गळीत हंगामाआधी राजू शेट्टींची मोर्चेबांधणी! कराडमध्ये बाळासाहेब पाटील यांची घेतली भेट; नेमकं काय चर्चा झाली?

स्वाभिमानी शेतकरी संघटनेचे नेते माजी खासदार राजू शेट्टी यांनी माजी सहकार व पणन मंत्री आणि सह्याद्री सहकारी साखर कारखान्याचे अध्यक्ष बाळासाहेब पाटील यांची कराड येथील संपर्क कार्यालयात भेट घेतली आहे.

• गळीत हंगामाआधी राजू शेट्टींची मोर्चेबांधणी!
• कराडमध्ये बाळासाहेब पाटील यांची घेतली भेट
• नेमकं काय चर्चा झाली?

कराड : स्वाभिमानी शेतकरी संघटनेचे नेते माजी खासदार राजू शेट्टी यांनी माजी सहकार व पणन मंत्री आणि सह्याद्री सहकारी साखर कारखान्याचे अध्यक्ष बाळासाहेब पाटील यांची कराड येथील संपर्क कार्यालयात भेट घेतली आहे. राज्य शासनाने यंदाचा गळीत हंगाम 15 ऑक्टोबरपासून सुरू करण्याचा आदेश दिला आहे. या पार्श्वभूमीवर राजू शेट्टी यांनी राज्यभरातील साखर कारखानदारांच्या भेटीगाठीचा दौरा सुरू केला आहे. साखर उद्योगाला ऊर्जितावस्था आणण्यासाठी आणि ऊस उत्पादकांना न्याय मिळवून देण्यासाठी केंद्र व राज्य सरकारकडे धोरणात्मक निर्णयांसाठी पाठपुरावा करण्यासाठी या आंदोलनात सहकार्य करावे, अशी विनंती त्यांनी बाळासाहेब पाटील यांना केली.

 

यावेळी राजू शेट्टी यांनी आपल्या मागण्यांचे निवेदन बाळासाहेब पाटील यांना सादर केले. यात प्रमुख मागण्या अशा आहेत -15 ऑक्टोबरपासून गळीत हंगाम सुरू झाल्यास ऊसातील रिकव्हरी घटून शेतकरी आणि कारखाने दोघांचेही मोठे नुकसान होणार आहे. त्यामुळे केंद्र व राज्य सरकारने ऊस उत्पादक शेतकऱ्यांना प्रति टन 500 रुपये अनुदान द्यावे. साखरेचा किमान हमीभाव (MSP) प्रति किलो 50 रुपये करावा आणि सी-हेवी इथेनॉलचा विक्री दर प्रतिलिटर 70 रुपये निश्चित करावा. इथेनॉल उत्पादनावर बंदी आल्याने कारखान्यांच्या प्रकल्पावरील कर्जाच्या हप्त्याचा व व्याजाचा बोजा वाढणार असल्याने संपूर्ण वर्षभरासाठी व्याज सवलत आणि हप्त्याला मुदतवाढ देणारी योजना जाहीर करावी.

हे सुद्धा वाचा : हृदयाच्या आरोग्याची काळजी घ्या! ‘हे’ छुपे धोके तुम्हाला माहिती आहेत का? तज्ज्ञांनी दिला महत्त्वाचा सल्ला

बाळासाहेब पाटील यांनी राजू शेट्टी यांचे पुष्पगुच्छ देऊन स्वागत केले. यावेळी स्वाभिमानी शेतकरी संघटनेचे सातारा जिल्हाध्यक्ष देवानंद पाटील, उपाध्यक्ष दादासाहेब यादव, कराड उत्तर तालुका अध्यक्ष प्रमोद जगदाळे, कराड दक्षिण तालुका अध्यक्ष बापूसाहेब साळुंखे, रामचंद्र साळुंखे यांच्यासह पदाधिकारी उपस्थित होते. दरम्यान, शासनाने साखर कारखाने 15 ऑक्टोबरला सुरू करण्याचा निर्णय चुकीचा असल्याचे मत बाळासाहेब पाटील यांनीही यापूर्वी व्यक्त केले आहे. 15 नोव्हेंबर ते 15 मार्च दरम्यानच साखर परिपक्व होते, असे त्यांचे म्हणणे आहे.