फोटो सौजन्य- प्रतिनिधी
विधानसभा निवडणुकीच्या मतदानाला अवघे काही दिवस शिल्लक असतानाच कल्याण पश्चिम विधानसभा मतदारसंघात आणखी एक मोठी राजकीय घडामोड घडली आहे. कल्याण पश्चिमेतील शिवसेना भाजप राष्ट्रवादी रिपाइं महायुतीचे उमेदवार विश्वनाथ भोईर यांच्याविरोधातील भाजप शहराध्यक्ष वरुण पाटील यांचे बंड अखेर शमले आहे. महायुती उमेदवार विश्वनाथ भोईर यांच्या निवडणूक मध्यवर्ती कार्यालयामध्ये भाजपचे माजी मंत्री कपिल पाटील यांनी पत्रकार परिषद घेऊन वरुण पाटील यापुढे महायुतीचे उमेदवार विश्वनाथ भोईर यांना निवडून आणण्यासाठी प्रामाणिक काम करतील अशी ग्वाही दिली.
महायुती उमेदवारासोबत राहण्याची भूमिका
कल्याण पश्चिम विधानसभा मतदारसंघामध्ये महायुतीकडून विद्यमान आमदार विश्वनाथ भोईर यांनाच पुन्हा उमेदवारी जाहीर झाली होती. मात्र त्यानंतरही भाजपचे शहराध्यक्ष वरुण पाटील यांनी अपक्ष म्हणून आपला उमेदवारी अर्ज दाखल केल्याने खळबळ उडाली होती. परंतू भाजप नेते उपमुख्यमंत्री देवेंद्र फडणवीस यांची वरुण पाटील यांनी भेट घेतली. त्यावेळी कल्याण पश्चिमेची जागा शिवसेनेकडे गेली असून वरुण पाटील यांनी युतीधर्म पाळणे आवश्यक असल्याचे सांगितले. तसेच वरुण पाटील हे संघटनेचे अध्यक्ष असून त्यांनी युतीधर्माचे पालन करावे अशा सूचना फडणवीस यांनी वरुण पाटील यांना दिल्या. तसेच फडणवीस यांच्या भेटीनंतर वरुण पाटील यांनी मुख्यमंत्री एकनाथ शिंदे यांचीही भेट घेत चर्चा झाल्याचे कपिल पाटील यांनी सांगितले. या दोन्ही नेत्यांच्या शब्दांना मान देऊन वरुण पाटील यांनी वेळेमध्ये आपला उमेदवारी अर्ज मागे घेतला नसला तरी महायुती उमेदवारासोबत राहण्याची भूमिका घेतल्याचे कपिल पाटील यांनी स्पष्ट केले.
तर भाजप पक्षश्रेष्ठींकडून वरुण पाटील यांच्यावर करण्यात आलेली निलंबनाची कारवाई स्थगित करण्यात आल्याचे उपमुख्यमंत्री देवेंद्र फडणवीस यांनी सांगितल्याचेही कपिल पाटील यावेळी म्हणाले.
यावेळी महायुती उमेदवार विश्वनाथ भोईर, जिल्हाप्रमुख अरविंद मोरे, शिवसेना शहराध्यक्ष रवी पाटील, वरुण पाटील, प्रेमनाथ म्हात्रे, शिवसेनेच्या महिला संघटक छायाताई वाघमारे, माजी नगरसेवक श्रेयस समेळ, यांच्यासह शिवसेना भाजप शिवसेनेचे सर्व प्रमुख पदाधिकारी आणि कार्यकर्ते मोठ्या संख्येने उपस्थित होते.
कल्याण पश्चिम मतदारसंघ लढत
कल्याण पश्चिम मतदारसंघात शिवसेना शिंदे गटाचे विद्यमान आमदार विश्वनाथ भोईर विरुद्ध शिवसेना ठाकरे गटाचे उमेदवार सचिन बारसे अशी लढत होणार आहे. 2024 मध्ये झालेल्या लोकसभा निवडणुकीमध्ये कल्याण पश्चिममधून महायुतीचे उमेदवार कपिल पाटील यांना चांगले मताधिक्क्य मिळाले होते त्यामुळे येथे शिवसेना शिंदे गटाचे पारडे जड वाटत असले तरीही विधानसभा निवडणूकीचे समीकरण वेगळे असतात. या मतदारसंघात मागील तीन निवडणूकीमध्ये मनसे, भाजप आणि शिवसेनेला मतदारांनी कौल दिला आहे. त्यामुळे यावेळी कोणती शिवसेना येते बाजी मारते हे पाहणे औत्सुकाचे असणार आहे.
