपताच मनपा ‘एक दिवस आड’ पाणीपुरवठ्याचे नियोजन काटेकोरपणे राबवणार आहे. प्रशासनाने नागरिकांना पाण्याचा वापर अत्यंत काटकसरीने करण्याचे आणि नासाडी टाळण्याचे आवाहन केले आहे.

हेही वाचा: Woman Harassment News: “तू मला खूप आवडतेस…” वरिष्ठाकडून महिला सुरक्षा रक्षकाचा विनयभंग; जुना राजवाडा पोलिसांत तक्रार!