स्वातंत्र्यदिनानिमित्त पोलिस अधीक्षक निखील पिंगळे यांनी आपल्या दोन्ही मुलांसमवेत ध्वजारोहण केले. तिरंगा आकाशात डौलाने फडकताच मुलांच्या चेहऱ्यावर उमटलेला अभिमान आणि वडिलांच्या चेहऱ्यावर दिसणारी कर्तव्यपूर्तीची भावना या प्रसंगाला वेगळेच भावविश्व देत होती. पोलिस मुख्यालयातील अधिकारी आणि कर्मचाऱ्यांचेही लक्ष या दोन्ही चिमुकल्या ‘पोलिसां’कडे वेधले गेले. त्यांच्या गणवेशाचे उपस्थितांनी कौतुक केले.
देशाच्या सुरक्षेसाठी अहोरात्र कर्तव्य बजावणाऱ्या पोलिस अधिकाऱ्याने आपल्या मुलांना सोबत घेऊन स्वातंत्र्यदिन साजरा करणे, हा केवळ कौटुंबिक आनंदाचा क्षण नव्हता. तर ‘देश सर्वप्रथम’ या भावनेचा पुढच्या पिढीला दिलेला संस्कार होता. एका बाजूला देशाच्या सुरक्षेची जबाबदारी खांद्यावर घेऊन कर्तव्य बजावणारे वडील आणि दुसऱ्या बाजूला त्याच गणवेशाची ओढ मनात घेऊन उभे असलेली त्यांची मुले… हा क्षण पाहणाऱ्या प्रत्येकासाठी प्रेरणादायी ठरला.
तिरंग्याला सलाम करताना मुलांच्या डोळ्यात दिसणारा अभिमान आणि वडिलांच्या कर्तव्यभावनेतून त्यांना मिळणारी प्रेरणा यांचा सुंदर मिलाफ या ध्वजारोहणात पाहायला मिळाला. त्यामुळे पोलिस मुख्यालयातील हा स्वातंत्र्यदिनाचा सोहळा केवळ ध्वजारोहणापुरता मर्यादित राहिला नाही; तर एका वडिलांनी आपल्या मुलांच्या मनात पेरलेली देशप्रेमाची बीजे आणि उद्याच्या जबाबदार पिढीचे स्वप्न यांचा भावस्पर्शी सोहळा ठरला.
स्वातंत्र्यदिन म्हटल की, प्रत्येक पालक आपल्या मुलांच्या पोशाखाकडे विशेष लक्ष देतो. मात्र, पोलिस अधीक्षक निखील पिंगळे यांनी शर्वराज, निशीका या आपल्या दोन्ही मुलांसाठी घेतलेला गणवेश केवळ कपड्यांचा पोशाख नव्हता; त्यामागे एक वडिलांचे स्वप्न आणि भावी पिढीला दिलेला संस्कार होता.
मुलांनी भविष्यात आपल्यापेक्षाही मोठे अधिकारी व्हावे, पोलिस दलाविषयी त्यांच्या मनात लहानपणापासूनच जिव्हाळा निर्माण व्हावा आणि या क्षेत्राची ओढ त्यांच्या मनात रुजावी, या भावनेतून निखील पिंगळे यांनी त्यांच्या गणवेशाकडे विशेष लक्ष दिले. वरिष्ठ पोलिस अधिकाऱ्यांच्या गणवेशाच्या धर्तीवर त्यांनी टेलरकडून मुलांचे गणवेश खास तयार करून घेतले. त्यामुळे स्वातंत्र्यदिनाच्या सोहळ्यात हे दोन्ही चिमुकले गणवेशधारी सर्वांचे आकर्षण ठरले.
.png "Videos"){kind=small}
