कल्याण : कल्याणच्या भाजप कार्यकर्ता विकी गणात्रा आमदार गोळीबार प्रकरणात अखेर अटक झाला आहे. विकी गणात्रा हा केंद्रीय मंत्री कपील पाटील आणि आमदार गणपत गायकवाड यांचा निकटवर्तीय आणि खंदा समर्थक आहे. गोळीबारच्या वेळी विकी गणात्रा हा आमदार गायकवाड यांच्याशी बोलण्याकरीता आला होता. गणपत गायकवाडसह सहा जणांच्या विरोधात गुन्हा दाखल झाला होता. त्यामध्ये विक्की देखील आहे. या प्रकरणात दोन जण अद्याप फरार आहेत.
उल्हासनगरच्या हिललाईन पोलीस ठाण्यात आमदार गणपत गायकवाड यांनी शिवसेना शिंदे गटाचे कल्याण शहर प्रमुख महेश गायकवाड यांच्यासह त्यांच्या साथीदारावर गोळीबार केला होता. या प्रकरणात संदीप सरवणकर, हर्षल केणे यांना अटक करण्यात आली होती. आमदाराचा मुलगा वैभव गायकवाड, आमदारांचे सहयोगी विकी गणात्रा आणि नागेश बडेकर फरार असल्याचे सांगण्यात आले होते. आत्ता विकी गणात्रा याला पोलिसांनी अटक केली आहे.
पोलिस सूत्रांकडून अशी माहिती आहे की, विकी गणात्रा याने ठाणे खंडणी विरोधी पथकाकडे आत्मसमर्पण केले आहे. कल्याणमध्ये विकी गणात्रा भाजपचा सक्रीय कार्यकर्ता आहे. त्याच्या भावाकडे भाजपचे पद आहे. भाजपच्या कल्याणमध्ये कोणताही कार्यक्रम असो त्यात विकी याची उपस्थिती होती. विकी गणात्रा हा केंद्रीय मंत्री कपील पाटील आणि भाजप आमदार गायकवाड यांचा निकटवर्तीय आहे.
