गुरुवार, 15 ऑक्टोबर 2026
महाबळेश्वर नगरपालिका इमारतीच्या नूतनीकरणाचे काम अखेर सुरू
नगरपालिकेची जुनी इमारत अपुरी पडत असल्याने आणि प्रशासकीय कामकाजाचा विस्तार होत असल्याने नवीन भव्य इमारतीचे नियोजन करण्यात आले होते. मात्र, काही तांत्रिक अडचणी, निधी आणि इतर कारणांमुळे हे काम गेली अनेक वर्षे प्रलंबित होते. याशिवाय सत्ताधारी आणि विरोधक यांच्यातील राजकीय हेवेदावे यामुळे देखील या इमारतीचे काम राखडले होते. ऐतिहासिक आणि पर्यटनदृष्ट्या महत्त्वाच्या असलेल्या महाबळेश्वर शहराच्या मध्यवर्ती भागात ही इमारत अशीच पडून राहिल्याने नागरिकांमधूनही चिंता व्यक्त होत होती.
नगराध्यक्ष सुनील शिंदे व मुख्याधिकारी योगेश पाटील यांनी या रखडलेल्या प्रकल्पाची गांभीर्याने दखल घेत नगराध्यक्ष सुनील शिंदे आणि नगरसेवकांनी शासन दरबारी सातत्याने मदत व पुनर्वसन मंत्री मकरंद आबा पाटील यांच्या नेतृत्वाखाली विविध विभागांच्या परवानग्या मिळवणे, निधीचा मार्ग मोकळा करणे आणि तांत्रिक त्रुटी दूर करणे यासाठी नगराध्यक्ष सुनिल शिंदे यांनी विशेष प्रयत्न केले. अखेर त्यांच्या या भगीरथ प्रयत्नांना यश आले असून, प्रशासकीय मंजुरी मिळून इमारतीचे बांधकाम पूर्ण क्षमतेने सुरू करण्यात आले आहे.
आता ही इमारत केवळ प्रशासकीय कार्यालय न राहता, महाबळेश्वरच्या वैभवात भर घालणारी एक देखणी वास्तू ठरणार आहे. यामध्ये नागरिकांसाठी सर्व आधुनिक सुविधा, विविध विभागांची सुसज्ज कार्यालये, प्रशस्त सभागृह आणि वाहनतळाची व्यवस्था करण्यात येणार आहे. यामुळे पालिकेचा कारभार अधिक गतिमान होईल आणि एकाच छताखाली नागरिकांची सर्व कामे वेळेत पूर्ण होण्यास मदत होईल.
दरम्यान, या कामाचे महाबळेश्वरमधील स्थानिक नागरिक, व्यापारी आणि राजकीय वर्तुळातून जोरदार स्वागत होत असून, सत्ताधारी गटाचे नेते नगराध्यक्ष सुनील शिंदे व त्यांचे सहकारी नगरसेवकांचे विशेष आभार मानले जात आहेत.
नगरपालिकेची इमारत शहराची एक मुख्य ओळख
“महाबळेश्वर नगरपालिकेची ही इमारत शहराची एक मुख्य ओळख आहे. हे काम अनेक वर्षे रखडल्यामुळे नागरिकांची गैरसोय होत होती. परंतु, आम्ही सर्व नगरसेवकांनी आणि सहकाऱ्यांनी घेतलेल्या कष्टामुळे आणि पाठपुराव्यामुळे आज हे काम सुरू होत असल्याचा मनस्वी आनंद आहे. महाबळेश्वरच्या जनतेला दर्जेदार सुविधा देणारी ही वास्तू लवकरात लवकर पूर्ण व्हावी, हाच आमचा प्रयत्न आहे.”
– सुनील शिंदे, नगराध्यक्ष, महाबळेश्वर नगरपालिका.
