शुक्रवार, 18 सप्टेंबर 2026
गौरीच्या रूपाला ‘ट्रेंडिंग’ टच (फोटो- सोशल मिडिया)
दरवर्षी गौरी सजावटीसाठी नवनवीन संकल्पना शोधल्या जातात. यंदा मात्र सोशल मीडिया हा त्यासाठीचा महत्त्वाचा ‘आयडिया हब’ ठरत आहे. एखाद्या घरात पारंपरिक ग्रामीण संस्कृतीची झलक देणारी सजावट केली जाते, तर दुसरीकडे एखाद्या व्हिडिओमध्ये पाहिलेली आकर्षक थीम घरच्या घरी साकारली जाते. सजावट पूर्ण झाल्यानंतर तिचे फोटो आणि व्हिडिओ सोशल मीडियावर शेअर करण्याचीही उत्सुकता असते.
गौरीच्या पारंपरिक रूपाला आधुनिक सजावटीची जोड देताना फुलांची आरास, मातीची भांडी, जुन्या वस्तू, लाकडी साहित्य, दिवे, कापड आणि नैसर्गिक साहित्याचा वापर केला जात आहे. त्यामुळे सजावट केवळ सुंदर दिसण्यापेक्षा तिच्यामागे एक ‘कथा’ किंवा संकल्पना असावी, याकडेही लक्ष दिले जात आहे.
विशेष म्हणजे, सोशल मीडियावर सध्या कोणत्या प्रकारच्या सजावटीला पसंती मिळत आहे, कोणत्या थीमचे फोटो मोठ्या प्रमाणावर शेअर होत आहेत, हे पाहून पुढील सजावटीची कल्पना निवडली जात आहे. त्यामुळे गौरी सजावटीतही ‘ट्रेंड’ आणि पारंपरिकतेचा अनोखा मेळ पाहायला मिळत आहे.
जात्यावर दळणाऱ्या गौरीची थीम
जात्यावर दळणारी गौरी; जुन्या संसाराची आठवण
पारंपरिक ग्रामीण जीवनशैलीची आठवण करून देणारी थीम यंदाच्या गौरी सजावटीत पाहायला मिळत आहे. जात्यावर दळण करत असलेल्या गौरीची प्रतिकृती, आजूबाजूला धान्य, पाट-वरवंटा, मातीची भांडी आणि जुन्या काळातील घरगुती वस्तू अशी मांडणी करून जुन्या संसाराचे चित्र उभे करण्यात आले आहे. सोशल मीडियावर पाहिलेल्या ‘रस्टिक’ आणि पारंपरिक सजावटीच्या कल्पनेतून ही थीम साकारण्यात आली असून, जुन्या काळातील स्त्रीच्या दैनंदिन जीवनाची आठवण करून देणारी ही मांडणी लक्षवेधी ठरत आहे.
नेहमीच्या देव्हाऱ्यापेक्षा काहीतरी वेगळे करण्याच्या प्रयत्नातून यंदा गाडीच्या थीमवर गौरी सजविण्यात आली आहे. जुन्या काळातील गाडी किंवा बैलगाडीच्या धर्तीवर सजावट करून त्यात गौरीला विराजमान करण्यात आले आहे. फुलांची आरास, पारंपरिक वस्तू आणि प्रकाशयोजनेची जोड देत संपूर्ण देखावा तयार करण्यात आला आहे. सोशल मीडियावरील हटके थीमपासून प्रेरणा घेत घरच्या उपलब्ध वस्तूंमधून ही सजावट साकारण्यात आली आहे. त्यामुळे गौरीच्या पारंपरिक रूपासोबतच सजावटीची कल्पकता आणि ‘फोटो फ्रेंडली’ मांडणीही पाहायला मिळत आहे.
महालक्ष्मीच्या रूपात विराजमान गौरी
यंदा काही घरांमध्ये गौरींना महालक्ष्मीच्या रूपात सजविण्याचा ट्रेंड पाहायला मिळत आहे. पारंपरिक साडी, दागिने, मुकुट आणि आकर्षक अलंकारांनी गौरींची सजावट करून त्यांना महालक्ष्मीचे रूप देण्यात आले आहे. सोशल मीडियावरील अशा सजावटीच्या कल्पनांपासून प्रेरणा घेत घरच्या घरी हा सुंदर साज साकारला जात आहे.
