मोहोळमध्ये अजित पवारांना मोठा धक्का; शरद पवारांची तुतारी वाजली

मोहोळ विधानसभा मतदारसंघात महाविकास आघाडीतील शरद पवार गटाचे उमेदवार राजू खरे यांनी ३०,२०२ मतांची आघाडी घेत विजय संपादन केला.

मोहोळ : सोलापूर जिल्ह्याचे लक्ष लागून राहिलेल्या मोहोळ विधानसभा मतदारसंघात महाविकास आघाडीतील शरद पवार गटाचे उमेदवार राजू खरे यांनी ३०,२०२ मतांची आघाडी घेत विजय संपादन केला त्यांचे प्रतिस्पर्धी उमेदवार महायुतीतील अजित पवार गटाचे विद्यमान आमदार यशवंत माने यांना ९५,६३६ इतकी मते मिळाली.

मोहोळ विधानसभेच्या या निवडूकीत खूपच नाट्यमय घडामोडी घडल्या. अपक्ष उमेदवार संजय क्षीरसागर यानी मतदानाच्या दोन दिवस आधी महाविकास आघाडीचे राजू खरे यांना आपला पाठिंबा जाहीर केल्यामुळे महायुतीचे उमेदवार तथा विद्यमान आमदार यशवंत माने यांच्याविरुद्ध झालेल्या लढतीत राजू खरे यांचा पहिल्याच निवडणुकीत ३० हजारांच्या फरकाने विजय सुखकर झाला.

यंदा महायुतीकडून राष्ट्रवादी काँग्रेसचे विद्यमान आमदार यशवंत माने पुन्हा एकदा मैदानात उतरले होते तर दुसरीकडे महाविकास आघाडीतील राष्ट्रवादी काँग्रेस शरदचंद पवार पक्षाने आमदार रमेश कदम यांच्या मुलीला प्रथम उमेदवारी दिली होती. पण अचानक ती उमेदवारी बदलून राजू खरे यांना दिली, एकंदरीत पहिल्यांदाच या मतदारसंघात राष्ट्रवादी काँग्रेस विरुद्ध राष्ट्रवादी काँग्रेस शरदचंद्र पवार यांच्यात काटे की टक्कर असे नवीन चित्र पाहायला मिळाले.

हे सुद्धा वाचा : जानकर जिंकले, परंतु सातपुतेंनी घाम फोडला; माळशिरस विधानसभा मतदारसंघात झाली चुरशीची लढत

यामध्ये महाविकास आघाडीतील शरद पवार गटाचे राजू खरे यांना १ लाख २५ हजार ८३८ इतकी मते मिळाली तर महायुतीचे अजित पवार गटाचे उमेदवार यशवंत माने यांना ९५ हजार ६३६ इतकी मते मिळाली. यामध्ये राजू खरे हे ३० हजार २०२ मतांचे मताधिक्य घेऊन विजयी झाले.

मोहोळचा माझा विजय हा ऐतिहासिक विजय असून, मी या विजयाचे सर्व श्रेय येथील बारा बलुतेदारांना आणि मायबाप जनतेला सुपूर्द करतो. माझ्या या विजयामुळे या तालुक्यातील दादागिरी, हुकुमशाही, झुंडशाही, तानाशाही आता संपुष्टात आली आहे. मी आजपासून मोहोळच्या या जनतेची प्रामाणिक सेवा करण्यासाठी कटिबद्ध राहीन.

– राजू खरे, नूतन आमदार, मोहोळ विधानसभा