Raigad News: ४० वर्षांचा संघर्ष संपणार? नवीन शेवा आणि हनुमान कोळीवाड्याचा जेएनपीएविरोधात बेमुदत धरणे आंदोलनाचा निर्धार

उरणमधील नवीन शेवा आणि हनुमान कोळीवाडा गावकऱ्यांनी हक्काच्या पुनर्वसन जमिनीसाठी पुन्हा एकदा आंदोलनाची भूमिका घेतली आहे. तब्बल ४० वर्षांपासून प्रलंबित असलेल्या मागणीसाठी दोन्ही गावांनी एकत्र येत आता आरपारच्या लढ्याचा इशारा दिला आहे.

• हक्काची जमीन मिळावी यासाठी जेएनपीए प्रशासन भवनासमोर बेमुदत धरणे आंदोलन करण्याचा निर्धार गावकऱ्यांनी केला आहे.
• पुनर्वसनाच्या मागणीसाठी नवीन शेवा आणि हनुमान कोळीवाडा ग्रामस्थ गेल्या चार दशकांपासून प्रशासनाकडे पाठपुरावा करत आहेत.
• आश्वासनांवर विश्वास न ठेवता प्रत्यक्ष जमीन मिळेपर्यंत आंदोलन सुरू ठेवण्याचा निर्धार ग्रामस्थांनी व्यक्त केला आहे.

उरण : चार दशके झाली आश्वासनांवर आश्वासने मिळाली, पण हक्काची जमीन काही मिळाली नाही, पुनर्वसनाच्या नावाखाली ४० वर्षे गावकऱ्यांना झुलवत ठेवणाऱ्या प्रशासनाविरोधात आता नवीन शेवा आणि हनुमान कोळीवाडा एकत्र आले आहे. आता आश्वासन नको, कागदावरचा हक्क नको, प्रत्यक्ष जमीन हवी या मागणीसाठी येत्या १५ ऑगस्टपासून जेएनपीए प्रशासन भवनासमोर बेमुदत धरणे आंदोलन छेडण्याचा निर्धार दोन्ही गावांनी केला आहे.

अकोल्यातील नागरिकांवर मोठं जलसंकट; काटेपूर्णात 5 वर्षांच्या तुलनेत निम्म्याहून कमी साठा

जेएनपीए बंदराच्या उभारणीसाठी आपल्या जमिनी गमावून विस्थापित झालेल्या या गावकऱ्यांच्या संयमाचा आता अंत झाला आहे. रविवारी नवीन शेवा येथील शांतेश्वरी देवी मंदिरात झालेल्या संयुक्त ग्रामसभेत दोन्ही गावांचा संताप अक्षरशः उफाळून आला. मंदिराचा सभागृह नागरिकांनी खचाखच भरला होता. ‘जमीन आमच्या हक्काची, नाही कुणाच्या बापाची’ ‘अरे कोण म्हणतो देणार नाय, घेतल्याशिवाय राहणार नाय’ अशा घोषणांनी संपूर्ण परिसर दणाणून गेला.  (फोटो सौजन्य – AI Created) 

अवघ्या अडीच हेक्टर जागेवर पुनर्वसन

जमिनी घेताना विकासाचा गजर आणि पुनर्वसन देताना मात्र टाळाटाळ ! असा संतप्त सवाल गावकऱ्याऱ्यांनी उपस्थित केला आहे. उपलब्ध माहितीनुसार, जेएनपीए बंदरासाठी विस्थापित करण्यात आलेल्या नवीनशेवा गावाला पुनर्वसनाच्या निकषानुसार किमान ३३ हेक्टर जमीन मिळणे अपेक्षित असल्याचा गावकऱ्यांचा दावा आहे. मात्र प्रत्यक्षात केवळ १० हेक्टर जागेवर पुनर्वसन करण्यात आले, शेवा कोळीवाडा अर्थात सध्याच्या हनुमान कोळीवाड्यालाही १० हेक्टरच्या तुलनेत अवघ्या अडीच हेक्टर जागेवर पुनर्वसन करण्यात आल्याचे गावकऱ्यांचे म्हणणे आहे.

गेली ४० वर्षे वेगवेगळ्या पातळ्यांवर लढा

म्हणजेच ज्यांच्या जमिनी घेतल्या, त्यांनाच त्याच्या हक्काच्या पुनर्वसनापासून वंचित ठेवायचे आणि त्याच जमिनीवर इतरांना कोट्यवधींच्या उलाढालीची दारे उघडायची हा कोणता न्याय? असा सवाल आता गावकरी विचारत आहेत. या हक्कासाठी गावकरी गेली ४० वर्षे वेगवेगळ्या पातळ्यांवर लढत आहेत, हनुमान कोळीवाड्यातील महिलांनी यापूर्वी जेएनपीए बंदराचे चैनल बंद करण्यासारखी आंदोलने करून प्रशासनाला हादरा दिला आहे. मात्र दोन्ही गावांचे लढे स्वतंत्र राहिल्याने त्याचा फायदा प्रशासनाला झाला, अशी भावना गावक-यांमध्ये आहे.

विविध मान्यवरांची हजेरी

माजी आमदार मनोहर भोईर यांच्या अध्यक्षतेखाली झालेल्या या सभेला पंचायत समिती सदस्य दीपक भोईर, सरपंच सोनल घरत, ग्रामस्थ मंडळाचे अध्यक्ष कमलाकर पाटील, पंडित घरत, चंद्रकांत घरत, नारायण सुतार, आरती कोळी, माजी सरपंच सुरेश कोळी, नितीन कोळी आदीसह दोन्ही गावचे ग्रामस्थ मोठ्या संख्येने उपस्थित होते.

‘फोडा, झुलवा, आश्वासन’ हे इथून पुढे चालणार नाही

नवीन शेवा आणि हनुमान कोळीवाडा या दोन्ही गावांनी आपल्या प्रलंबित न्याय्य मागण्यांसाठी एकत्रितपणे आंदोलनाचा एल्गार पुकारल्याने प्रशासनापुढे मोठे आव्हान उभे ठाकले आहे. एका गावाचा आवाज प्रशासनाला दाबता येईल, पण दोन गावांची ही अभेद्य एकजूट आणि संघर्ष आता दाबणे मुळीच शक्य नाही, असा ठाम निर्धार या संघर्ष सभेत ग्रामस्थानी एकमुखाने व्यक्त केला.

Mumbai News: मुंबईतील लोकल स्थानकांवर मिळणार ‘गार वारा’! पश्चिम रेल्वेवर मोठ्या आकाराच्या एचव्हीएलएस पंख्यांची संख्या ९६ वर

प्रशासनावर जोरदार साधला निशाणा

आपली जमीन जेएनपीए दुसऱ्याऱ्यांना भाड्याने देते आणि त्यातून कोट्यवधी रुपये कमावते. मग आमच्या हक्काची जमीन आम्हाला देताना अडचण काय? आपण लढत नाही म्हणून आपल्याला आपला हक्क मिळत नाही. कागदोपत्री आपला हक्क मान्य आहे. त्याच हक्काची जमीन आपण मागत आहोत. आपल्याकडील कागदपत्रे आपली बाजू भक्कम करणारी आहेत, त्यामुळे आपला हक्क मिळवून घेतल्याशिवाय आपण शांत बसणार नाही.- मनोहर भोईर, माजी आमदार

(डिस्क्लेमर: हे नवराष्ट्र वृत्तपत्राचे स्वयंचलित न्यूज फीड आहे. ते navarashtra.com च्या कर्मचाऱ्यांनी संपादित केलेले नाही.)