संग्रहित फोटो
पिंपरी : पिंपरी-चिंचवड महापालिकेच्या २०२६-२७ या आर्थिक वर्षाच्या मूळ अर्थसंकल्पात स्थायी समितीने मोठे फेरबदल केले असून, सुमारे ४०० कोटी रुपयांच्या २५० उपसूचनांना मंजुरी दिली आहे. तत्कालीन आयुक्तांनी सादर केलेल्या अर्थसंकल्पात एकाही नवीन प्रकल्पाचा समावेश नसल्याने, स्थायी समितीने शहराच्या विकासासाठी अनेक नवीन तरतुदी सुचवल्या आहेत. महत्त्वाचे म्हणजे, एखादा मोठा प्रकल्प निधीअभावी रखडू नये म्हणून महापालिकेच्या मुदत ठेवी मोडण्याची तयारीही समितीने दर्शविली आहे.
बजेटमध्ये मोठी वाढ; उत्पन्नाचे नवे स्त्रोत
तत्कालीन आयुक्त श्रावण हर्डीकर यांनी ५ हजार ६५५ कोटी ७३ लाखांचा मूळ, तर शासकीय योजनांसह ९ हजार ३२२ कोटी १७ लाखांचा अर्थसंकल्प सादर केला होता. मात्र, स्थायी समितीने यात ४०० कोटींची वाढ सुचवली आहे. हे वाढीव उत्पन्न मिळवण्यासाठी बांधकाम परवानगी विभागातून २०० कोटी, आकाशचिन्ह परवाना विभागातून ३४ कोटी आणि पाणीपट्टी व नवीन मालमत्ता करातून मोठा निधी उभारण्याचे उद्दिष्ट ठेवण्यात आले आहे.
गरज पडल्यास मुदत ठेवींचा वापर
स्थायी समितीचे अध्यक्ष अभिषेक बारणे यांनी स्पष्ट केले की, महापालिकेकडे सध्या ५ हजार ६९० कोटींच्या ठेवी आहेत. त्यातील १ हजार ४५५ कोटींच्या सर्वसाधारण ठेवींचा वापर विशेष प्रकल्पांसाठी केला जाऊ शकतो. “एखादा महत्त्वाचा प्रकल्प निधीअभावी थांबू नये यासाठी सर्वपक्षीय नगरसेवकांना विश्वासात घेऊन या ठेवी मोडण्याचा विचार केला जाईल,” असे बारणे यांनी सांगितले.
‘नगरसेवक निधी’ची नवी संकल्पना
यावेळच्या अर्थसंकल्पाचे मुख्य वैशिष्ट्य म्हणजे प्रथमच ‘नगरसेवक निधी’ची संकल्पना राबविण्यात येणार आहे. प्रभागातील स्थानिक आणि लहान-मोठी कामे तातडीने मार्गी लावण्यासाठी ३२ प्रभागांमधील प्रत्येक नगरसेवकाला प्रत्येकी १० लाख रुपयांच्या निधीची तरतूद करण्यात आली आहे.
महत्त्वाच्या शिफारसी
स्थायी समितीने मंजूर केलेल्या या सुधारित अर्थसंकल्पावर आता २४ मार्च रोजी होणाऱ्या विशेष सर्वसाधारण सभेत सविस्तर चर्चा होणार आहे. दरम्यान, स्थायी समितीच्या साप्ताहिक बैठकीच्या वेळेत आणि दिवसात बदल करण्याचे संकेत बारणे यांनी दिले आहेत. सध्या बुधवारी दुपारी २ वाजता होणारी बैठक आता सदस्यांच्या सोयीसाठी सोमवार किंवा शुक्रवारी सकाळी ११ वाजता घेण्याचे नियोजन सुरू आहे.
हे सुद्धा वाचा : नर्सची गळफास घेऊन आत्महत्या, जातीवाचक शिवीगाळ अन्….; सिडको ठाण्यात गुन्हा नोंद
नूतन आयुक्तांची उपस्थिती
नवनियुक्त आयुक्त डॉ. विजय सूर्यवंशी यांनी सोमवारी आपल्या पदाची सूत्रे स्वीकारली. पदभार स्वीकारल्यानंतर त्यांनी स्थायी समितीच्या बैठकीला भेट देऊन सर्व सदस्यांशी ओळख करून घेतली आणि शहराच्या विकासकामांबाबत माहिती जाणून घेतली.
