वैष्णवी हगवणे मृत्यूप्रकरणी महिला आयोगाची भूमिका काय? रुपाली चाकणकर म्हणाल्या...
कराड : हुंडा विरोधी कायदा असताना आजही हुंड्यासाठी छळ होत आहेत. त्यात वैष्णवी हगवणे सारख्या महिलेचा जीव जात असेल तर, या विकृतीच्या विरोधात लढलेच पाहिजे. वैष्णवीचा मृत्यू दुर्दैवी आहे. तिच्या मृत्यूप्रकरणी कायद्याच्या चौकटीत राहून राज्य महिला आयोग कडक भूमिका घेत आहे, असे राज्य महिला आयोगाच्या अध्यक्षा रूपाली चाकणकर यांनी सांगितले. कराड दौऱ्यावर असताना माध्यमांशी संवाद साधताना त्या बोलत होत्या.
चाकणकर म्हणाल्या, वैष्णवी हगवणे मृत्यूप्रकरणी तपास योग्य दिशेने व्हावा, यासाठी राज्य महिला आयोगाने तपास यंत्रणेला सूचना केल्या आहेत. आरोपीवर गुन्हा दाखल झाला आहे. काहीजण ताब्यात आहेत. फरार आरोपींचा शोध घेण्यासाठी आम्ही आग्रही आहोत. या प्रकरणातील गुन्हेगारांवर कारवाई तर होणारच आहे. परंतु, या संपूर्ण प्रकरणाचा महिला आयोगाच्या वतीने आम्ही निश्चितच पाठपुरावा करणार आहोत. खरंतर, राजेंद्र हगवणे हे राष्ट्रवादी काँग्रेसचे कोणतेही पदाधिकारी नाहीत. त्यांच्या मुलाकडे पक्षाचे एक पद होते. पण पक्ष कोणताही असला तरी गुन्हेगार हा गुन्हेगारच असतो. त्यामुळे कोणीही असले तरी, गुन्हेगाराला आम्ही पाठीशी घालणार नाही. उलट ही विकृती ठेचून काढली पाहिजे, असेही त्यांनी एका प्रश्नावर बोलताना सांगितले. तसेच राजेंद्र हगवणे यांच्या मुलाला पक्षातून निलंबित केले असल्याचेही त्यांनी यावेळी सांगितले.
‘त्या’ वडिलांच्या नावावर निवडून आल्या आहेत
रोहिणी खडसे यांनी केलेल्या राज्य महिला आयोगाला श्रद्धांजली वाहण्याची वेळ आली असल्याच्या विधानावर विचारले असता चाकणकर म्हणाल्या, महिला आयोगावर बोलणाऱ्या त्या कोण आहेत? त्या त्यांच्या वडिलांच्या नावावर निवडून आल्या आहेत. त्यांच्याच कार्यालयातील पीए आणि त्याच्या बायकोच्या तक्रारी राज्य महिला आयोगाकडे आल्या आहेत. त्या स्वतः संबंधित महिलेला न्याय देवू शकत नाहीत, याचा त्यांनी अगोदर विचार करावा. उलट राज्य महिला आयोगाचे काम गेल्या साडेतीन वर्षांमध्ये चांगले चालले आहे. अशा परिस्थितीत त्यांच्या बोलण्याला विशेष महत्त्व द्यावे, असे मला वाटत नसल्याची टिपण्णीही त्यांनी यावेळी केली.
.png "Videos"){kind=small}
