Raigad News: कर्जतमध्ये ‘गणपती बाप्पा मोरया’चा जयघोष; 424 बाप्पांना अनंत चतुर्दशीला भावपूर्ण निरोप
अनंत चतुर्दशीपर्यंत विराजमान झालेल्या बाप्पांना शुक्रवारी निरोप देण्यात आला. तालुक्यात कर्जत,नेरळ आणि माथेरान पोलीस ठाणे हद्दीत विराजमान झालेल्या 424 बाप्पांना अनंत चतुर्दशी निमित्त पाण्यात विसर्जन करण्यात आले. कर्जत नगरपरिषद हद्दीत विविध सहा ठिकाणी बाप्पांच्या विसर्जनाची तयारी गणेश घाटांवर करण्यात आली होती. दहिवली, श्री प्रति पंढरपूर, मुद्रा, महावीर पेठ, शनि मंदिर याशिवाय गुंडगे आणि भिसेगाव येथे देखील नगरपरिषद कडून व्यवस्था करण्यात आली होती.
नेरळ कळंब रस्त्यावर उल्हास नदीवरील दहिवली पुलावर गणेश घाटांवर गणेश भक्तांसाठी दहिवली तर्फे वरेडी ग्रामपंचायत कडून व्यवस्था करण्यात आली होती. तेथे मोठ्या प्रमाणावर गणेश भक्त आपल्या बाप्पांना निरोप देण्यासाठी घेऊन येत होते. या बाप्पांवर माजी सभापती अमर मिसाळ, थेट सरपंच मिसाळ यांच्यासह सर्व ग्रामपंचायत सदस्य यांच्याकडून पुष्प वृष्टी केली जात होती. तेथे वाहत्या पाण्यात ग्रामपंचायत तसेच स्थानिक कार्यकर्ते यांच्याकडून गणेश मूर्तींचे विसर्जन केले जात होते, नदीचे पाणी गढूळ असल्याने भक्तांना पाण्यात उतरू दिले जात नव्हते.
सर्वात मोठा आणि 30 वर्षाची परंपरा असलेला विसर्जन सोहळा नेरळ येथील गणेश घाटावर मध्यरात्री पर्यंत रंगला. नेरळ पूर्वेच्या राजाचे सर्वात उशिरा विसर्जन झाले. त्या ठिकाणी जिल्हा परिषद सदस्य सुनीता मोरे आणि कर्जत पंचायत समितीचे सदस्य भगवान चंचे, प्रशासक सुजित धनगर आणि ग्रामपंचायत अधिकारी अरुण कार्ले यांच्या मार्गदर्शानाखाली बाप्पांच्या विसर्जनाचा सोहळा रंगला.
गणेश मूर्तींवर पुष्प वृष्टी करण्यासाठी सर्व राजकीय पक्ष आणि सामाजिक संघटना यांचे प्रतिनिधी उपस्थित होते. पोलिस अधिकारी राहुल वरोटे यांनी स्वतः कल्याण कर्जत रस्त्यावर उभे राहून वाहतूक कोंडी होणार नाही आणि गणेश भक्तांना कोणताही त्रास होणार नाही याची काळजी घेत होते. तर येथील ब्रिटिश कालीन धरणावर कोणत्याही गणेश भक्तांना पाण्यात उतरण्याची मुभा नव्हती, ग्रामपंचायत कडून दोन बोटी तैनात ठेवण्यात आल्या होत्या आणि त्यांच्या माध्यमातून गणेश मूर्तींचे खोल पाण्यात विसर्जन केले जात होते.
अनंत चतुर्दशी चे दिवशी कर्जत मधील अनेक मंडळाचे गणपती बाप्पाचे विसर्जन उल्हास नदीमध्ये गणेश घाटावर झाले. या प्रसंगी शिवशंभो युवा हायकर्स कर्जत संस्थेचे खालील पदाधिकारी व सदस्य प्रशासनाचे मदतीसाठी, गणेश विसर्जनसाठी रोप व इतर साहित्य घेऊन उपस्थित होते. विकास चित्ते, तुषार दिवेकर , शैलेश सातपुते, महेंद्र कर्वे, सुमित गुरव, गौरव चित्ते, नेहा सातपुते, इशांत मालुसरे आदी कार्यकर्ते गणेश भक्त आणि प्रकाशनाला मदत करीत होते.
.png "Videos"){kind=small}
