आकुर्डीत जुन्या वादाचा थरार! दोन तरुणांना बेदम मारहाण; नेमकं काय घडलं?

जुन्या भांडणाच्या वादातून एका तरुणावर आणि त्याच्या मित्रावर विनाकारण आठ ते नऊ जणांच्या टोळक्याने प्राणघातक हल्ला करत परिसरात दहशत माजवल्याचा प्रकार समोर आला आहे.

• आकुर्डीत जुन्या वादातून दोन तरुणांवर प्राणघातक हल्ला
• आठ ते नऊ जणांच्या टोळक्याकडून बेदम मारहाण
• निगडी पोलिसांकडून तपास सुरू

पिंपरी : राज्यासह देशभरात गुन्हेगारी वाढली असून, वाढत्या गुन्हेगारीमुळे नागरिकांमध्ये दहशत निर्माण होत आहे. अशातच आता जुन्या भांडणाच्या वादातून एका तरुणावर आणि त्याच्या मित्रावर विनाकारण आठ ते नऊ जणांच्या टोळक्याने प्राणघातक हल्ला करत परिसरात दहशत माजवल्याचा प्रकार समोर आला आहे. ही घटना २१ ऑक्टोबर रोजी रात्री १० वाजता आयमॅक्स ऑप्टीशियन समोर, आकुर्डी येथे घडली आहे. या प्रकरणात केदार संतोष यादव (वय २१, चिखली गावठाण) यांनी निगडी पोलीस ठाण्यात फिर्याद दिली आहे. त्यानुसार करण साठे आणि त्याचे ८ ते ९ साथीदार यांच्या विरोधात गुन्हा दाखल करण्यात आला आहे. करण साठे याला पोलिसांनी अटक केली आहे.

 

पोलिसांनी दिलेल्या माहितीनुसार, फिर्यादी आणि त्यांचे मित्र हर्षद पवार हे रस्त्याने जात असताना आरोपी करण साठे याच्यासोबत झालेल्या जुन्या वादाच्या कारणावरून त्यांना शिवीगाळ व लाथाबुक्क्यांनी मारहाण करण्यात आली. फिर्यादी व त्यांचा मित्र जीव वाचवून पळत असताना आरोपींनी पाठलाग करून दोघांना पकडले. करण साठेच्या एका साथीदाराने हातातील कड्याने फिर्यादीच्या डोक्यात मारहाण केली, तर दुसऱ्या साथीदाराने सिमेंटचा पेव्हर ब्लॉक मारून दुखापत केली. तसेच करण साठे याने धारदार शस्त्राने हर्षद याच्या डोक्यात व पाठीवर वार करून खूनाचा प्रयत्न केला. निगडी पोलीस तपास करत आहेत.

हे सुद्धा वाचा : दीड वर्षांपासून पोलिसांना गुंगारा देणारे सख्खे भाऊ अखेर जाळ्यात! गुन्हे शाखेची मोठी कारवाई

१६ वर्षीय मुलावर कोयत्याने हल्ला

मोबाईलवर ठेवलेल्या ‘King Is Back’ या स्टेटसच्या कारणावरून तळेगाव दाभाडे येथे एका १६ वर्षीय मुलावर कोयत्याने हल्ला केल्याची धक्कादायक घटना समोर आली आहे. शिवाजी चौक परिसरातील कपड्याच्या दुकानात घुसून तीन जणांनी या मुलावर कोयत्याने वार केले आहेत. या हल्ल्यात मुलगा जखमी झाला असून, त्याची प्रकृती स्थिर असल्याची माहिती पोलिसांनी दिली. या घटनेचा थरारक प्रकार सीसीटीव्ही कॅमेऱ्यात कैद झाल्याचे सांगण्यात येत आहे. संबंधित अल्पवयीन मुलाने काही महिन्यांपूर्वी हत्येच्या गुन्ह्यात सहभागी असलेल्या आणि सुधारगृहातून बाहेर आलेल्या एका अल्पवयीन मुलासोबत फोटो काढला होता. त्यानंतर त्याने ‘King Is Back’ असे स्टेटस मोबाईलवर ठेवले होते. या स्टेटसमुळे पूर्वीच्या हत्येच्या घटनेत मृत्यू झालेल्या तरुणाच्या मित्रांमध्ये नाराजी निर्माण झाली होती, अशी माहिती समोर आली आहे. याच रागातून संबंधित मुलावर हल्ला करण्यात आल्याचे सांगितले जात आहे. मात्र, या हल्ल्यामागील नेमके कारण आणि घटनाक्रम याबाबत पोलिसांकडून तपास सुरू आहे.

हे सुद्धा वाचा : अमरावतीत खळबळ! पत्नीचा स्कार्फने गळा आवळून खून; धक्कादायक कारणही आलं समोर