पिंपरी-चिंचवडमधील खड्डे 48 तासांत बुजवा, कामचुकारपणा केल्यास…; आयुक्तांचे महापालिका अधिकाऱ्यांना कडक निर्देश

रस्त्यांवरील खड्डे येत्या दोन दिवसांत बुजवण्याच्या दृष्टीने तातडीने आवश्यक ती कार्यवाही करण्याचे स्पष्ट निर्देश महापालिका आयुक्त डॉ. विजय सूर्यवंशी यांनी संबंधित अधिकाऱ्यांना दिले आहेत.

पिंपरी : पिंपरी-चिंचवड शहरातील रस्ते, पदपथ आणि इतर सार्वजनिक सुविधांच्या दुरुस्तीच्या कामांना महापालिका प्रशासनाने गती दिली आहे. शहरातील रस्त्यांवरील खड्डे येत्या दोन दिवसांत बुजवण्याच्या दृष्टीने तातडीने आवश्यक ती कार्यवाही करण्याचे स्पष्ट निर्देश महापालिका आयुक्त डॉ. विजय सूर्यवंशी यांनी संबंधित अधिकाऱ्यांना दिले आहेत.

तक्रारीची वाट न पाहता स्वतःहून पाहणी करा

नागरिकांच्या तक्रारींची वाट न पाहता सर्व विभागीय कार्यकारी अभियंते, उपअभियंते आणि कनिष्ठ अभियंत्यांनी आपापल्या कार्यक्षेत्राची नियमित पाहणी करून आवश्यक कामांची स्वतःहून नोंद घ्यावी, अशा सूचना देण्यात आल्या आहेत. खड्डे बुजवताना कामाचा दर्जा, टिकाऊपणा आणि नागरिकांची सुरक्षितता याबाबत विशेष दक्षता घेण्याचे आदेश आयुक्तांनी दिले आहेत.

सार्वजनिक सुविधांच्या दुरुस्तीलाही प्राधान्य

रस्त्यांवरील खड्ड्यांबरोबरच सुरक्षेच्या दृष्टीने अत्यंत महत्त्वाच्या असलेल्या रेलिंग, दुभाजकांवरील बॅरिकेड्स आणि पदपथांची पाहणी करून दुरुस्तीची कामे तात्काळ पूर्ण करण्याचे निर्देश देण्यात आले आहेत. यासाठी क्षेत्रीय कार्यालयानिहाय कामांचे नियोजन करून प्राधान्यक्रम निश्चित करण्यात येत आहे.

कामचुकारपणा केल्यास कारवाईचा इशारा

प्रत्येक क्षेत्रीय कार्यालय व वॉर्डनुसार अभियंत्यांची जबाबदारी निश्चित करण्यात आली आहे. सुरक्षेशी संबंधित कामांमध्ये दिरंगाई किंवा हलगर्जीपणा आढळल्यास संबंधित अधिकाऱ्यांवर नियमानुसार कठोर कारवाई केली जाईल, असा सज्जड इशारा डॉ. सूर्यवंशी यांनी दिला आहे.

हे सुद्धा वाचा : अमोल बालवडकरांचा भाजपच्या तिरंगा रॅलीला जोरदार विरोध;15-20 हजार गाड्यामुळे वाहतूक कोंडीची भीती

रोज होणार कामांचा आढावा

दुरुस्तीच्या कामांवर प्रभावी देखरेख ठेवण्यासाठी अतिरिक्त महापालिका आयुक्त, मुख्य अभियंता आणि सह शहर अभियंता दररोज कामांचा आढावा घेतील. रोजच्या प्रगतीचा अहवाल आयुक्तांना सादर केला जाणार आहे.

नागरिकांना सुरक्षित, सुस्थितीत आणि दर्जेदार रस्ते व सार्वजनिक सुविधा उपलब्ध करून देणे हे महापालिका प्रशासनाचे मुख्य प्राधान्य आहे. त्यामुळे अधिकाऱ्यांनी तक्रारीची प्रतीक्षा न करता सक्रियपणे पाहणी करून दुरुस्ती पूर्ण करावी. कामांमध्ये हलगर्जीपणा आढळल्यास कठोर कारवाई निश्चित आहे. — डॉ. विजय सूर्यवंशी, आयुक्त, पिंपरी-चिंचवड महानगरपालिका.

हे सुद्धा वाचा : तिरंगा रॅलीनिमित्त पुण्यातील वाहतुकीत बदल; दुपारपासून ‘हे’ मार्ग राहणार बंद