पिंपरी-चिंचवड महापालिका आयुक्तांचा दणका! दोन वरिष्ठ अधिकाऱ्यांना नोटीस, दोन दिवसांत खुलासा देण्याचे आदेश

पिंपरी-चिंचवड महानगरपालिकेतील गैरव्यवहार आणि प्रशासकीय अनास्थेविरोधात महापालिका आयुक्त विजय सूर्यवंशी यांनी कठोर पावले उचलण्यास सुरुवात केली आहे. वरिष्ठ अधिकाऱ्यांना नोटिसा बजावण्याचा धडाका सुरू झाला आहे.

• आयुक्तांनी दोन वरिष्ठ अधिकाऱ्यांना बजावली कारणे दाखवा नोटीस
• बेकायदेशीर वृक्षतोडीप्रकरणी महेश गारगोटे यांच्यावर आरोप
• दोन दिवसांत खुलासा देण्याचे आदेश

पिंपरी : पिंपरी-चिंचवड महानगरपालिकेतील गैरव्यवहार आणि प्रशासकीय अनास्थेविरोधात महापालिका आयुक्त विजय सूर्यवंशी यांनी कठोर पावले उचलण्यास सुरुवात केली आहे. गेल्या सात महिन्यांत तब्बल ११ अधिकारी व कर्मचाऱ्यांचे निलंबन केल्यानंतर, आता वरिष्ठ अधिकाऱ्यांना नोटिसा बजावण्याचा धडाका सुरू झाला आहे. यशवंतराव चव्हाण स्मृती (वायसीएम) रुग्णालयाचे अधिष्ठाता डॉ. राजेंद्र वाबळे आणि महापालिकेचे मुख्य उद्यान अधीक्षक महेश गारगोटे यांना आयुक्तांनी ‘कारणे दाखवा’ नोटीस बजावली असून, दोन दिवसांच्या आत लेखी खुलासा सादर करण्याचे आदेश दिले आहेत.

 

सहायक प्राध्यापकाच्या अपमानप्रकरणी डॉ. वाबळेंना नोटीस

‘वायसीएम’ रुग्णालयातील एका सहायक प्राध्यापकाचा अपमान केल्याप्रकरणी डॉ. राजेंद्र वाबळे यांच्याविरोधात पोलिसांत गुन्हा दाखल झाला आहे. आरोपांचे गांभीर्य, सुरू असलेला पोलीस तपास आणि शासकीय कर्मचाऱ्यास अशोभनीय ठरेल असे गैरवर्तन करून कर्तव्यात सचोटी न बाळगल्याचा ठपका ठेवत डॉ. वाबळे यांना नोटीस बजावण्यात आली आहे. दोन दिवसांत असमाधानकारक खुलासा आल्यास अथवा खुलासा सादर न केल्यास नियमानुसार कारवाई करण्याचा इशारा आयुक्तांनी दिला आहे.

५२ पुरातन वृक्षांची बेकायदेशीर तोड; उद्यान अधीक्षक गारगोटेंवर ठपका

दुसऱ्या प्रकरणात, पिंपरीतील एका खाजगी जागेमधील हेरिटेज दर्जा असलेल्या ५२ पुरातन झाडांची बेकायदेशीर तोड केल्याचा आरोप मुख्य उद्यान अधीक्षक महेश गारगोटे यांच्यावर ठेवण्यात आला आहे. झाडांची संख्या आणि वय कागदोपत्री कमी दाखवून फेरफार केल्याचा ठपका, प्रचलित नियम, शासन निर्देश आणि प्रशासकीय मंजुरी डावलून वृक्षतोडीस प्रोत्साहन दिल्याचा आरोप. या गैरकारभारामुळे महापालिकेचे आर्थिक आणि महसुली नुकसान झाल्याची नोंद तक्रारीत. शहरातील वृक्ष संरक्षण, संगोपन आणि उद्यानांची देखभाल करण्याची जबाबदारी असतानाही कर्तव्यात कसूर केल्याप्रकरणी, ‘आपल्यावर शिस्तभंगाची कारवाई का करू नये?’ अशी विचारणा नोटिशीद्वारे करण्यात आली आहे.

हे सुद्धा वाचा : पुणेरी मेट्रो प्रवाशांच्या सेवेत दाखल होणार! ‘या’ तारखेपासून सकाळी 6 वाजता पहिली फेरी; जाणून घ्या तिकीटदर

मुदतीत समाधानकारक खुलासा सादर न झाल्यास दोन्ही वरिष्ठ अधिकाऱ्यांवर थेट शिस्तभंगाची कठोर कारवाई केली जाईल, असा सज्जड दम आयुक्त विजय सूर्यवंशी यांनी दिल्याने महापालिका वर्तुळात मोठी खळबळ उडाली आहे.

हे सुद्धा वाचा : खंडणीसाठी व्यावसायिकाच्या मुलाचे अपहरण; फरार गुंड तुषार हंबीर अखेर पोलिसांच्या ताब्यात