फोटो सौजन्य सोशल मीडिया
लातूर व धाराशिव येथील पिकांची पाहणी केल्यानंतर बार्शीमार्गे सोलापूरकडे येताना उत्तर सोलापूर तालुक्यातील कारंबा परिसरात थांबून ते पिकांची प्रत्यक्ष पाहणी करणार असल्याची माहिती आहे. मुख्यमंत्र्यांच्या पाहणीसाठी मंगळवारी दिवसभर जिल्हा प्रशासनाची धावपळ सुरू होती.
जिल्हाधिकारी, कृषी अधीक्षक आणि महसूल विभागातील अधिकाऱ्यांनी सोलापूर-बार्शी मार्गावरील तब्बल ४६ ठिकाणांची पाहणी मंगळवारी रात्री भरपावसात करून संभाव्य स्थळांची चाचपणी केली. अखेर कारंबा जवळील शेतकरी अशोक मनोहर भोरे यांच्या शेतातील पावसाअभावी वाळलेल्या उडीद पिकाची पाहणी करण्याचे निश्चित करण्यात आल्याचे सांगण्यात आले.
Solapur Viral Video : ९ एकर जमीन नावावर करूनही मुलाकडून आई-वडिलांचा छळ; सोलापुरात धक्कादायक प्रकार
मुख्यमंत्र्यांच्या दौऱ्याच्या पार्श्वभूमीवर मंगळवारी रात्री आठच्या सुमारास पोलीस व महसूल अधिकाऱ्यांनी थेट भोरे यांच्या शेतावर जाऊन पाहणी केली. पोलिस उपायुक्त विजय कबाडे, स्थानिक गुन्हे शाखेचे पोलिस निरीक्षक सूरज जगताप, तालुका पोलिस ठाण्याचे निरीक्षक कुंदन गावडे आणि मार्डीच्या मंडल अधिकारी वैशाली जमदाडे यांनी शेतातील पिकांची पाहणी करून उपस्थित शेतकऱ्यांशी चर्चा केली.
जिल्ह्यात ३१ ऑगस्टअखेर जवळपास ३ लाख ६० हजार हेक्टर क्षेत्रावर खरीप पेरणी झाली होती. मात्र, पावसाने दीर्घ दडी मारल्याने सोयाबीन, उडीद, मूग, तूर आणि मक्यासह विविध पिकांना मोठा फटका बसला आहे. पावसाच्या तुटीमुळे अनेक भागांत पिके करपली असून पिण्याच्या पाण्याचा प्रश्नही गंभीर बनला आहे. काही गावांमध्ये टँकरद्वारे पाणीपुरवठ्याची वेळ आली आहे.
प्रशासनाने १५ सप्टेंबरपर्यंत खरीप पिकांच्या नुकसानीची पाहणी करून १७ सप्टेंबर रोजी कृषी आयुक्तालयाकडे नुकसानीचा अहवाल पाठविल्याचे सांगण्यात येते. या पार्श्वभूमीवर जिल्हा तातडीने दुष्काळग्रस्त जाहीर करावा, पीक नुकसानभरपाई द्यावी, पिण्याचे पाणी व जनावरांसाठी चारा उपलब्ध करून द्यावा, अशी मागणी शेतकरी, राजकीय पक्ष आणि विविध सामाजिक संघटनांकडून होत आहे.
राज्यात पावसाच्या खंडामुळे अनेक जिल्ह्यांत दुष्काळसदृश परिस्थिती निर्माण झाल्याचे मुख्यमंत्री फडणवीस यांनी यापूर्वी म्हटले असून, प्राथमिक आढाव्यानंतर पीक नुकसानीचे सर्वेक्षण व मदतीची प्रक्रिया राबविण्याचे सरकारने सांगितले आहे.
Solapur News : अष्टविनायकांच्या दर्शनाने कुंभारी उजळली! स्वामी परिवाराचा नयनरम्य देखावा ठरतोय आकर्षण
मुख्यमंत्री फडणवीस यांच्या पाहणी दौऱ्यामुळे सोलापूरच्या शेतकऱ्यांच्या अडचणी शासनाच्या निदर्शनास येणार आहेत. पिकांचे नुकसान, पाणीटंचाई आणि दुष्काळसदृश परिस्थितीच्या पार्श्वभूमीवर मुख्यमंत्री कोणत्या उपाययोजना जाहीर करतात, याकडे जिल्ह्यातील शेतकऱ्यांचे लक्ष लागले आहे.
दुष्काळग्रस्त जिल्हा जाहीर करा
पीक नुकसानभरपाई द्या
पिण्याच्या पाण्याची व्यवस्था करा
जनावरांसाठी चारा व पाण्याची सोय करा
शेतकऱ्यांना तातडीची आर्थिक मदत द्या
मुख्यमंत्र्यांच्या दौऱ्याच्या पार्श्वभूमीवर पोलीस बंदोबस्त वाढविण्यात आला आहे. भोरे यांच्या शेताच्या बांधावरच पोलिस उपायुक्त विजय कबाडे यांनी उपस्थित पोलिस अधिकाऱ्यांना सुरक्षेबाबत मार्गदर्शन केले. बार्शी-सोलापूर मार्गावर वाहतूककोंडी होऊ नये तसेच दौऱ्यादरम्यान कोणताही अनुचित प्रकार घडू नये, यासाठी चोख बंदोबस्त ठेवण्याच्या सूचना देण्यात आल्या आहेत.
.png "Videos"){kind=small}
