स्वाभिमानी शेतकरी संघटनेची सांगली जिल्ह्यात आज जनजागृती रॅली; सोनहिरा, क्रांती, कृष्णा साखर कारखान्यांवरून जाणार रॅली

साखर कारखान्यांचा गळीत हंगाम सुरू होण्याच्या पार्श्वभूमीवर आंदोलनाची तयारी सुरू आहे. या रॅलीच्या माध्यमातून ऊस उत्पादक शेतकऱ्यांना एकत्र आणून ऊसदराच्या मागणीसाठी जनजागृती करण्यात येणार आहे.

सांगली : ऊसदराच्या प्रश्नावर शेतकऱ्यांमध्ये जनजागृती करण्यासाठी स्वाभिमानी शेतकरी संघटनेच्या वतीने रविवारी (दि. १८) सांगली जिल्ह्यात जनजागृती रॅली काढण्यात येणार आहे. संघटनेचे नेते राजू शेट्टी यांच्या नेतृत्वाखाली होणाऱ्या या रॅलीत जिल्ह्यातील विविध साखर कारखान्यांच्या परिसरातून मार्गक्रमण करण्यात येणार आहे.

आष्टा बसस्थानक चौकातून रविवारी सकाळी १० वाजता रॅलीला सुरुवात होणार आहे. आष्टा, अंकलखोप, आमणापूर, बुरुंग, कुंडल, बलवडी, रामापूर, वांगी, हिंगणगाव, कडेपूर, मोहिताळे, शिरसगाव, येडे फाटा, शाळगाव, विटा, शिवणीगाव, कडेगाव, सोनहिरा साखर कारखाना, देवदाबे, बागणी, चिंचणी, सोनसळ, शिरोली स्टेशन, कृष्णा साखर कारखाना आणि रेठरे नळे सभा असा रॅलीचा मार्ग असणार आहे. ऊसदराच्या प्रश्नावर शेतकरी संघटनेने आक्रमक भूमिका घेतली असून, साखर कारखान्यांचा गळीत हंगाम सुरू होण्याच्या पार्श्वभूमीवर आंदोलनाची तयारी सुरू आहे. या रॅलीच्या माध्यमातून ऊस उत्पादक शेतकऱ्यांना एकत्र आणून ऊसदराच्या मागणीसाठी जनजागृती करण्यात येणार आहे.

दरम्यान, या रॅलीत जिल्ह्यातील शेतकरी आणि संघटनेच्या कार्यकर्त्यांनी रविवारी सकाळी १० वाजता आष्टा बसस्थानक चौकात उपस्थित राहावे, असे आवाहन स्वाभिमानी शेतकरी संघटनेच्या वतीने करण्यात आले आहे.

ऊसदराच्या प्रश्नावर शेतकरी संघटना आक्रमक

ऊसदराच्या प्रश्नावर शेतकरी संघटना आक्रमक झाल्या आहेत, तर दुसरीकडे साखर कामगार आणि ऊसतोड मजुरांचे आंदोलन तीव्र होत आहे. या दोन्ही आंदोलनांचा परिणाम साखर उद्योगावर होण्याची शक्यता आहे. त्यामुळे यंदाचा ऊस गाळप हंगाम वेळेत सुरू होणार का, कारखान्यांचे कामकाज विस्कळीत होणार का आणि कामगारांच्या मागण्यांवर तोडगा कधी निघणार, याकडे आता लक्ष लागले आहे.

Sugar Factory Strike : महाराष्ट्रातील साखर कारखाने उद्यापासून बंद? राजू शेट्टी आक्रमक, ऊसाचे ट्रॅक्टर-ट्रक अडवणार