
कोकणचा प्रवास आता अवघ्या १ तास १० मिनिटांत! नवी मुंबई-चिपी विमानसेवा आजपासून सुरू, जाणून घ्या वेळापत्रक आणि तिकीट दर
या विमानसेवेचे वेळापत्रकही निश्चित करण्यात आले आहे. नवी मुंबईहून दररोज सकाळी ७ वाजून ५५ मिनिटांनी विमान उड्डाण करेल आणि सकाळी ९ वाजून ५ मिनिटांनी चिपी विमानतळावर पोहोचेल. तर चिपी विमानतळावरून सकाळी ९ वाजून २५ मिनिटांनी विमान नवी मुंबईच्या दिशेने उड्डाण करेल. हे विमान सकाळी १० वाजून ३५ मिनिटांनी नवी मुंबईत दाखल होईल. या मार्गावरील प्रवासासाठी अंदाजे १ तास १० मिनिटांचा कालावधी लागणार आहे. सिंधुदुर्गला जाणाऱ्या विमानाची प्रवासी क्षमता ७२ इतकी आहे.
या विमानसेवेचे तिकीट दर अंदाजे ३,५०० ते ७,५०० रुपयांदरम्यान असणार आहेत. मात्र, प्रवासाची तारीख आणि तिकिटांची मागणी यानुसार दरांमध्ये बदल होऊ शकतो. नवी मुंबई विमानतळावरून सोलापूर, जळगाव, सिंधुदुर्ग आणि पुण्यासह एकूण १६ शहरांसाठी विमानसेवा उपलब्ध होत असल्याची माहिती देण्यात आली आहे.
दरम्यान, चिपी विमानतळाचे उद्घाटन ९ ऑक्टोबर २०२१ रोजी झाले होते. सुरुवातीला मुंबई-सिंधुदुर्ग मार्गावर अलायन्स एअरची विमानसेवा सुरू करण्यात आली होती. मात्र, ऑक्टोबर २०२४ मध्ये ही सेवा बंद झाली. त्यानंतर चिपी विमानतळावरून पुणे, बंगळुरू आणि हैदराबादसारख्या शहरांसाठी फ्लाय ९१कडून विमानसेवा सुरू करण्यात आली.
आता नवी मुंबईशी थेट हवाई संपर्क सुरू झाल्याने सिंधुदुर्ग जिल्ह्यातील प्रवाशांना मोठा दिलासा मिळण्याची अपेक्षा आहे. विशेषतः मुंबई आणि नवी मुंबई परिसरात नोकरी-व्यवसायानिमित्त राहणाऱ्या कोकणवासीयांना गावी जाण्यासाठी कमी वेळ लागणार आहे. पर्यटनासाठी सिंधुदुर्गात येणाऱ्या प्रवाशांनाही या सेवेचा फायदा होऊ शकतो. पर्यटकांची संख्या वाढल्यास स्थानिक हॉटेल व्यवसाय, वाहतूक, पर्यटन सेवा आणि रोजगाराच्या संधींनाही चालना मिळण्याची शक्यता आहे.
मात्र, यापूर्वी विमानसेवा बंद पडल्याचा अनुभव लक्षात घेता, नवी मुंबई-चिपी मार्गावरील ही सेवा नियमित आणि अखंडित सुरू राहावी, अशी अपेक्षा प्रवाशांकडून व्यक्त केली जात आहे.
Ans: नवी मुंबई ते सिंधुदुर्गमधील चिपी विमानतळादरम्यान आजपासून नियमित विमानसेवा सुरू होत आहे.
Ans: या मार्गावरील विमानप्रवासासाठी अंदाजे १ तास १० मिनिटे लागणार आहेत.
Ans: तिकिटांचे दर अंदाजे ३,५०० ते ७,५०० रुपयांदरम्यान आहेत. मात्र, मागणी आणि प्रवासाच्या तारखेनुसार दर बदलू शकतात.