आमदारासमोर तलाठ्याचे तर्राट कारनामे! मद्यधुंद अवस्थेत काहीच सुधरेना; पुढे जे काही झालं…

आमदार आवाडे यांनी डवरी यांना बोलावून चौकशी केली असता त्यांना धड बोलताही येत नव्हते. ते मद्यधुंद अवस्थेतच कामावर असल्याचे समजल्यानंतर आवाडे यांनी दूरध्वनीवरुन थेट वरिष्ठांशी संपर्क साधला.

सहाय्यक तलाठी आढळला मद्यधुंद अवस्थेत
आमदार राहुल आवाडे करत होते सुशोभिकरण कामाची पाहणी
तलाठ्याचे तात्काळ निलंबित करण्याच्या सूचना

इचलकरंजी: जुना सांगली नाका परिसरातील रस्त्याचे रुंदीकरण व सुशोभिकरण कामाची पाहणी करण्यासाठी आलेल्या आमदार राहुल आवाडे यांच्यासमोर सहाय्यक तलाठी मद्यधुंद अवस्थेत झोकांड्या खातच आल्याचे निदर्शनास आले. त्याची गांभीर्याने दखल घेत आमदार आवाडे यांनी सहाय्यक तलाठ्याचे वैद्यकिय तपासणी करुन तात्काळ निलंबित करण्याच्या सूचना वरिष्ठांना केल्या.

आमदार राहुल आवाडे यांनी शुक्रवारी जुना सांगली नाका परिसरात भेट देऊन रस्ता रुंदीकरणासंदर्भात माहिती जाणून घेतली. यावेळी इचलकरंजी तलाठी कार्यालयातील सहाय्यक तलाठी डवरी सकाळी सकाळीच फुल्ल टाईट असल्याचे व झोकांड्या खात असल्याचे आमदारांच्या निदर्शनास आले.

दूरध्वनीवरुन थेट वरिष्ठांशी संपर्क

आमदार आवाडे यांनी डवरी यांना बोलावून चौकशी केली असता त्यांना धड बोलताही येत नव्हते. ते मद्यधुंद अवस्थेतच कामावर असल्याचे समजल्यानंतर आमदार आवाडे यांनी दूरध्वनीवरुन थेट वरिष्ठांशी संपर्क साधत या घटनेची माहिती दिली. डवरी यांची तत्काळ वैद्यकिय तपासणी करुन त्यांच्यावर तातडीने निलंबनाची कारवाई करण्याच्या सूचना केल्या. आमदार पाहणी करण्यासाठी आले असताना शासकीय कार्यालयातील जबाबदार अधिकारी चक्क मद्यधुंद अवस्थेत असल्याची चर्चा दिवसभर रंगली होती.