Ashok Kharat Case : अशोक खरातविरुद्ध दहावा गुन्हा दाखल; बनावट सापाची भीती दाखवून 5 कोटींची फसवणूक
मुंबई : नाशिकमधील कथित स्वयंघोषित बाबा अशोक खरात याच्याविरोधात सरकारवाडा पोलिस ठाण्यात दहावा गुन्हा दाखल करण्यात आला आहे. यापैकी 8 गुन्हे थेट खरातविरुद्ध असून, 2 संबंधित आहेत. मृत्यूची भीती दाखवून आर्थिक फसवणूक केल्याप्रकरणी आता त्याच्याविरोधात खंडणीचा गुन्हा दाखल झाला आहे.
पुण्यातील बिल्डर राजेंद्र जासूद यांनी ही तक्रार दिली आहे. यापूर्वी वावी पोलिस ठाण्यात अशोक खरात यानेच राजेंद्र जासूद आणि दिनेश परब यांच्याविरोधात 5 कोटी रुपयांची खंडणी मागितल्याचा खोटा गुन्हा दाखल केला होता. आता त्याच प्रकरणात खरातविरुद्धच खंडणीचा गुन्हा नोंदवण्यात आला आहे. तक्रारीनुसार, लॉजिस्टिक व्यवसाय सुरू करून देण्याच्या नावाखाली ‘अवतार पूजा’ साठी जासूद यांच्याकडून मर्सिडीज कार घेतली. २०१८ मध्ये ही कार खरातला देण्यात आली. त्यानंतर ‘परिस’ शक्ती मिळवण्यासाठी २१ देशांचा प्रवास करणे आवश्यक असून, अन्यथा नागदेवतेच्या दंशाने मृत्यू होईल, असे सांगून त्यांना घाबरवण्यात आले.
गुरुसेवा आणि मृत्यूची भीती दाखवत अमेरिकेतील उपचार खर्चासाठी भाग पाडण्यात आले, ज्यासाठी जासूद यांनी २९.८१ लाख रुपये खर्च केले. २०१८ ते डिसेंबर २०२५ दरम्यान विविध मार्गांनी ४ ते ५ कोटी रुपयांची फसवणूक केल्याचा आरोप आहे. १ ऑक्टोबर २०१८ रोजी रात्री ८ वाजता पूजेच्या बहाण्याने इशानेश्वर मंदिरामागे अंधारात नेऊन ‘नागदर्शन’ घडवण्याचे सांगत बनावट साप दाखवून घाबरवण्यात आले.
प्राचीन शिवमंदिर पाडण्याचा कट
स्वयंघोषित बाबा अशोक खरात याचा वावी येथील प्राचीन शिवमंदिराबाबत आणखी एक धक्कादायक प्रकार समोर आला आहे. वावी गावात १२ व्या शतकातील यादवकालीन प्राचीन शिवमंदिर आहे. या मंदिराच्या जीर्णोद्धारासाठी ग्रामस्थांनी खरातला आमंत्रित केले होते; मात्र मंदिर दुरुस्त करण्याऐवजी त्याने ते पूर्णपणे पाडण्याचा सल्ला दिला. त्याने ग्रामस्थांना सांगितले की हे मंदिर येथे ठेवू नका, ते पाडून टाका आणि त्यातील देवताही हटवा.
शिवलिंगाकडे पाय करून राहिला उभा
इतकेच नव्हे, तर खरात शिवलिंगाकडे पाय करून उभा राहिला आणि त्यात आता कोणतीही ऊर्जा शिल्लक नसल्याचा दावा केला. तसेच मंदिरात ५० टक्के नकारात्मक ऊर्जा असल्याचे सांगून लोकांच्या धार्मिक भावना दुखावल्या. लोकांचा विश्वास जिंकण्यासाठी खरात बनावट मोबाईल अॅपचा वापर करत होता. हे अॅप कोणत्याही वस्तूचे वय किंवा त्यातील’ ऊर्जा’ मोजण्याचा दावा करत होते. तो अलेक्सासारख्या कमांड देऊन हे अॅप चालवत असे आणि लोकांची दिशाभूल करत असे.
.png "Videos"){kind=small}
