Dr Shirish Hiremath Death: ४० हजारांहून अधिक अँजिओप्लास्टी करणारे प्रख्यात डॉ. शिरीष हिरेमठ काळाच्या पडद्याआड!

Dr Shirish Hiremath Death: चार दशकांत ४० हजारांहून अधिक अँजिओप्लास्टी करणारे पुण्यातील ज्येष्ठ व प्रथितयश हृदयरोगतज्ज्ञ डॉ. शिरीष हिरेमठ यांचे वयाच्या ७५ व्या वर्षी निधन झाले आहे. त्यांच्या जाण्याने वैद्यकीय क्षेत्रात मोठी पोकळी निर्माण झाली असून सर्वत्र शोक व्यक्त होत आहे.

• पुण्यातील प्रसिद्ध हृदयरोगतज्ज्ञ डॉ. शिरीष हिरेमठ (७५) यांचे निधन
• चार दशकांच्या कारकिर्दीत ४० हजारांहून अधिक अँजिओप्लास्टी पूर्ण
• रुबी हॉल क्लिनिकचे माजी संचालक डॉ. हिरेमठ 

Dr Shirish Hiremath Death: कार्डिऑलॉजिकल सोसायटी ऑफ इंडियाचे माजी अध्यक्ष आणि पुण्यातील अत्यंत नावाजलेले ज्येष्ठ हृदयरोगतज्ज्ञ डॉ. शिरीष (एम. एस.) हिरेमठ (७५) यांचे गुरुवारी रात्री नऊच्या सुमारास सोपान बाग येथील राहत्या घरी निधन झाले. गेल्या काही वर्षांपासून ते प्रकृतीच्या अस्वास्थ्यामुळे आणि आजारपणाशी लढा देत होते. त्यांच्या निधनामुळे इंटरव्हेन्शनल कार्डिऑलॉजी क्षेत्रातील एक अत्यंत अनुभवी आणि निष्णात तज्ज्ञ हरपल्याची भावना व्यक्त होत आहे.

हेही वाचा: Lonavala Station News: तिकीट विचारले म्हणून टीसीवर हल्ला; व्हिडिओ सोशल मीडियावर तुफान व्हायरल!

चार दशकांची प्रदीर्घ वैद्यकीय कारकीर्द

डॉ. शिरीष हिरेमठ यांनी बी. जे. वैद्यकीय महाविद्यालयातून एमबीबीएस, एमडी आणि त्यानंतर कार्डिऑलॉजीमधील डीएम पदवी प्राप्त केली होती. १९८२ मध्ये पुण्यातील जोशी हॉस्पिटलमधून त्यांच्या वैद्यकीय प्रवासाला सुरुवात झाली. त्यानंतर त्यांनी रुबी हॉल क्लिनिकसह शहरातील विविध अग्रगण्य वैद्यकीय संस्थांमध्ये सेवा दिली. रुबी हॉल क्लिनिकच्या कार्डियाक कॅथलॅबचे संचालक म्हणून त्यांनी दीर्घकाळ महत्त्वाची धुरा सांभाळली. आपल्या चार दशकांच्या प्रदीर्घ आणि यशस्वी कारकिर्दीत त्यांनी तब्बल ४० हजारांहून अधिक अँजिओप्लास्टी आणि एक लाखांपेक्षा अधिक अँजिओग्राफी केल्या होत्या. पुण्यात पहिल्या काही यशस्वी अँजिओप्लास्टी शस्त्रक्रिया करणाऱ्या अग्रगण्य डॉक्टरांमध्ये त्यांचे नाव घेतले जाते.

हेही वाचा: Pune Crime News: पुण्यात थरार! सारसबागेजवळ बंद कारमधून येत होती दुर्गंधी; दरवाजा उघडताच पोलीस हादरले!

रुग्णसेवा आणि जनजागृतीसाठी सतत कटिबद्ध

केवळ उपचारांपुरते मर्यादित न राहता, हृदयरोगाचे प्रतिबंध, वेळेवर निदान आणि योग्य उपचार पद्धतीबाबत समाजात जनजागृती निर्माण करण्यासाठी त्यांनी मोठे प्रयत्न केले. हृदयविकाराचा झटका आलेल्या रुग्णांवर तातडीने आणि आधुनिक पद्धतीने उपचार करण्यासाठी त्यांनी ‘फार्माको-इन्व्हेसिव्ह अप्रोच’ (Pharmaco-invasive approach) चा वापर भारतात लोकप्रिय करण्यात मोलाचे योगदान दिले. त्यांच्या निधनामुळे वैद्यकीय जगतात आणि त्यांच्या मार्गदर्शनाखाली घडलेल्या तरुण डॉक्टरांमध्ये मोठी शोककळा पसरली आहे.