मी सरकारचा भाग नाही, मी आमदार अन्…; सुधीर मुनगंटीवारांच्या विधानाने भाजपमध्ये खळबळ

मराठा आरक्षणाच्या मुद्द्यावर मनोज जरांगे पाटील यांनी पुकारलेल्या आंदोलनाच्या पार्श्वभूमीवर पुण्यात भाजपच्या राज्य कार्यकारिणीच्या बैठकीपूर्वी माध्यमांशी संवाद साधताना सुधीर मुनगंटीवार यांनी केलेल्या एका विधानाने राजकीय वर्तुळात खळबळ उडाली आहे.

पुणे : ‘मी सरकारचा भाग नाही, मी आमदार आणि लोकप्रतिनिधी आहे. संवादाच्या टेबलवर मी बसत नाही,’ असे भाजपचे ज्येष्ठ नेते आणि माजी मंत्री सुधीर मुनगंटीवार यांनी स्पष्ट केले. मराठा आरक्षणाच्या मुद्द्यावर मनोज जरांगे पाटील यांनी पुकारलेल्या आंदोलनाच्या पार्श्वभूमीवर पुण्यात भाजपच्या राज्य कार्यकारिणीच्या बैठकीपूर्वी माध्यमांशी संवाद साधताना सुधीर मुनगंटीवार यांनी केलेल्या एका विधानाने राजकीय वर्तुळात खळबळ उडाली आहे.

भाजपच्या राज्य कार्यकारिणीची बैठक पुण्यात होत असून, त्यासाठी मुनगंटीवार पुण्यात आले होते. यावेळी मनोज जरांगे पाटील यांच्या आंदोलनाबाबत प्रश्न विचारण्यात आला. त्यावर बोलताना सुधीर मुनगंटीवार यांनी सरकार संवादासाठी नेहमीच तयार असल्याचे सांगितले. ‘संवादातून समाधानाकडे जाण्याचा मार्ग असतो. मुख्यमंत्री देवेंद्र फडणवीस यांनी आम्ही संवादासाठी तयार असल्याचे तीन वेळा सांगितले आहे,’ असे मुनगंटीवार यावेळी म्हणाले. मात्र, मुनगंटीवार यांच्या या वक्तव्यामुळे मराठा आरक्षणाच्या संवेदनशील मुद्द्यावर भाजपमध्येच वेगवेगळ्या भूमिका असल्याची चर्चा राजकीय वर्तुळात सुरू झाली आहे.

‘कुठे अडतंय, मला माहीत नाही’

सरकार संवादासाठी तयार असेल, तर नेमके अडतंय कुठे, असा प्रश्न मुनगंटीवार यांना विचारण्यात आला. त्यावर त्यांनी, ‘कुठे अडतंय, मला माहीत नाही. मी सरकारचा भाग नाही. मी आमदार आहे, लोकप्रतिनिधी आहे. संवादाच्या टेबलवर मी बसत नाही,’ असे स्पष्टीकरण दिले.

मराठा आरक्षणावर सरकार सकारात्मक : दानवे

बैठकीपूर्वी भाजपचे ज्येष्ठ नेते रावसाहेब दानवे यांनीही माध्यमांशी संवाद साधला. मराठा आरक्षणाच्या मुद्द्यावर सरकार सकारात्मक असून योग्य निर्णय घेतला जाईल, असे त्यांनी सांगितले. या विषयावर यापूर्वीही चर्चा झाल्याचे दानवे यांनी स्पष्ट केले.

हे सुद्धा वाचा : गणेशोत्सव, दहीहंडीत अंगविक्षेप कृष्णाला व गणपतीला आवडेल का? खासदार मेधा कुलकर्णींचा सवाल

मुंबईतही उद्या भाजपची बैठक

पुण्यातील राज्य कार्यकारिणीची बैठक झाल्यानंतर मुंबई भाजपची महत्त्वाची बैठक उद्या मंगळवार (दि.१) रोजी होणार आहे. मुंबई भाजपचे अध्यक्ष आमदार अमित साटम यांच्या अध्यक्षतेखाली दादर येथील भाजपच्या वसंत स्मृती कार्यालयात ही बैठक होणार आहे. आगामी राजकीय आणि संघटनात्मक रणनीतीवर या बैठकीत चर्चा होण्याची शक्यता आहे. या बैठकीला मुंबई भाजपचे पदाधिकारी, प्रवक्ते, कार्यकारिणी सदस्य, मोर्चा-सेल आघाडी प्रमुख, खासदार, आमदार, नगरसेवक, जिल्हाध्यक्ष, सरचिटणीस, मंडल अध्यक्ष आणि वॉर्ड अध्यक्ष उपस्थित राहणार आहेत.