
Raigad News: पेणच्या खारेपाटात पाणीटंचाई तीव्र; चार दिवसांतून एकदाच नळाला पाणी, नागरिक त्रस्त
आधीच अपुरा आणि अनियमित पाणीपुरवठा, त्यात आता तीन दिवसांची प्रतीक्षा करावी लागणार असल्याने नागरिकांमध्ये नाराजीचे वातावरण आहे. विशेष म्हणजे, पाणीपुरवठ्याचे वेळापत्रक पाहता अनेक गावांमध्ये रात्री उशिरा, मध्यरात्री किंवा पहाटेच्या सुमारास पाणी सोडले जाणार आहे. त्यामुळे दिवसभर शेतात कष्ट करून घरी परतणाऱ्या शेतकरी कुटुंबांना पिण्याच्या पाण्यासाठी रात्री-अपरात्री जागे राहण्याची वेळ येणार आहे. (फोटो सौजन्य – AI Created)
विशेषतः महिलांना घरातील स्वयंपाक, पिण्याचे पाणी, जनावरांसाठी पाणी आणि इतर दैनंदिन कामांचे नियोजन करताना मोठी कसरत करावी लागणार आहे. पाणी येण्याची वेळ रात्रीची असल्याने घरातील कामे बाजूला ठेवून पाण्याची वाट पाहावी लागणार आहे. पाणी साठवून ठेवण्याची मर्यादा असल्याने अनेक कुटुंबांसमोर पाण्याचे नियोजन करण्याचे मोठे आव्हान उभे राहिले आहे.
पेण तालुक्यातील हेटवणे धरण हे येथील स्थानीक नागरीकांच्या जमीनी संपादीत करून बांधण्यात आले आहे मग या धरणावर प्रथम अधिकार पेण तालुक्यातील जनतेचा आहे. पण तसे न होता या धरणातील पाणी मुंबईतील नागरिकांना दिला जातो. जर का हेटवणे धरणाचे पाणी पेण तालुक्यातील जनतेला दिले आसते तर ही पाणी टंचाईचा प्रश्न उद्भवला नसता याला जबाबदार कोण येथील लोकप्रतिनिधी की प्रशासकीय अधिकारी.
दरम्यान, उपअभियंता ग्रामीण पाणीपुरवठा, जिल्हा परिषद उपविभाग पेण यांच्या कार्यालयाकडून ग्रामपंचायतींना तीन दिवसाआड पाणीपुरवठ्याचे वेळापत्रक पाठविण्यात आले आहे. कमी पर्जन्यमानामुळे पाणी उपलब्धतेवर परिणाम झाल्याचे या पत्रात नमूद करण्यात आले आहे. त्यानुसार वडखळ, वाशी, खारेपाट तसेच इतर विभागांतील गावांसाठी वेगवेगळ्या वेळामध्ये पाणीपुरवठ्याचे नियोजन केले आहे. मात्र, पाणीटंचाईवर उपाय म्हणून पाणीपुरवठ्याचे दिवस कमी करण्याऐवजी पाण्याची उपलब्धता वाढविण्यासाठी कायमस्वरूपी उपाययोजना कधी होणार, असा सवाल आता ग्रामस्थांकडून उपस्थित केला जात आहे.
पिण्याचे पाणी ही नागरिकांची मूलभूत गरज असताना त्यासाठी नागरिकांना चार दिवस प्रतीक्षा करावी लागणे ही चिंतेची चाब आहे. दिवसभर शेतात राबायचे आणि रात्री पाण्यासाठी जागायचे, अशी वेळ खारेपाटातील जनतेवर आणू नका! पाणीटंचाईच्या नावाखाली नागरिकांच्या झोपेचा आणि दैनंदिन जीवनाचा प्रश्न निर्माण होऊ नये.