Raigad News: अलिबाग-रोहा मार्ग पुन्हा फोडून काँक्रीटीकरण सुरू! वर्षभरातच रस्ता झाला खराब, नागरिक त्रस्त
अलिबाग-रोहा मार्गावरील बायपास ते सहाण आणि पुढे नागावपर्यंत काँक्रीट रस्त्याचे काम गतवर्षी सुरू करण्यात आले होते. काम सुरू असताना या मार्गावर वारंवार वाहतूक कोंडी होत होती. मात्र रस्ता चांगला होईल, या अपेक्षेने प्रवाशांनी या त्रासाला सहकार्य केले. मात्र अवघ्या सात-आठ महिन्यांतच रस्त्याच्या कामातील काही भाग खराब झाल्याचे निदर्शनास आले.
सुमारे महिनाभरापूर्वी सहाण-मोठी गाव ते बायपासदरम्यान खराब झालेला रस्त्याचा पेंच फोडून त्याठिकाणी पुन्हा काँक्रीटीकरण करण्यात आले. मात्र नव्याने केलेल्या रस्त्यालाही योग्य लेव्हल नसल्याची तक्रार असून, संबंधित ठिकाणी आजही रस्ता खराब असल्याचे प्रवाशांचे म्हणणे आहे. आता पुन्हा बायपास ते ढवरदरम्यान खराब झालेला रस्त्याचा पंच फोडून नव्याने कॉक्रीटीकरण करण्यात येत आहे. त्यामुळे वर्षभरापूर्वी करण्यात आलेला रस्ता पुन्हा फोडून बांधण्याची वेळ आली आहे. विशेष म्हणजे है काम रात्रीच्या अंधारात करून सकाळपर्यंत पूर्ण केले जात असल्याने कामाच्या पद्धतीबाबतही प्रश्न निर्माण केले.
रस्त्याच्या काँक्रीटीकरणासाठी मोठ्या प्रमाणात निधी खर्च करण्यात येत असताना अवघ्या काही महिन्यांतच रस्ता खराब होऊन तो पुन्हा फोडावा लागत असल्याने कामाच्या गुणवत्तेबाबत नागरिकांकडून प्रश्न उपस्थित केले जात आहेत. नव्याने करण्यात येणारे काँक्रीटीकरण किती काळ टिकणार, असा सवालही प्रवाशांकडून केला जात आहे.
वारंवार सुरू असलेल्या रस्त्याच्या कामामुळे वाहतूक विस्कळीत होत असून, वाहनचालकांना तसेच प्रवाशांना नाहक त्रास सहन करावा लागत आहे. त्यामुळे अलिबाग-रोहा मार्गावरील या कामाची संबंधित विभागाने प्रत्यक्ष पाहणी करून कामाच्या दर्जाची तपासणी करावी, तसेच निकृष्ट काम आढळल्यास जबाबदारी निश्चित करावी, अशी मागणी जोर धरू लागली आहे.
.png "Videos"){kind=small}
