ध्वजारोहणाचा मान मिळाला, आता पालकमंत्रीपद कधी? भरत गोगावलेंचा मोठा दावा

रायगडच्या पालकमंत्रीपदाचा तिढा अद्याप कायम आहे. स्वातंत्र्यदिनानिमित्त ध्वजारोहणाचा मान मिळाल्यानंतर मंत्री भरत गोगावले यांनी पालकमंत्रीपदाबाबत मोठा दावा केला. तर आमदार अनिकेत तटकरे यांनी अंतिम निर्णय वरिष्ठ नेतेमंडळी घेतील, असे स्पष्ट केले.

• ध्वजारोहणाचा मान मिळाल्यानंतर भरत गोगावलेंचा पालकमंत्रीपदावर दावा
• ‘पालकमंत्रीपद मिळण्यात कुठलाही अडथळा नाही’ : भरत गोगावले
• अंतिम निर्णय वरिष्ठ नेतेमंडळी घेतील : अनिकेत तटकरे

 

रायगड : देशभरात आज ८० वा स्वातंत्र्यदिन मोठ्या उत्साहात साजरा करण्यात आला. विविध जिल्ह्यांमध्ये मंत्र्यांच्या हस्ते ध्वजारोहणाचे कार्यक्रम पार पडले. रायगडमध्ये मंत्री भरत गोगावले यांच्या हस्ते ध्वजारोहण करण्यात आले. मात्र, रायगडचे पालकमंत्रीपद अद्याप निश्चित झालेले नसल्याने या कार्यक्रमानंतर राजकीय चर्चेला पुन्हा उधाण आले.

ध्वजारोहणानंतर माध्यमांनी भरत गोगावले यांना रायगडच्या पालकमंत्रीपदाबाबत प्रश्न विचारला. त्यावर गोगावले यांनी आपल्यालाच पालकमंत्रीपद मिळणार असल्याचा विश्वास व्यक्त केला. ध्वजारोहणाचा मान मिळाला आहे, त्याचप्रमाणे पालकमंत्रीपदाचाही निर्णय लवकरच होईल, असे त्यांनी सांगितले.

‘पालकमंत्रीपद मिळण्यात अडथळा नाही’

रायगडचे पालकमंत्रीपद मिळण्यात आता कोणताही अडथळा राहिलेला नाही, असा दावा भरत गोगावले यांनी केला. त्यामुळेच आपण पालकमंत्रीपदाबाबत ठामपणे बोलत असल्याचे त्यांनी स्पष्ट केले.

‘गोपीनाथ मुंडे काँग्रेसमध्ये येणार होते’, पृथ्वीराज चव्हाणांचा मोठा गौप्यस्फोट; मुंडेंनी मंत्रिपदाची अट घातल्याचा चव्हाणांचा दावा

महायुती सरकार स्थापन झाल्यापासून रायगड आणि नाशिकच्या पालकमंत्रीपदाचा प्रश्न चर्चेत आहे. रायगडमध्ये भरत गोगावले आणि अदिती तटकरे हे दोन्ही नेते पालकमंत्रीपदासाठी इच्छुक असल्याची चर्चा आहे. त्यामुळे या पदाचा अंतिम निर्णय अद्याप झालेला नाही.

अनिकेत तटकरे म्हणाले, ‘वरिष्ठ निर्णय घेतील’

दरम्यान, राष्ट्रवादी काँग्रेसचे आमदार अनिकेत तटकरे यांनीही रायगडच्या पालकमंत्रीपदावर भाष्य केले. मुख्यमंत्री आणि दोन्ही उपमुख्यमंत्र्यांसह वरिष्ठ नेतेमंडळी या विषयावर निर्णय घेतील, असे त्यांनी सांगितले.

रायगडच्या हितासाठी आणि जिल्ह्याच्या विकासासाठी महायुतीतील सर्व घटक एकत्रितपणे काम करतील, अशी भूमिका अनिकेत तटकरे यांनी मांडली. त्यामुळे पालकमंत्रीपदाचा निर्णय कोणाच्या बाजूने लागणार, याबाबतची उत्सुकता कायम आहे.

रायगडच्या पालकमंत्रीपदाचा निर्णय कधी?

एकीकडे शिवसेना शिंदे गटाकडून भरत गोगावले यांचे नाव पालकमंत्रीपदासाठी पुढे केले जात आहे. स्वतः गोगावले यांनीही पद लवकरच आपल्याला मिळेल, असा विश्वास व्यक्त केला आहे. दुसरीकडे राष्ट्रवादी काँग्रेसकडून अदिती तटकरे यांचे नाव चर्चेत असल्याने महायुतीतील समीकरणांकडे लक्ष लागले आहे.

‘संघाने संविधान स्वीकारावे, देणगीचा हिशोब देशाला द्यावा’; हर्षवर्धन सपकाळांचा RSS-BJP वर हल्लाबोल

स्वातंत्र्यदिनाच्या कार्यक्रमानंतर गोगावले यांच्या वक्तव्यामुळे रायगडच्या पालकमंत्रीपदाचा निर्णय आता लवकर होण्याची शक्यता व्यक्त केली जात आहे. मात्र, अंतिम निर्णय मुख्यमंत्री आणि दोन्ही उपमुख्यमंत्र्यांच्या पातळीवर होणार असल्याने अधिकृत घोषणेची प्रतीक्षा कायम आहे.