शनिवार, 19 सप्टेंबर 2026
वाठार स्टेशन येथे घेवडा पिकाची पाहणी करताना जिल्हाधिकारी संतोष पाटील व परिसरातील शेतकरी.
Satara News : वाठार स्टेशन, कोरेगावच्या उत्तर भागात प्रमुख नगदी पीक असलेल्या वाघ्या घेवड्याचा खरीप पीकविमा योजनेत समावेश करण्यासाठी शासनाकडे प्रस्ताव पाठवून पाठपुरावा करणार असल्याचे आश्वासन सातारा जिल्हाधिकारी संतोष पाटील यांनी दिले.
वाठार स्टेशन येथे खरीप पिकाची सातबारा मध्ये नोंद करणे तसेच पीक पाहणीसाठी जिल्हाधिकारी संतोष पाटील तसेच कोरेगाव चे प्रांत प्रमोद कुदळे, तहसीलदार संगमेश कोडे आले होते, यावेळी भागातील शेतकऱ्यांनी वाघ्या घेवडा पिकाचा पीकविमा भरता येत नसल्याची तक्रार जिल्हाधिकाऱ्यांकडे केली. दरम्यान जिल्हाधिकारी यांनी शेतकऱ्यांच्या बांधावर जाऊन घेवडा पिकाची प्रत्यक्ष पाहणी केली.
जिल्हाधिकारी संतोष पाटील म्हणाले,“घेवडा हे पीक पालेभाजी वर्गात समाविष्ट असल्यामुळे सध्याच्या खरीप पीकविमा योजनेमध्ये त्याचा समावेश नाही. त्यामुळे शेतकऱ्यांना घेवडा पिकाचा पीकविमा भरता आलेला नाही. मात्र या भागातील घेवडा हे प्रमुख पीक असल्यामुळे त्याचा खरीप पिकांमध्ये समावेश करण्यासाठी आमच्या कार्यालयामार्फत शासनाला आणि संबंधित विमा कंपनीला सुधारणा करण्यासाठी प्रस्ताव पाठविण्यात येईल.”
“वाघ्या घेवड्याचा खरीप पिकांमध्ये समावेश करण्यासाठी शासनाकडे विनंती करून त्याचा पीकविमा योजनेत समावेश करण्यासाठी प्रयत्न करणार आहे. खरीप पिकांमध्ये वाघ्या घेवड्याचा समावेश झाला, तर त्यानंतर पीकविमा योजनेतही या पिकाचा समावेश करता येईल,” असे जिल्हाधिकारी पाटील यांनी स्पष्ट केले.
दरम्यान, खरीप पिकांची सातबारा नोंदणी अचूक व वेळेत करण्याच्या सूचना महसूल यंत्रणेला देण्यात आल्या असून, ई-पीक पाहणीतील तांत्रिक अडचणी दूर करण्यासाठीही आवश्यक कार्यवाही करण्यात येणार आहे.
पुढे जिल्हाधिकारी संतोष पाटील म्हणाले शेतकऱ्यांच्या खरीप पिकांची सातबारा उताऱ्यावर नोंदणी होणे आवश्यक आहे. यासाठी शासनाने ॲप विकसित केले असून, ज्या शेतामध्ये जे पीक असेल, त्याची प्रत्यक्ष शेतात जाऊन नोंदणी करण्याची गरज आहे.”
ई-पीक पाहणीसाठी मंडलाधिकारी, तलाठी आणि महसूल सहाय्यक यांची नियुक्ती करण्यात आली आहे. महसूल यंत्रणा हे काम करीत असली तरी प्रत्यक्ष नोंदणी करताना काही तांत्रिक अडचणी येत आहेत. या अडचणी समजून घेण्यासाठी तसेच पीक पाहणीची प्रत्यक्ष वस्तुस्थिती जाणून घेण्यासाठी आपण शेतकऱ्यांच्या बांधावर आलो असल्याचे जिल्हाधिकारी पाटील यांनी सांगितले.
यावेळी तलाठी सचिन माळी, महसूल सेवक मोहसीन पठाण, हणमंत तावरे,कोरेगाव तालुका शिवसेना उपप्रमुख चंद्रकांत काका पवार, कमलाकर भोईटे, विकास मतकर,सुरेंद्र लोंढे, कालिदास काळोखे,चेतन लोंढे,राजेंद्र लोंढे, सतीश जाधव,संतोष जाधव, सचिन जाधव, दत्तात्रय अहिरेकर आदी शेतकरी उपस्थित होते
जिल्हाधिकाऱ्यांनी थेट शेतकऱ्यांच्या बांधावर जाऊन घेवडा पिकाची पाहणी केल्याने परिसरातील शेतकऱ्यांमध्ये समाधान व्यक्त होत असून, वाघ्या घेवड्याचा खरीप पिकांमध्ये व त्यानंतर पीकविमा योजनेत समावेश करण्यासाठी शासनाकडे होणाऱ्या पाठपुराव्याकडे शेतकऱ्यांचे लक्ष लागले आहे.
