ज्येष्ठ समाजसेवक बाबा आढाव यांची प्रकृती चिंताजनक; शरद पवारांकडून रुग्णालयात जाऊन विचारपूस

बाबा आढाव यांची प्रकृती खालावल्याची माहिती मिळताच राष्ट्रवादी काँग्रेसचे अध्यक्ष शरद पवार शनिवारी रुग्णालयात दाखल झाले. त्यांनी उपचार प्रक्रियेबाबत माहिती घेतली.

• समाजसेवक बाबा आढाव यांची प्रकृती चिंताजनक
• शरद पवारांनी घेतली प्रकृतीची माहिती
• सर्व मदत करण्याची तयारी दर्शविली

पुणे : राज्यातील ज्येष्ठ समाजसेवक डॉ. बाबा आढाव यांची प्रकृती गंभीर असून, त्यांच्यावर पुण्यातील पुना हॉस्पिटलच्या अतिदक्षता विभागात उपचार सुरू आहेत. गेल्या दहा दिवसांपासून डॉक्टरांच्या सततच्या देखरेखीखाली त्यांच्यावर उपचार सुरू आहेत. त्यांच्या प्रकृतीत अधूनमधून चढ-उतार होत असल्याने समर्थक व सामाजिक वर्तुळात मोठी चिंता निर्माण झाली आहे. आढाव यांची प्रकृती खालावल्याची माहिती मिळताच राष्ट्रवादी काँग्रेसचे अध्यक्ष शरद पवार शनिवारी रुग्णालयात दाखल झाले. त्यांनी वैद्यकीय पथकाशी सविस्तर चर्चा करून उपचार प्रक्रियेबाबत माहिती घेतली. तसेच कुटुंबीयांना धीर देत आवश्यक ती सर्व मदत करण्याची तयारी दर्शविली.

 

डॉक्टरांकडून मिळालेल्या माहितीनुसार, हृदयाशी संबंधित त्रास वाढल्यामुळे त्यांना तातडीने रुग्णालयात दाखल करण्यात आले. हृदयरोगतज्ज्ञ डॉ. अभिजित वैद्य आणि त्यांच्या टीमकडून उपचार सुरू असून, सध्या प्रकृती स्थिर असली तरी पुढील काही तास महत्त्वाचे असल्याचे वैद्यकीय सूत्रांनी सांगितले. दरम्यान, आढाव यांच्या कुटुंबीयांनी जनतेला कोणत्याही अफवा न पसरविण्याची विनंती केली आहे. अधिकृत किंवा कुटुंबीयांकडून मिळणाऱ्या माहितीलाच विश्वास ठेवावा, असे आवाहन करण्यात आले.

कामगार, कष्टकरी आणि वंचित घटकांसाठी आयुष्यभर काम करणारे बाबा आढाव यांचे स्वास्थ्य लवकर सुधारावे, यासाठी राज्यभरातून प्रार्थना व्यक्त होत आहेत. अनेक सामाजिक कार्यकर्ते, कामगार संघटना आणि विविध क्षेत्रातील मान्यवरांनी त्यांच्या प्रकृतीविषयी चिंता व्यक्त करून लवकर बरे होण्याची आशा व्यक्त केली आहे. कष्टकऱ्यांचे नेते म्हणून बाबा आढाव यांना ओळखलं जातं असून त्यांनी आपले संपूर्ण जीवन कामगार संघटना आणि वंचितांच्या हक्कांसाठी समर्पित केलं आहे.

हे सुद्धा वाचा : पुण्यात अभ्यासिकांसाठी नियंत्रण नियमावली हाेणार; नेमकं काय करणार उपाययाेजना?