‘संस्कृतीची हंडी’ ते ‘मराठी हंडी’; मीरा-भाईंदरमध्ये दहीहंडीचा दणका
मीरा-भाईंदर वसई-विरार पोलीस आयुक्तालयाच्या हद्दीतील आकडेवारीनुसार, परिमंडळ-१ मध्ये ८८ सार्वजनिक आणि २५० खासगी, परिमंडळ-२ मध्ये ७१ सार्वजनिक आणि २७८ खासगी, तर परिमंडळ-३ मध्ये ८४ सार्वजनिक आणि ४४८ खासगी दहीहंडींचे आयोजन करण्यात आले आहे. त्यामुळे परिमंडळनिहाय एकूण २४३ सार्वजनिक आणि ९७६ खासगी, म्हणजे तब्बल १,२१९ दहीहंडी होतात. उपलब्ध आकडेवारीनुसार शहरात दहीहंडी उत्सवाची मोठी रेलचेल पाहायला मिळणार आहे.
ठाणे जिल्ह्यातील मंत्री प्रताप सरनाईक यांच्या संकल्पनेतून गेल्या वर्षापासून मीरा-भाईंदरमध्ये ‘संस्कृतीची हंडी’ आयोजित केली जात आहे. यंदा हा कार्यक्रम अधिक दिमाखदार पद्धतीने आयोजित करण्यात आला असून, विविध सुप्रसिद्ध कलाकार आणि गायकांची उपस्थिती आकर्षणाचे केंद्र ठरणार आहे. महाराष्ट्रात परिवहन विभागाच्या माध्यमातून मराठी भाषेच्या प्रसारासाठी राबविण्यात आलेल्या उपक्रमांचा संदेशही या दहीहंडीच्या माध्यमातून देण्याचा प्रयत्न करण्यात आला आहे. ‘लाभले आम्हास भाग्य, बोलतो मराठी’ अशा आशयाचे फलक शहराच्या विविध भागांत लावण्यात आले आहेत. त्यामुळे दहीहंडी उत्सवाला सांस्कृतिक आणि मराठी अस्मितेची जोड मिळाली आहे.
भाजपच्या कार्यालयासमोरही मोठ्या प्रमाणात भव्य दहीहंडीचे आयोजन करण्यात आले आहे. त्याचबरोबर मनसेच्या वतीने *‘मराठी हंडी’*चे आयोजन करण्यात आले असून, या माध्यमातून मराठी भाषेचा आणि महाराष्ट्राच्या संस्कृतीचा संदेश देण्याचा प्रयत्न केला जाणार आहे.
यंदाच्या कार्यक्रमाचे आणखी एक वैशिष्ट्य म्हणजे दहीहंडीच्या प्रारंभी महाराष्ट्रातील दिवंगत राजकीय नेते तसेच मीरा-भाईंदर शहरातील दिवंगत वरिष्ठ मंडळींना श्रद्धांजली वाहण्यात येणार आहे. त्यामुळे उत्सवाच्या जल्लोषासोबत कृतज्ञतेची भावना व्यक्त करणारा उपक्रमही यावेळी पाहायला मिळणार आहे.
मीरा-भाईंदरमधील विविध सार्वजनिक मंडळांकडूनही दहीहंडीचे मोठ्या प्रमाणात आयोजन करण्यात आले आहे. त्यामध्ये गेल्या वर्षापासून ‘मानाची हंडी’ म्हणून नावाजलेल्या राहुल पाटील मित्र मंडळाच्या दहीहंडीची विशेष चर्चा आहे. या हंडीला मुंबईतील दिग्गज दहीहंडी पथके उपस्थित राहणार असल्याने गोविंदा पथकांच्या थरारक सलामी आणि मानवी मनोरे पाहण्यासाठी मोठी गर्दी होण्याची शक्यता आहे.
दहीहंडी उत्सवादरम्यान मोठ्या प्रमाणावर गर्दी होणार असल्याने मीरा-भाईंदर वसई-विरार पोलीस आयुक्तालयाने कायदा व सुव्यवस्था राखण्यासाठी मोठा पोलीस बंदोबस्त तैनात केला आहे. या बंदोबस्तामध्ये ३ पोलीस उपअधीक्षक, ८ वरिष्ठ अधिकारी, ४६ पोलीस निरीक्षक, २०२ अधिकारी, १,५१० पोलीस अंमलदार आणि २२० होमगार्ड, असे एकूण १,९८९ पोलीस अधिकारी-कर्मचारी सहभागी असणार आहेत.
याशिवाय SRPFची १ कंपनी, RCPच्या २ प्लाटून आणि स्ट्रायकिंग फोर्सच्या २ प्लाटून सज्ज ठेवण्यात आल्या आहेत. गर्दी नियंत्रण, वाहतूक नियमन, संवेदनशील ठिकाणांवरील बंदोबस्त आणि कोणताही अनुचित प्रकार घडू नये यासाठी पोलिसांकडून विशेष खबरदारी घेतली जाणार आहे.
दहीहंडीच्या ठिकाणी मोठ्या संख्येने नागरिक आणि गोविंदा पथके सहभागी होणार असल्याने वाहतूक कोंडी टाळण्यासाठीही पोलिसांकडून विशेष नियोजन करण्यात आले आहे. गर्दीच्या ठिकाणी पोलिसांची गस्त वाढविण्यात येणार असून आयोजकांनाही सुरक्षा नियमांचे काटेकोर पालन करण्याच्या सूचना देण्यात आल्या आहेत. राजकीय पक्षांचा झेंडा, मराठी संस्कृतीचा संदेश, कलाकारांची उपस्थिती, गोविंदा पथकांचा थरार आणि तब्बल १,९८९ पोलिसांचा बंदोबस्त यामुळे यंदाची मीरा-भाईंदरमधील दहीहंडी उत्सवाची रंगत आणखी वाढणार आहे.
.png "Videos"){kind=small}
